SUAREZ
Wa ko matingala nga medyo alanganin pa si Presidente Duterte nga mo-endorso og mga kandidato dinhi sa Sugbo ubos sa iyang partido sa PDP–Laban alang sa umaabot nga eleksiyon tungod kay karon pang petsa 29 sa Nobyembre ang deadline sa withdrawal and substitution.
Inig balik sa Presidente dinhi sa Sugbo karong Disyembre anhi na makita ang tinuud nga kolor ug insaktong kamada sa pulitika.
Pero ang nakaporke lang kay dunay mga scenario nga i-free zone ang Sugbo labi pa nga gipalihok sa Presidente ang makinarya sa iyang anak nga si Inday Sara nga nagmugna niining usa ka regional party nga mao ang Hugpong Ng Pagbabago (HNP) nga nag-endorso og mga kandidato nga kontra sa PDP-Laban.
Kinsay dili maglibog nga miingon si Inday Sara nga inig ka buntag iyang i-endorso ang kandedatura ni Vice Governor Agnes Magpale pagka-gobernador apan inig ka gabii sa pangampanya iyang ituboy ang kamot ni Gwen sa maong puwesto.
Daghan ang nagtoo nga mas bintaha kadtong i-endorso ni Presidente Duterte kay sa anak nga kuwang pa sa karisma sa pulitika.
Sa tinud-anay lang dunay advantage kadtong ipang-endorso sa Presidente apan dili garantiya nga mao gyu’y makapadaug.
Ang tanan daugon sa kuwarta.
* * *
Lahi ra gyud ang pag-obserbar sa Kalag-kalag karong tuiga kay medyo mingaw unya gamay ra ang mga tawo sa mga sementeryo ikomparar sa mga nanglabay’ng katuigan.
Posible nga tungod sa kataas sa bakasyon maoy usa sa mga hinungdan.
Apan ang dakung hinungdan mao gyud ang kalisod sa kahimtang sa katawhan gumikan sa grabeng kamahal sa mga palitonon.
Nikunhod man tuod ang presyo sa gasolina ug kurudo sa hinapos sa Oktubre pero uwahi na tungod kay natuok pag-ayo sa presyo ang mga konsumidor.
Sa laktod, wa makatigom sa Kalag-kalag.
Gani ultimo’ng pagpataud og suga sa gilubngan daghan ang wa makahimo kay naglisod gyud sa panahon.
Nitiyabaw man gani ang mga tigtaud og mga suga kay yabo gyud ang ilang bugasan.
* * *
Nanaglumba intawon sa pagbagulbol ang akong mga kababayan sa habagatang parte sa Sugbo sa ilang pagpanguli niadtong buntag sa Nobyembre 1 kay puwerte’ng trapika.
Ang normal nga biyahe gikan sa South Bus Terminal paingon sa amo sa Dalaguete molanat lang og duha ka oras.
Apan niadtong Kalag-kalag milanat og dul-an lima ka oras.
Diha nagsugod sa Minglanilla ang ilang kalbaryo paingon na sa Carcar.
Akong nahibaw-an nga dunay mga motorista nga nag-counterflow unya lumba’g paugat pun-an pa sa mga kalsada nga dunay duol sementeryo maoy hinungdan sa problema.
Hisgot naman gyud tag problema sa trapiko dunay communication nga nadawat ang Cebu Provincial Board gikan sa Malacañang nga gilabhan ang mga opisyales sa Minglanilla tungod gihapon sa problema sa trapik.
Ang maong suwat nga gipahatod ni ASEC Jaime Llaguno Mabilin, Head of Office, Presidential Complaint Center nga gisukipan sa letter complaint of
“Bayan Ko” Re: Follow up (Kapabayaan Ng LGU sa Minglanilla Cebu sa pagpapatupad ng Batas Trapiko lalo na sa mga abusadong habal-habal driver).
Ambot kung unsay mahimo ning maong suwat ang mga sakop sa Hunta Probensiyal?
Wa man gani kapatuman og total ban sa mga tricycle diha sa mga national highway.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
