Tamparusa dayon ang hubris, pagkadugay!

By: Lloyd Suarez September 02,2018 - 08:20 PM

Kanus-a man sagpa-on ni Presidente Duterte si Cebu City Mayor Tomas Osmeña?

Lisud kung kutob ra sa estorya.

Hambugero ra sab kaayo si Digong kay wa man lagi siya maka-ako pagpatay kang Peter Lim dihang mi-adto kaniya sa Malacañang human iyang gidiga nga drug lord ang negosyante.

Kadtong iyang pag-ataki ni Tomas, usa ra gyud ka paukyab ug pakulo sa iyang mga audience nga napasmo sa pagpinaabot kaniya.

Unya nako motoo nga isog ang taga Mindanao kung iyang tinud-on paglaparo ang kaliwat sa Kabisay-an ug Sugbuanon atubangan sa publiko.

Pero unsa man gyud ka tinuud nga nagpalakaw si Mayor Osmeña nga “drug protector” ang presidente?

Kung tinuud man kini, bisag kinsa tingali ulbo sab gyud ang kaspa, ilabina kung inosente sa pasangil.

Kung wa manabi si Mayor Osmeña kinsa may naghulhog sa presidente nga gidaut siya sa mayor?

Dili kaha si former City Mayor Michael Rama nga puwerte’ng sipsip ron sa presidente? O ba kaha si Michael Lloyd Dino nga pirmeng gipikhan sa mayor?

Ang nakanindot ra sab sa gihimo sa presidente daghan kitang naka-ingon nga mirisi ngadtong Mayor Osmeña kay nakabagat na gyud siyag tawo nga bastos og baba.

Abi man nako nga mokagat ug mosukol ang mayor sa presidente. Bahag man sab lagi ang ikog.

Nagpa-upoy-upoy hinoon sa iyang Facebook account kay tinuud man sab ang presidente nga mora’g si kinsa nga sobra ka hambugero, arogante ug sobra’ng bilib sa kaugalingon ug mora’g kinsang haring gangis nga nakatag-iyag Sugbo.

“Hubris” ka mayor. Sa Merriam-Webster Dictionary, “Hubris” means, a great or foolish amount of pride or confidence. Sa binisaya pa, sobrang hambog. Katilaw lagi.

* * *

With all due respect, maot ug bati kining tandem nilang Vice Mayor Edgardo Labella ug former City Mayor Michael Rama pagka mayor ug pagka bise mayor sa next year mid-term elections ubos sa Barug Team Rama ug PDP -Laban ngan nga wa pa ma clear si Rama sa iyang pagka drug protector.

May go-signal sa presidente kining maong tandem? O ba kaha ga buot buot lang si Rama aron mapugos ang presidente pag-clear kaniya?

Nganong di man kapa-abot sa insaktong proseso si Mike? Ang akong gipasabot, nga unta magpaabot siya sa double-checking sa atong mga otoridad nga siya “protector” kang anhing Tata Negro o Crisostomo Llaguno.

Karon man gud sensitibo kaayo ang mga botante sa isyu sa illegal drugs.

Dili kaha hinoon mang-iwit ilang grupo sa eleksiyon kung madayon ang tandem kay makuwestiyon baya ang seryosong kawsa sa presidente batok sa illegal drugs?

Way laing potential nga personalidad gikan sa ilang partido? Nganong dili man gyud ka sakripisyo si Rama?

Kung tinuud man nga mangampanya personal si Presidente Duterte kang Labella pagka-mayor, ayaw ko’g ingna nga dili nila i-uban-uban si Rama?

Nganong dili man sab ka insister ang partido pagwakli ni Mike ug nganong dili pa sila katangtang sa apelyidong Rama sa ilang partido?

Nganong dili man Team Labella inay Team Rama? Consensus ni sa partido or nagbuot-buot lang si Mike?

Subscribe to our regional newsletter

By providing an email address. I agree to the Terms of Use and acknowledge that I have read the Privacy Policy.
Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: dayon, hubris, pagkadugay, Tamparusa

Subscribe to our regional newsletter

By providing an email address. I agree to the Terms of Use and
acknowledge that I have read the Privacy Policy.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.