Porbida gyud ning mag-coverage ta og Presidente sa nasud kay anaa ang kahasol ug kabudlay.
Hasol, kay estrikto kaayo ang seguridad unya kapoy ug budlay kaayo kay taas ang oras sa pagpangandam unya mubo ra kaayo ang oras nga itagana sa event nga iyang tambongan.
Ang pag-anhi sa Presidente kagahapon nakahasol kaayo sa tanang naapektohan ilabina kadtong napugos pagbaktas sa kalsada kay wa na pasudli sa mga sakyanan sukad pagka-Lunes ang dalan Escario, Osmeña Boulevard, M. Velez ug sikbit nga mga kalsada.
Sakripisyo kaayo namong mga tigbalita ug sa mga kawani sa gobyerno nga gi-require pagpatambong kay sayo kaayong nangmata aron sa pagpangandam sa coverage.
Pero naunsa na man ug kumusta na man kita human sa 28 ka tuig nga Edsa People Power Revolution? Duna pa bay relevance ug significance ang pagsaulog sa Edsa?
With all due respect sa organizing committee, medyo nihupas na man ang kainit sa katawhan paghandum sa selebrasyon sa Edsa.
Kagahapon, akong naobserbahan nga daghan sa atong mga kaigsoonan nga akong gikabagat nga walang pakialam sa kalihokan diha sa Cebu Provincial Capitol nga gipangulohan ni Presidente Benigno Aquino III.
Sa tinuod lang, kun wa gi-require ang mga kawani sa Kapitolyo ug mga estudyante pagtambong mahug nga gamay ra ang magtikaw-tikaw nga langkoban nila ni Presidente Aquino, mga Capitol officials, City officials, mga sakop sa militar, mga artista, mga dunay papel, organizing committee ug kaming mga sakop sa media.
Nawala na ang diwa sa Edsa 1 kay wa gyuy kausaban ang pagdumala sa nasud taliwa sa kawsa kaniadto pagpalayas sa diktadoryang pangamhanan ni kanhi Presidente Ferdinand Marcos?
O ba kaha ang batasan nato sa pagkalimtanon batok sa mga Marcos maoy nakapa-bugnaw sa kawsa ug krusada.
O ba kaha nakasabot na ang katawhan nga ang Edsa gipahimuslan sa mga Aquino ug sa mosunod nilang mga henerasyon alang sa ilang politikanhong interest sa nasud nga magpatuo nga sila ray angayang manglingkod sa Malacañang.
O ba kaha naluya na ang katawhan sa krusada kay ang pamunoan ni P-Noy nakig-alyado sa mga pamilya nga pro-Marcos kaniadto.
* * *
Karong Biyernes, Pebrero 28 mawad-an na kita og usa sa mga respetado ug ligdong nga huwes dinhi sa dakbayan sa Sugbo kay mo-avail na si kanhi Regional Trial Court Executive Judge Meinrado Paredes sa iyang early retirement.
Dili na gyud papugong si Judge Paredes kay gusto niyang i-avail ang sayo nga retirement aron siya makapahimulos.
Ambot kun duna pa bay huwes sama sa pagka-independente ug huna-huna ni Judge Paredes nga dili managana pagsaway sa mga hiwing binuhatan sa mga kadagkoan sa Korte Suprema.
Pagkakaron, wa pa koy nakit-an nga sama kaisog ni Judge Paredes kay mas pilion ang pagtago ug pagluom sa pagpadayag sa mga isyu sa hudikatura.
Nagkatawa lang ko niadtong Biyernes sa hapon dihang nakit-an ni Supreme Court Chief Justice Ma. Lourdes Sereno kinsa naintriga sa tent ni
Judge Paredes nga klaro kaayong nagsimbolo sa komunista kay may tatak nga People’s Republic of China.
Miresulta sa agik-ikay ug komedyahaay ang maong eksena dihang misulod si Sereno sa tent ug nakigtagbo kang Paredes.
* * *
Blangko pa gyud ang kapolisan hangtud karon kun kinsay mga responsable ug kinsay mastermind sa pagbanhig patay nila ni manlalaban Noel Archival ug mga kauban didto sa Coro, Dalaguete nga nag-usa na ka semana kagahapon.
Si Police Supt. Renato Malazarte, tigpamaba sa Task Force Archival miklaro nga wa pa gyuy bug-at nga kalamboan gawas sa iyang giingon nga
ila nang na-identify ang tulo ka mga sakyanan nga maoy gisakyan sa mga mamumuno.
Ila pang gisubay kun unsa gyud ang motibo sa krimen ug ingon man ang pagsubay sa posibleng kaso nga gihuptan sa abogado nga maoy hinungdan sa pag-ambush patay.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
