Pakig-sex maoy rason nga magminyo ang tawo

Medyo bastos paminawon ang title ning akong lindog karon. Apan kung buot gyud huna-hunaon insakto man sab. Hehehe.

Wa pa ko malimot sa resulta sa survey nga gipahigayon sa usa ka simbahan, ilang Pastor Bong delos Santos nga nagtribukar nga ang pakighilawas maoy unang rason nga magminyo ang tawo.

Ang uban mauwaw lang sa pa-prangkay kay kun pangutan-on sa rason nganong magminyo, ang itubag gusto nga makabaton og pamilya.

Hisgot na gani ta sa paglangkob sa pamilya, anaa gyud ang amahan, inahan ug anak o mga anak. Natural nga pinaagi sa pakighilawas sa magtiayon ug ubanan sa gasa sa Diyos makamugna gyud og mga anak. Di ba?

Nalingaw kaayo ko sa among programang “Dialogue on the Air” sa dySS Super Radyo niadtong Sabado sa hapon nga nagtuki bahin sa “Gugma ug Kaminyoon” isip pang-Valentines’ special.

Uban sa akong mga panelists sila si Regional Trial Court Judge Macaundas Hadjirasul, Asst. City Prosecutor Mary Ann Castro, manalalaban Elmer Mansanadez, Bernardita Pongan sa Cebu City Health kinsa usa ka marriage counselor og officer-in-charge chief nurse ug ang among kauban sa News and Public Affairs nga si Super Jasmin Vailoces.

Natagbaw gyud ko sa akong mga bisita kay way tihik-tihik nga mipabuhagay sa ilang mga kasinati-an sa gugma og “field of expertise.”
Si piskal Castro miangkon karong bag-o nga nakakita na gyud siya og pang-“lifetime partner” ug “ideal man” human sa pakyas niyang kaminyoon ug sa mga nanglabay nga “controversial relationships.”

Matud sa piskal nga ang iyang nakit-an nga binuhat maoy gasa gikan sa Diyos nga angay niyang ampingan. Apan wa niya itug-an kun si kinsa.
Si Judge Hadjirasul kinsa usa ka mapinanggaon sa iyang pamilya, miingon nga bisan silang mga Muslim gitugtan nga makabaton og upat ka asawa apan gipili niya nga usa ra gyud ang iyang kapikas.

Unang rason sa huwes, kay dili gyud kaya niya nga magdaghan og asawa tungod kay gamay rag suweldo silang anaa nanarbaho sa gobyerno.

Matud ni Judge Hadjirasul nga kun kongresista pa siya karon, mopasar siya og balaudnon nga kinsa kadtong mga Muslim nga nanarbaho sa gobyerno kinahanglang usa ray asawa aron dili matintal sa pangurakot sa kagamhanan.

Si Jasmin Vailoces kinsa abli sab kaayong mipadayag sa iyang kasinatian sa gugma, napugos pag-angkon sa kahanginan nga ang iyang pamanhonon nakaplagan niya sa Facebook ug hangtud nga milig-on ang ilang relasyon karon.

Dili sa ingon nga nanghadlok ko sa mga magminyo apan na-shock lang ko karong bag-o sa gidaghanon sa mga kaso bahin sa pagpaanular sa kaminyoon kay sa usa ka semana moabot og walo ka mga kaso ang ma-file sa korte taliwa nga way klarong bista sa mga huwes gikan sa kusog nga linog.

Giangkon ni manlalaban Elmer Mansanadez kinsa practicing lawyer nga alarming na gyud kaayo ang kaso sa pag-anular sa kaminyoon.
Ang unang rason tungod kay drug addict ang usa sa mga contracting parties ug kining sobra sa selos nga moresulta sa pagpangulata.

Miingon si Mansanadez nga sa iyang mga kliyente, 40 porsiento niini mga bana maoy kihante samtang 60 porsiento mga asawa.

Si Judge Hadjirasul nga naalarma usab sa maong gidaghanon, misugyot nga kinahanglang tarongon gyud sa mga piskal ang ilang pag-imbestigar kun wa bay “collusion” o magsabot-sabot ang magtiayon.

Pagsiguro nga way “collusion,” nanawagan usab ang huwes nga kun mahimo dunay 2nd opinion ang ipagawas nga findings sa mga psychologist o psychiatrist nga “psychologically incapacitated” ang respondent.

Apan si piskal Castro mipasabot nga way budget ang gobyerno nga mo-hire og mga psychologists ug mga psychiatrists.
Si Bernardita Pongan sa City Health wa sab makasabot nganong daghang magbuwag.

Nagtuo siya nga naingon ani kay ang usa ka contracting party igo rang napugos pagminyo ug kining problema sa kuwarta.

Iyang gipasabot nga numero uno sa ilang topic sa pag-seminar sa mga magpakasal mao gyud ang family planning.

Gitug-an usab niya nga daghan na gyud kaayong mga minor deedad nga nahimong inahan ug nataptan sa sakit sa “sexually transmitted disease” kon STD tungod sa pag-practice sa pre-marital sex.

Mao nga nakaingon ko nga mas maayo gyud ang kanhiay nga conservative type ang atong kababayenan.
Sukwahi karon nga liberated na kaayo nga maoy mag-una-una sa lalaki nga maoy hinungdan sa mga unwanted pregnancy.

Busa sa mga batan-on, kinahanglang maghinay-hinay og likayan kining mga butanga samtang nagkaduol na ang Valentines’ Day kay sagrado kaayo kini. Paabota ang insaktong panahon nga makabarog namo.

* * *
Akoy naluoy kang Eduardo Arellano, traffic enforcer sa barangay Lahug nga nasumbagan sa habal-habal driver nga si Ernesto Atwel niadtong sayo sa gabii sa adlawng Biyernes diha sa dalan nga crossing sa Gorordo ug Sudlon, Lahug.

Naluoy ko sa traffic enforcer kay usa ka dakong kabaw ang habal-habal driver ug klaro kaayo nga nahadlok si Arellano kay may angkas pa ang habal-habal driver nga batan-on nga bugoy-bugoy sad kay dagko kaayo og buslot sa dunggan nga may ariyos samtang si Arellano way back-up.

Mao nga dihang akong nabantayan nga nasakitan gyud si Arellano human nasumbagan sa nawong mao nga mirisgo ko og duol hangtud nga naglalis sila pag-ayo.

Unya dihang nakamatikod si Atwel nga sala gyud niya nga nakasumbag nangayo kini ug pasaylo apan wa dawata ni Arellano.

Magpasalamat lang sab ko nila ni Insp. Rex Campos sa Mobile Patrol Division nga dali kaayong nakarespondedihang among gitawgan ang 166 taliwa nga traffic na kaayo.
Natanggong si Atwel sa Mabolo Police Station unya pasakaan og kasong direct assault ug physical injury.

Gidakop si Atwel sa traffic enforcer kay mi-left turn kini paingon sa JY Square Lahug samtang gikan siya sa Department of Education in Central Visayas nga bawal gyud niadtong mga orasa.

Matud pa, si Atwel hambugero pa kaayo kay unang nagpaila nga usa siya ka pulis ug dihang naapiki nagpaila nga sakop sa Barangay Intelligence Network kon BIN sa barangay Apas.
Apan ang version sa habal-habal driver kay kuno gihapak iyang ulo mao nga iyang nasumbagan ang traffic enforcer. Apan ang traffic enforcer mihimakak.

Kun di pa lang abusado si Atwel ug mituman pa lang siya sa lagda sa trapiko, dili unta siya makasumbag ug dili unta siya matanggong.