Alimpos, advance party sa bagyo sa kuwaresma?

Ambot kung unsay mensahe sa Ginoo nga adunay mga katalagman nga mahitabo samtang dunay mga dagkung religious activity?

Sa kusog nga linog niadtong October 15, 2013 wa kitay trabaho ug way klase kay gideklarar kadto nga holiday tungod sa kalihukan sa atong mga kaigsoonang mga Muslims.

Unya kagahapon nga duol na ang Holy Week natong mga Katoliko, nabulabog ang mga residente sa barangays Mambaling Cebu, City ug San Roque Talisay City human giigo sa kusog nga “alimpos”.
Daghan ang na shock sa hitabo kay unang gitoho-an nga dunay sunog.

Dunay mga panimay nga natang-tangan sa mga atop ug bisan ang atop sa ilang sports complex sa Mambaling.

Speaking of Mambaling Sports Complex, nakadawat ko ug reklamo karong bag-o kay sukad niadtong Nobyembre wala na padula-i sa mga gustong mag-basketball kay gihimong parking area ug gihimong talyer. Basig kadtong maong alimpos maoy pagdukol kang kapitan Wilfredo Go.

Balik sa alimpos kagahapon, sumaa pa sa mga residente nga kusog gyud kaayo ang hangin nga nagtuyok kay ang mga sin nga nanglupad daw sama sa kinumot nga papel.

Ambot lang gyud kung mao bay pasi-una nga mensahe sa Ginoo human gideklarar sa Korte Suprema nga constitutional ang kontrobersiyal nga “Reproductive Health Bill”.

Panahon na gyud nga mamalandong kita kay unpredictable na gyud kaayo ang dagan sa panahon karon.

Pero alang nako di na gyud kita angay’ng mabalaka niining bagyong “Domeng” nga posibleng moigo karong hapon kay mihuyang kini ug gi-downgrade na kini ngadto nalang sa tropical depression basi sa pahibawo ni Director Oscar Tabada sa PAGASA VISAYAS.

Tinuud dunay mga baybayon nga posibleng ig-on sa mga dagkung balud o “surge” apan puwede kining likayan pinaagi sa pagpahikling sa mga nagpuyo daplin sa dagat ug did-an gyud ang mga mananagat sa pagpangisda.

Hinoon wa gyu’y komo nga mangandam kita ug atong awhagon kadtong mga nagpuyo sa mga landslide-prone areas nga mobakwit sa mas luwas nga lugar.

Mas malipay pa kita nga madayon kining bagyong “Domeng” aron uwanon kita ug dunay tubig kay medyo nag-uga na gyud ang atong mga umahan.

* * *

Mabasol gyud ug apil ang atong kapolisan ug ang kapitan sa barangay Tolo-tolo lungsod sa Consolacion niadtong nahitabong pagpanigbas nga binuhatan sa usa ka deperensiyado sa pangisip ngadto sa mga madre sa monasteryo sa Ave Maria Franciscan Sisters of Immaculate sa barangay Sacsac, Consolacion.

Ang duha ka mga madre nga sila si Sister Fe Bandico Cañete ug Sister Mercedita Enjada Almacin mipabuhagay intawon sa ilang kahiubos batok sa mga pulis ug kapitan kay bisan ilang gihangyo kaniadto nga ipasulod sa mental ward sa Vicente Sotto Memorial Medical Center si Ramilo Cordillera Tampuz apan wa gyud lihoka.

Giingnan ang mga madre sa mga pulis nga dili sila makahimo ug aksiyon kay way gihimong krimen.
Kung tinuud man, nagpasabot gyud kung unsa ka lousy ning atong kapolisan sa Consolacion.
Angay ni silang pang-imbistigahon ug silotan ni S/Supt. Noel Gillamac atong Cebu Provincial Police Director.

* * *

Haskang paita gyud niining uban nga bisag kapoy na ang lawas gumikan sa kahubog, mo-drive gihapon sa sakyanan.

Ingon ani ka abusado ang uban kanato nga sayon-sayonon lang ang kinabuhi sa mga inosente.

Dili pa pa-igo nga gipasakaan na ug kasong reckless imprudence resulting in double homicide ug kasong damage to property si Gerard Dela Cruz, ang anak sa opisyal sa PAGCOR nga miangkon nga naka-inom ug nakatug nga mibangga sa nag-angkasay ug motor sa Salinas Extension Lahug niadtong Sabado sa buntag nga mga tawo usab sa iyang amahan.

Way plano ang taga LTO, LTFRB, mga traffic czar nga mag-umol ug special task force aron mo-monitor ug modakop dayon niining mga gikan nga nag-inom sa mga bay kahilayan nga momaniho pa ug sakyanan?

* * *

Nahimoot kaayo ko nga nag-obsebar sa usa ka ginang nga nagsige’g patingog sa iyang dala nga “teleng-teleng” diha habig sa may University of Cebu, Osmeña Boulevard niadtong miaging semana paingon nga mag-alas 3:00 sa hapon.

Nalingaw gyud ko nga nagtan-aw kaniya kay seryoso kaayo unya wa siya’y dalang baligya sama sa ice cream, ice drop o ba kaha religious images nga maoy gipahinungdan sa iyang pag-“teleng-teleng”.

Mao nga miduol ko kaniya ug nangutana kun unsay tumong sa iyang pag-“teleng-teleng”.
Sa sinugdanan nagpaila siya nga maoy presidente sa ilang grupo sa mga sidewalk vendors ug iyang gipasabot nga ang iyang pag-“teleng-teleng” maoy pagtubag sa ilang “three o’ clock habit” nga nagpasabot nga magtinabangay na silang tanan sa pagpanglimpyo.

Nasibot gyud kaayo ko kay wa maglangay ang iyang mga sakop naglumba sa pagbitbit ug silhig ug dustpan ug nanglimpiyo sa ilang tagsa-tagsa ka lugar ug maayo kaayong pagka-buwag ang mga basura.

Kung parehas pa lang ang tanang nagpuyo nga andam motabang, pagkalimpiyo kaha sa atong palibot ug way lapas sa tawo nga mga basura nga nagla-undok sa atong kadagatan.