“Kawatkawat nga relasyon, lami lang sa sinugdanan”

Daghan kitang nakuha nga leksiyon sa pagpusil, pag-kidnap, pagdunggab ug pagsunog-patay kang Air Force Staff Sergeant Mark Herbert Oberes.

Una, dili gyud maayo nga yama-yamaan ang pagka-sagrado sa kaminyoon.

Ikaduha, dili gyud magpataka pagsulod sa komplikadong relasyon. Subayon og tarong kung may kabilinggan na ba ang ika-uban sa kinabuhi.

Maayo gani nga napaspasan ang pagsulbad ning maong krimen sa Talisay City Police ug Carcar City Police hinungdan sa pagkadakop sa bag-ong mag-uyab nga sila si Resamie Cabañog ug Joshua Garciano.

Si Garciano mi-execute na og affidavit of confession unya mitumbok sa inahan ni Resamie nga si Edna nga maoy nagplano sa tanan human naglagot kini nga di gyud makigbuwag kang Resamie taliwa nga usa ka minyo ug mihulga pa kanila.

Kumusta naman ang manhunt operation sa kapolisan batok kang Edna ug sa giingong mga sakop sa rebelde nga maoy gipahimo sa brutal nga krimen?

Akong nahibaw-an kang Supt. Marlu Cabañog nga buhi pa ang sakop sa air force dihang gisunog didto sa Valencia Carcar sulod mismo sa iyang sakyanan kay nagtiyabaw pa.

Usa sa mga suspetsado mao si Thomas Isugan kinsa miembro sa CPP NPA nga nakaapil kaniadtong 2013 sa pag-ambush sa mga pulis.

Si Isugan giingong maoy driver usahay ni Edna sa mga lakaw niini sa negosyo.
* * *

Wa koy supak nga desiplinahon kining mga motorista nga mo counter flow sa kalsada apan sobra ra sab nga ipa-impound.

Wa gyu’y laing paagi si Cebu City Mayor Tomas Osmeña pag-instill og desiplina sa mga motorista gawas sa pag-impound nga dili maki-angayon?

Nganong mo-counter flow man ilabina ang mga mag-motor? Ang rason kay traffic na kaayo dinhi sa Siudad sa Sugbo. Unya kining problemaha wa gyud masulbad sa gobyerno.

Mao bitaw nga kining uban bisag mga adunahan ug may daghang sakyanan nga upat ligid morisgo pagmotor kay mas paspas kay makalighot sa trapik pinaagi sa pag-agi sa gutter ug mo counter flow.

Bisan si kinsa tingali nga mag-motor unya bakante kaayo ang opposite lane unya nag-bumber to bumper ilang lane tungod sa traffic, mo-risgo nalang gyud pag-counter flow.

Bisan seguro kaming mga sakop sa media, posible nga kini maoy among himoon sa panahon nga motubag kami og mga alarma sama sa sunog ug mga dagku’ng krimen.

Pero sa tinuud lang kining pag-estrikto kuno hay ni Tomas sa mga mo- counter flow way kalainan sa ilang pagpatuman sa clamping ordinance.

Ayaw ko patoho-a nga wa silay gisantos human gi-clamped sa Cebu City Traffic Office (CCTO) ang mga issued government vehicle nga na-assign ngadto nila ni City Councilors Mary Ann Delos Santos, Sisinio Andales, Eugenio Gabuya nga kaalyado sa mayor ug ang private car ni opposition councilor Joy Pesquera niadtong wa pay Pasko.

Dili gyud ko motoo nga wa silay gipili kay dunay usa ka impluwensiyado nga nakimpitan ang sakyanan apan gi-areglo nilang Tommy.

Abir akong hagiton pagpakita sa publiko ang upat ka konsehal sa resibo sa CCTO nga naka-reflect ang gibayad nila sa clamping ordinance.

Akong kutloon ang mga pulong sa katigulangan nga ang kamatuoran dinhi sa ato mao nga “Kung langaw gani ang mo-agi sa lawa-lawa segurado gyud na’ng tapot.

Apan kung kabaw gani ang mo-agi, segurado gyud nga mabungkag ang lawa-lawa”.
* * *
Pagkasayang gyud sa 70 ka mga smuggled luxury cars nga ipa-bulldozer ugma ni Presidente Duterte.

Sumaa pa nga ang kantidad sa matag sakyanan gikan sa 5 million ngadto 20 million ka pesos.

Sa akong kuwentada mokita ang gobyerno og 350 million bisan kung i tag 5 million matag usa. Daghan pa untang mga nagkutoy nga tiyan ang mabusog.

Puwede sab unta kining i-service sa mga law enforcers pagbugtaw sa mga criminal ug mga sindikato.

Kung ipa public auction puwede’ng i-times 2 or ipa times 10 ang kantidad matag unit aron patagam sa mga smugglers.