Dili kaha mo-grabe ang pinatyanay sa mga kandidato?

SUAREZ

Nakasabot ko sa Philippine National Police (PNP) ug Philippine Drug Enforcement Agency (PDEA) nga nagmakuli sila pagbutyag sa mga pangan sa mga narco politicians ning nagkaduol na nga Barangay ug SK elections.

Mas maayo nga dili ibutyag aron dili makabantay ug aron dili ma-jeopardize ang follow-up operations sa atong mga otoridad,

Ang nahitabong pagpusil-patay niadtong Biyernes sa kadlawon sa giingong “bagman” ni drug lord Franz Sabalones nga si San Isidro Barangay Councilman Neil Cañete Abella sa San Fernando paghatag kadto og warning niadtong mga narco politicians.

Apan mas nabalaka lang sab ko nga mas mograbe ang patay sa mga kandidato ning panahuna kay posibleng sakyan sa mga kontra-partido ang extrajudicial killing ilabina nga init ilang karera sa pulitika.

Niadtong Sabado sa hapon atol sa among programa’ng “Dialogue On The Air” sa DYSS Super Radyo among mga bisita nga mga opisyales sa kapolisan Supt. David Senior sa Cebu City Police Office, Supt. Reyman Tolentin tigpamaba sa Police Regional Office (PRO-7) ug Supt. Virgilio Bayon-on sa Cebu Provincial Police Office (CPPO).

Misugyot sila ngadto sa Comelec nga mas maayo gyud nga ipa-ubos sa drug test ang mga kandidato ug pakuhaon og clearance sa R2 (Intelligence Division sa PRO-7) aron masuta kung wa ba gyud sa drug watch list ang mga nanglansar.

Si Atty, Enerio Ocariza Jr nga maoy regional attorney sa Comelec-7 miingon nga mas maayong ipaabot kining maong sugyot ngadto sa ilang ulohang buhatan.

Ambot kung mosanong ba sab ang taga Comelec nga giwagtang naman nila ang requirement nga ipa drug test ang mga kandidato.

* * *

Medyo tungason kining sitwasyon ni lawyer – broadcaster Juril Patiño human na-file na sa korte niadtong Huwebes ang iyang kasong rape.

Sa court procedure, ministerial duty ni RTC Judge Marlon Moneva sa branch 20 pag-evaluate sa ebedensiya ug posibleng mo-isyu og warrant of arrest batok kang Patiño.

Akong tan-aw sugod karong adlawa, mahimong alegre ang sala ni Judge Moneva kay dunay mga motions o pleadings nga i-file sa kampo sa akusado aron pagpa-defer sa issuance sa warrant of arrest, arraignment ug trial kay ilang kumbatihon didto sa Department of Justice Manila pinaagi sa petition for review.

Ang kulba lang niini, kung i-insister sa huwes nga mo-acquire una siya og jurisdiction sa akusado nga nagpasabot nga ipa-priso una si Patiño ug ipa-arraign sa dili pa kini tugtan nga makaduso og petition for review.

In fairness hinoon sa akusado kinsa mibalik-balik sa pagpadayag nga inosente siya sa kaso, andam niyang atubangon ang kaso ug dili niya sibatan.

Kining kasong rape gud, ang kihante ug akusado ray nasayod sa tinuud nga sirkumstansiya.

Husgado nalay motimbang-timbang niining tanan. Pastilan kung gitumo-tumoan lang ang abogadong magsisibya.

* * *

Dili ingon ani kadali nga mapatuman ang bisan unsang sugyot pagsulbad sa problema sa grabeng traffic dinhi sa Metro Cebu.

Kung atong kopyahon ang Metro Manila nga nagpatuman sa number coding or color coding scheme apan kinahanglang tun-an kini pagtarong ug kinahanglang dunay komprehensibong dialogue sa tanang maapektuhan.

Maayong ibutang sa alimpatakan nga niining maong scheme daghan gyud mosupak kay dili tanang pamilya nakabaton og daghang sakyanan nga lain-lain ang color ug lain-laing plate number.

Asa naman ang atong mass transit system? Sama sa Bus Rapid Transit (BRT) ug Light Railway Transit (LRT).

Unsa may gidugayan pag-implementar sa BRT? Gipamulitika? O gitun-an pa kung pilay commission sa binilyong budget?