Bombero nga shabu pusher?

Unsa ka tinuud nga dunay usa ka sakop sa Bureau of Fire Protection (BFP-7) nga nadestino sa Dumanjug Cebu ang gidakop didto sa Negros Oriental kay giingong namaligya ug shabu?

Akong nahibaw-an nga ubos karon sa police custody sa Guihulngan Police Station ang fire officer nga si FO2 Vicente Vergara ug gipasakaan na ug kaso kinsa nakuhaan ug 3 ka sachet nga gitohoang shabu atul sa buy bust operation.

Sa estorya kagahapon, nagpaabot pa sa commitment order ang kapolisan sa husgado aron ibalhin si FO2 Vergara sa Guihulngan City Jail.

Abi ba nako nga wa nay taga BFP nga badlungon. Paet!

Kanus-a man ipa-ubos sa summary dismissal proceedings si FO2 Vergara sa iyang mga labaw?

* * *

Pagkasalikwaot gyu’ng paminawon sa kawsa sa gobyerno nga nakigbatok sa mga illegal nga drugas kay samtang nanghingusog sa kampanya ang tanang mga ahensiya batok niini apan dunay usa ka non-governmental organization (NGO) nga nanghatag ug libreng syringes o dagum ngadto sa mga adik pagtusok sa nubain.

Ang nakaporke pa gyud kay gisuportahan nila ni Dra. Ella Tac-an sa Cebu City Health Office ug sa Mandaue City Health Office ang pagpang-apod-apod sa mga injection ngadto sa mga drug dependents.

Niadtong Sabado atul sa among programang “Dialogue On The Air” na-shock ko sa revelation ni Dr. Rene Joseph Bullecer sa Aids Free Philippines kay kining maong programa usa ka multi-million peso alang sa mga piniling nasud ug ang nakapaet pa gyud kay ang dakbayan sa Sugbo maoy gihimong “pilot area”.

Akong nahibaw-an nga gituyo kini aron pag-control sa pagkuyanap sa sakit nga HIV, hepatitis B ug C nga unang gikataho naggumikan kini sa pagbanos-banos sa paggamit sa itusok nga dagom.

Wa pa ko malimot niadtong among “Barangayan Program” sa Kamagayan diin among nahibaw-an nga bisag ang ginamit nga syringe nga gilabay na sa basurahan kuha-on gihapon sa laing adik unya ikagis sa semento ang tumoy unya limpiyohan ug ice water unya gamiton na sab.

Si Dr. Bullecer miingon nga dili ang sharing of syringe maoy nag-una nga hinungdan sa pag-grabe sa HIV ug ubang contagious diseases kun dili mao ang paghilawas o ang pakig sex sa lalaki ug lalaki ilabina sa nga ipa-agi ug anal sex ug oral sex.

Gani milakbit ang doctor nga dili sab luwas ang paggamit ug condom ning matang sa mga sakit.

Mao nga mikuwestiyon sab si Dr. Bullecer niining pundok sa mga pari nga nang-distribute ug mga condom sa Kamagayan.

Seryoso si Bullecer nga pa-imbistigahan ni Cebu Archbishop Jose Palma ang isyu sa distribution sa condom nga una niyang nahibaw-an nga gipangulohan sa duha ka mga pari.

Sila si Dra. Alice Utlang ug Ernesto Herrera II sa Cebu Office for Substance Abuse Prevention (COSAP) miingon nga sila mismo nakakita niining pagpang-apod-apod sa mga injection diha duol sa ilang opisina sa City Health Office unya klaro kaayo nga wa gyud estriktoha kay daghang mga minor de edad ang sayon ra nga makakuha ug matud pa magbalik-balik.

Si Atty. Mauro Licen legal counsel sa Philippine Drug Enforcement Agency (PDEA-7) nanawagan kang Dr. Tac-an ug sa NGO nga undangon na ang distribution kay dili lang si Dr. Bullecer ang mipagawas ug data nga dili ang sharing of needle/syringe ang nag-unang hinungdan sa HIV.

Magpasalamat lang sab ko nga gibalik kining surprise drug testing sa mga kawani sa gobyerno kay duna gyu’y mga adik.

Akong nahibaw-an nga sa City Hall dunay 2 ka mga kawani nga nag-positibo samtang 9 sa Capitol.
Maglaum ko nga ipadayon kini ngadto sa ubang mga ahensiya aron makaseguro kita kung wa bay double standard.

Bintaha gyud atong unahon ug silhig ang atong tugkaran una sa lain.

Unsa ka tinuud nga dunay upat ka mga empleyado sa Barangay Hall sa Lahug ang nanibat pag-drug test gawas sa 31 ka mga kawani sa Kapitolyo?

Akong sublion, ang mangalagad sa gobyerno kinahanglang dili adik kay ang adik kawatan gyud na ug wa gyu’y kaikog ug way kahadlok nga mohimo ug krimen.

Salamat nga dili mga adik sila si Cebu Governor Hilario Davide III ug Cebu City Mayor Michael Rama.

Dili ba sab mga adik ang mga mayor sa kalungsuran ug ang atong mga kapitan?

Unsa may gihimo niini sa taga DILG, Ombudsman ug PDEA sa mga nag-positibo? Kanus-a man kini panaktaka?

* * *

Congratulations sa akong duha ka mga anak nga nakakuha gihapon ug maayong records sa ilang academics sa Lahug Christian School sa gipahigayong recognition niadtong Lunes March 31 sa Ecotech Center.

Si Karl Anthony maoy 3rd honors sa grade 5. Si Karen consistent sab sa iyang performance sa grade 4. Wa lang siya makarga sa top 10 kay naglisud siyag apas tungod sa taas nga absent tungod sa kakulian sa panglawas sa miaging tuig nga napuno kita sa katalagman.

Again, congrats mga anak and enjoy your summer vacation. Ingat lang and God bless!