Happy New Year kanatong tanan!
Duha ka tulog na lang, ato nang sugaton ang bag-ong tuig 2020 nga puno sa mga pangindahay
ug kadasig ug hingpit na natong biyaan ang 2019, tuig nga tugob sa mga hagit ug mga pagsuway sa atong tagsa-tagsa ka kinabuhi.
Apan magpasalamat gihapon kita sa mga panghitabo sa 2019 kay kadto maoy gamiton natong gabayan pagpadayon sa atong mga paningkamot sa laing bugno sa kinabuhi niining madangog nga kalibutan.
Naglaum ko nga mas molambo pa gyud kita ug mas baskug ang atong mga panglawas.
***
Sugaton kita og good news karong January 5 kay ipatuman na ang 18 pesos nga increase sa suweldo sa mga minimum wage earners dinhi sa Central Visayas.
Apan kaluhaan sab kini og bad news kay may usbaw nga tag tres (3) pesos ang presyo sa gasolina ug ubang mga produktong petrolyo subay kini sa pagpatuman sa TRAIN Law part 2.
Si Philip Tan sa Regional Tripartite Wages and Productivity Board (RTWPB-7) miklaro nga managlahi ang increase dinhi sa Central Visayas kay mas dagku didto sa Tagbilaran City, Bohol nga tag 22 pesos.
Laing kalainan kay ang maka avail sa 18 pesos nga usbaw mao ra kadtong mga kawani sa kompaniya nga miabot og napulo ka mga empleyado o sobra pa. Apan kadtong mga kompaniya nga ang trabahante igo ra’ng miabot og siyam o paubos, igo ra’ng pun-an og 8 pesos ilang suweldo.
Pero ambot lang kung mo tuman ba niini ang mga kompaniya ug di ba mangayo og exemption sa Department of Labor and Employment (DOLE) kay di gyud makaya.
***
Ang mga experto ug mga negosyante miingon nga mopadayon pagsulbong ang dagan sa ekonomiya sa nasud sa tuig 2020 ilabina dinhi sa Sugbo tungod kay ilang nakita nga seryoso ang Duterte administration pagpatuman sa mga infrastructure projects, paggukod sa mga kurakot sa gobyerno ug pagmintinar sa kahapsay ug kalinaw.
Gawas niini, si Tan mipasabot atol sa among programa’ng “Dialogue On The Air” sa DYSS kagahapon nga mas molambo gyud ang negosyo kung silang mga magpapatigayon mo-level up usab sa technology sama sa pag-adopt na og online business.
Ilang namonitor nga daghang mga nag-abang sa mga dagku’ng mall ang mi-undang na ug nanirado tungod kay alkanse gyud sa negosyo kay pakyas pag level up sa ilang mga technology.
***
Makaluya ang sunog kagahapon didto sa Sitio Kinalumsan Barangay Canjulao sa dakbayan sa Lapu-lapu human mi-ulbo ang mga naka stock nga mga firecrackers.
Luoya gyud sa pamilyang Berden nga maoy tag-iya sa mga pabuto kay wa’nay itinda pagsugat sa bag-ong tuig ug way income ang pamilya.
Apan suwerte pa sila kay way namatay kanila.
Wa gyud magdahom ang kabanay nga mahitabo ang sunog kay sila mismo nag-amping kanunay.
Apan mao lagi na nga bisag unsaon pag-amping vulnerable gyud sa disgrasya kay peligro man gyud sa kinabuhi ang pulbura.
Mao nga unta karong Martes sa gabii sa pagsugat sa New Year likayan nalang gyud nato ang pagduslit og mga fire crackers ug pyrotechnics.
Lakip sa akong gilauman nga unta magpaka responsable ang tanan nga dunay armas nga di gyud gamiton sa pagpabuto kay tingalig maunay pa ang mga miembro sa pamilya.
Mas bibo man tingali nga sugaton ang bag-ong tuig sa matag pamilya pinaagi sa pag-ampo ug pagpinasayloay!
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
