SUAREZ
Maayong Pasko kanatong tanan!
Dili haom ug dili tukma ang termino nga manamilit nami kaninyong among mga readers nga nagsunod dinhi sa Cebu Daily News (CDN) human nakahukom ang top management sa Philippine Daily Inquirer Incorporated nga mag digital or mag on-line media nalang ang CDN sugod karong Enero 1, 2019.
Sa dayong sugod sa atong mga panlimbasug ning bag-ong tuig, wa namoy mapalit ug wa namoy makuptan nga newspaper nga Cebu Daily News gikan sa mga newsboy ug sa mga vendors kay wa nay mahitabong pag-imprinta.
Apan ang maayong balita anaa ra gihapon ang CDN ug inyong masundan ug mapakli ang mga panid niini sa inyo nang mga gadgets sama sa cellular phones, tablet, desk top, laptop ug uban pa.
Internet na gyud ang tanan.
Ang pangutana kung magpabilin pa ba gihapon kining akong lindog o column nga “Super Hirit” butang kini nga wa pa koy kasayuran.
Mag-agad ra ko sa desisyon sa top management nga ipabilin o dili.
Ingkaso nga dili ko maapil, inyo ra gihapon kong madunggan sa DYSS Super Radyo, Radyo sa GMA Cebu sa 999khz sa akong radio program matag gabii Mondays through Fridays 9:00 -11:00pm ug sa matag Sabado sa hapon nga “Dialogue On The Air” gikan sa alas 2:30-4:30pm.
Maka e-mail sab mo nako sa [email protected]
Hinoon akong napanglantawan sa unahan nga kining daku’ng hagit nga gi-atubang sa CDN karon moresulta kini sa among paglambo sa industriya.
* * *
Salamat kaayo ni Monsignor Roberto Boy Alesna Team Moderator sa Team of Pastor sa Saint Therese of the Child Jesus Parish Church sa Lahug nga naapil kanunay akong pamilya ug akong mga kauban sa media sa iyang mga panalangin sa mga Misa De Gallo.
Akong gisuportahan ang “light a bulb project” ni Monsignor Boy kay gikinahanglan gyud kaayo ilabina sa maintenance ug ang nagkaduol nga National Youth Day dinhi sa Sugbo diin gi-angkon niya ang pagpapuyo temporaryo sa 350 ka mga batan-on gikan sa lain-laing dapit sa nasud nga mosalmot sa dakung kalihukan sa Simbahan dinhi sa Sugbo sunod tuig.
Ang nakanindot sa liderato ni Monsignor Boy kay makita gyud sa mga parokyano kung asa paingon ang gi-amot kay maayong pagka-atiman ang Simbahan.
* * *
Akoy nahimoot sa akong programa’ng “Dialogue On The Air” niadtong Sabado sa hapon dihang nag-abot sa among broadcast studio sila si Land Transportation Office (LTO-7) Regional Director Victor Caendic ug ang manager sa Angkas Cebu nga si Arlet Villanueva ug mga Angkas Riders.
Tungod sa kahadlok nga pangdakpon ang taga Angkas sa mga operatiba sa LTO didto sa among complex daghan sa ilang mga riders/drivers ang wa molawos.
Nakasabot ko nga mikurog intawon ang taga Angkas kay tiaw muna pamoltahan sila og tag 6 mil pesos kay colorum unya ipa impound og tulo ka buwan.
Apan ang mga miadto didto naibtan intawon og tunok kay mipasalig si Director Caendic nga dili sila manakop niadtong tungura.
Samtang gipasabot sa opisyal nga dili gyud sila mosuspenso sa pagpanakop bisag Pasko kay sila maoy makulban sa kaldero ngan nga illegal gyud kini ilabina sa bag-ong ruling sa Korte Suprema.
Ang nakanindot ni Director Caendic kay mitambag pa ngadto sa taga Angkas nga modungop sa mga kongresista aron makakuha silag congressional franchise aron legal na ang operation sa Angkas.
Gitun-an usab karon sa taga Angkas ang sugyot ni Director Caendic nga mopasakay og libre ning panahon sa Pasko kay dili sila panakpon.
Ang Angkas management mitoon usab sa sugyot nga silay mobayad sa multa sa 28 nila ka mga sakop nga nadakpan sa joint operation sa LTO niadtong miaging simana.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
