Publiko giawhag sa magmatngon para makalikay sa sunog; parte sa simbahan sa Talavera gilamoy sa kayo

Sunog sa simbahan sa Santa Cruz sa Barangay Talavera sa dakbayan sa Toledo ganinang buntag nakaguba sa parte sa bodega sa maong simbahan. | Contributed photo

DAKBAYAN SA SUGBU, Pilipinas — Gipahinumduman ang publiko ilabi na ang mga lumulupyo sa dakbayan sa Toledo na dili gyod kalimtan og paghulbot sa mga gipangsaksak na plug sa ilang mga kahimanan sa mga saksakan sa kuryente sa balay aron paglikay sa pagulbo sa sunog sa ilang mga panimalay.

Mao kani ang pahinumdum ni Fire Senior Inspector Paul Patrick Laude, hepe sa mga kabomberohan sa dakbayan sa Toledo, kaganina human nakahiagum og danyo tungod sa sunog ang parte sa simbahan sa Santa Cruz sa Barangay Talavera sa Toledo sa kasadpan na bahin sa probinsiya sa Sugbu.

“Kinahanglan na ibutang sa huna-huna nga matag gawas ninyo sa inyong panimalay kinahanglan na tanggalon og ibton ang mga gipanpansak na kahimanan sa balay sa mga pansakan sa kuryente aron makalikay sa sunog,” matud pa ni Laude.

Nagkanayon si Laude na kinahanglan sa karong panahona magbinantayon ug magigmat para makalikay sa disgrasya o sa sunog sa tanang panahon.

Ug dili lang kini buhaton karon kay Fire Prevention Month karon kun dili buhaton sa tibuok tuig, puno pa ni Laude.

Ang sunog na nakaaghat ni Laude sa magpahimango o pahinumdum sa publiko bahin sa paglikay sa sunog mao ang sunod na miulbo sa Barangay Talavera sa simahan sa Santa Cruz.

Matud pa ni Senior Fire Officer 1 (SFO1) Juan Abella, imbestigador sa kabomberohan sa Toledo, na basi sa Iyang pakisusi na ang sunog na napawong ra hinuon dayon tungod sa pagtinabangay sa mga lumulupyo sa dapit na duol sa simbahan sa pagpatay sa kayo na nagsugod didto sa bodega na parte sa simbahan.

Niingon si Abella na ang sunog nahitabo mga 10:14 sa buntag sa Lunes, Marso 11.

Si Abella niingon na ilang gitan-aw karon ang electrical misuse o sayop na paggamit sa kuryente ang maoy hinungdan na miulbo ang sunog.

Nahibaw-an pud ni Abella na wala ang kura paroko sa simbahan na nagpuyo sa kombento kay duna kiniy lakaw sa siyudad sa Sugbo. |dbs