Unsa ka tinuod nga nasakpan nilang Gov. Hilario Davide III ug Vice Gov. Agnes Magpale ang giingong mga kuwestiyonableng transaksiyon ni Evelyn Senajon sa Capitol Provincial Social Welfare and Development Office (PSWDO) nga maoy hinungdan nga siya gi-relibohan?
Akong mga tinubdan sa Kapitolyo, mihatag og lain-laing version sa hinungdan nganong gipulihan karon si Senajon kang manlalaban Mark Tolentino.
Unsa katinuod nga gi lifestyle check karon si Senajon kay matud pa nakapatukod og bag-ong bay unya nakapalit og high-end nga sakyanan human sa bagyong “Yolanda”?
Dunay mga tinubdan nga nagbutyag nga nag-overpricing si Senajon sa mga canned goods nga gipang-apod-apod sa mga biktima sa bagyo dihang mihimo og lina-in nga canvass ang ubang mga sakop sa Bids and Awards Committee (BAC).
Tinuod bang adunay supplier nga gipa-deliver ni Senajon og mga canned goods bisan wa pay approval sa mga isuporta nga mga dokumento?
Pero in fairness ni Senajon, iyang mga kauban mitug-an nga nag-abang ra intawn og panimay ang opisyal ug dunay sakyanan nga kagang-kagang.
Si Senajon nalipay nga siya gipulihan aron maka-concentrate na sa “early childhood care and development program.”
Alang nako, kun tinuod man kining mga negatibong istorya mas maayong imbestigahon siya ug silotan.
Mas makaayo ni Senajon nga siya imbestigahon aron makapanalipod sa insaktong forum kaysa buko-bukohon siya sa mga opisyal sa Kapitolyo.
Kung naproblema si Governor Junjun kun kinsay modumala diha sa PSWDO , mas maayong testingan niya si Ma’am Rosalinda “Rose” Jaokin sa kasaligan ug makamao.
* * *
Nakamao gyud si manlalaban Inocencio Dela Cerna nga wala iyang pangan ug wala iyang pirma sa hangyo ngadto kang Justice Secretary Leila De Lima nga ang Department of Justice Manila maoy mo-conduct sa preliminary investigation sa kasong multiple murder ug frustrated murder sa iyang mga kliyente nga taga Highway Patrol Group in Central Visayas (HPG-7) kinsa maoy gipangkiha sa taga National Bureau of Investigation in Central Visyas pag-ambush patay nilang manlalaban Noel Archival ug mga kauban.
Ang iyang gipa-pirma sa request for inhibition sa Provincial Prosecutor’s Office mao mismo ang mga respondents nga sila si Senior Supt. Romualdo Iglesia, Chief Insp. Eduardo Mara, Senior Insp. Joselito Lerion, SPO4 Edwin Galan ug PO1 Alex Bacani.
Apan dili ikalalis nga ang wordings ug tenor sa pleading trabaho sa abogado.
Wala na himoang rason ni Dela Cerna, nga gikonbikto na sa mga Sugbuanon ang iyang mga kliyente.
Ilang gipasanginlan si Cebu City Councilor Nestor Archival kinsa igsoon ni Atty. Archival ug maoy complainant nga migamit gyud og impluwensiya sa maong kaso.
Ilang napanglantawan nga dili sila maka-angkon og patas nga imbestigasyon ug tratamento dinhi sa Sugbo tungod sa pagka-impluwensiyado sa City Councilor.
Pero akong usbon nga presumptuous ra sab kaayo si Dela Cerna sa mga piskal sa probinsiya sa Sugbo nga wa gani magdawatan og allowance gikan sa Cebu city government.
Gawas pa sab, ligdong man ang mga naglangkob sa investigating panel nga moresolbar og mga kaso basi lang sa ebidensiya ug balaud ug dili gumikan sa impluwensiya sa mga Archival.
Hinoon, miingon si Provincial Prosecutor Pepita Jane Petralba nga mag-agad siya sa mando ni Secretary De Lima apan padayon ang pag-take effect sa subpoena nga g-isyu sa investigating panel nga nagmando nilang Senior Supt. Iglesia et al pagtubag sud sa napulo kaadlaw.
Konbinsido ang mga suspetsado nga lig-on ang ebidensiya batok kanila?
* * *
Mi-respeto ko sa atong mga amigo sa kawsa nga mipahigayon og rally batok kang US President Barack Obama niadtong Lunes ug kagahapon nga state visit dinhi sa atong nasud ug misupak sa napirmahan nga Enhanced Defense Coordination Agreement kon EDCA tali sa gobyerno sa America ug Pilipinas.
Sigurado ko nga ang tanang isyu ug rason sa pagsupak nila sa EDCA hinuktokan kini sa America ug Pilipinas aron paghimo og mga lakang nga dili na mausab ang mga abuso kaniadto sa ilang mga sundalo samtang anaa dinhi sa nasud.
Pero para nako makatabang kaayo ang EDCA ug wa koy pagsupak kun ibalik ang base militar sa USA dinhi sa Pilipinas kay dako kini og ikatabang sa atong pwersa pagdepensa aron magkinto sab ning taga-China nga nangilog sa West Philippine Sea.
Sumaa gud igo rang nangyugpos ang atong militar dihang gibombahan sila ogtubig sa pwersa sa China.
Gawas niini, makapaspas og samot ang tabang sa America panahon nga dunay dagkong katalagman nga moabot dinhi sa ato.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
