Gerard Pareja
Pagabot sa mga compact discs (CD), miingon ang akong higala nga si Sawi Fox nga ma guilty kuno siyang mopalit niani kay pwerti man nianing mhala ug nga duna siyay mga kaila nga maglisud gani pagkaon ug katulo sa usa ka adlaw.
Mid 80s kining maong mga panahuna ug ang medium of choice niadto mao ang cassette tapes. Makapalit na ka ug tulo ngadto sa upat ka tapes sa presyo sa usa ka CD.
Apan ang cassette tapes, labi na ang gikan sa US ug uban pang bugnaw nga lugar dali madaut diri sa Pilipinas diin init ang atong temperature.
Daw dali mainat ug malanay kini kon patukaron mo sigi.
Ug kon di mo sad gamiton daw magtibugol kini.
Ug gagmay raman usab ang cassette tapes maong dali kining mawala. Hulaman kini ug di na mauli.
Ug kon iuli man gani bungol na ang tingog.
Ang plaka nga vinyl o plaka maoy naguna sa tape.
Apan hasul usab kaayo kadto. Kay kon di magara mataptan ug abug ug mountol na dayon ang imong dagum nga mo subay sa grooves niani.
Ug kon magsigue kag patukar mahilis sab ang imong dagum.
Dagku sad ang plaka ug kapoy bitbiton.
Dihang napalpak ang Laservision video disc sa Philips mi-shift ang ilang focus sa mas gamay nga “audio only” CD.
Pero samtang ga himo sla niani sa Holland. Ang Sony sa Japan gahimo sab diay niani.
Ug tuod man nag join forces ang duha.
Ang mga audiophile maoy una nilang target tungod kay ang presyo sa CD ug sa player niani dili man pang masa.
Mao nga ang una nilang convert mao ang Austrian conductor nga si Herbert von Karajan nga miingog: “Everything else is gas light.”
Pero dunay mga singer composer sama ni Neil Young wa mahimuot sa CD.
Kay alang kanila tumong sa recording mao ang pagkuha sa sound nga mogawas sa speaker inig patukar sa plaka. Apan ang ubang rockers sama ni Mark Knopfler sa Dire Straits pro CD.
Nagkanayon ang gitarista nga “I want the best. How about you?” Ug mao kini ang gihimong marketing cry sa CD marketing.
Ug tungod niini ang plaka sa Dire Straits ng “Brothers in Arms” maoy unang CD nga milabaw sa plaka ang halin. Ug bisan pa man ug nagkabarato ang production ang CD nagpadayong mahal ang baligya sa mga record companies niini. Pagka 1990s napatay sa CD ang cassette ug plaka.
Gatuo ang mga record companies nga wa nay kamatayon ang CD.
Apan tungod sa CD burner, MP3, i-Pod ug internet streaming ni minus ang halin sa CD. Matud pa sa mga audiophile dili makuha sa MP3 ang recording sa CD.
Apan quiber ang kadaghanan. Di ba maminaw man gihapon kitas radio bisag mokarat usahay ang signal.
Karong Hulyo, ang Best Buy nga maoy giingong gauna nga electronics retail store sa US dili na mamaligyag CD.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
