Kung bati ang misa alkanse ta paghulog sa sibot!

Nakadayeg kaayo ko sa mga wali ni Monsignor Achilles Dakay sa iyang mga misa matag Domingo sa hapon (5:30) diha sa Our Lady of Saint Therese Parish Church sa Barangay Lahug kay gawas nga lonlon Binisaya ang lingguwahe, mosibo ug motukma gyud sa mga gospel ug dunay mga maayong pagtulun-an.

Mas nindot paminawon ang misa nga duna gyud ta’y mapupo buwahan inig uli sa tagsa-tagsa ka panimay dunay masaw-an ang pamilya.

May nalang dili maalkanse sa paguwapo, paguwapa, gasolina ug labaw na’ng dili maalkanse paghulog sa sibot.

Tinuud sa kataas na sa iyang edad may deperensiya na ang panan-aw sa mata mao nga maglisod nag basa sa gospel pero inig wali puwerte sa’ng tul-ida sa mensahe.

Sama sa iyang paghisgot niadtong miaging Domingo nga nagpasabot sa pagka wa nay bili sa asin kung kini mawagtangan na sa iyang kaparat ug milawos sa diskusyon nga kitang mga layko sama sa asin nga moparat gyud kini nga maoy magdalag lami sa sud-an.

Nga nagpasabot nga kita’ng mga sakop sa Simbahan nga kanunay’ng anaa mitambong sa mga misa, kinahanglang magpakaparat ug magdalag dan-ag sa mga miembro sa pamilya, sa mga silingan ug sa ubang katawhan nga nahisalaag sa maayong direksiyon.

Gawas niini, sa lain niyang misa, diha say mga bug-at nga pulong si Monsignor Dakay bahin niining mga tawo nga sobra ka bintahoso sa iyang isig ka-ingon.

Matud niya nga dunay duha ka klaseng tawo nga “dalo.” Si “hangol” ug si “hakog.” Ang “hangol” dili gyud manghatag sa butang nga bisag nanghinobra na kaniya pero ang mas grabe mao ang “hakog” kay angkonon ang butang nga dili iya.

Diha sab toy higayon nga si Monsignor Dakay misaway sa katawhan kay matud pa niya buotan kaayo sa adlaw’ng Domingo kay manimba man pero gikan sa Lunes ngadto sa Sabado haskang salbahisa.

Kini ug daghan pa nga mga maayong pagtolon-an ni Monsignor Dakay sa katawhan.

Hinaut pa nga dunay daghang Monsignor Dakay sa simbahan kinsa magsaulog sa iyang ika 60 na ka tuig sa iyang pagka-pari karong Abril 23.

* * *

With all due respect, dili kaayo ko intresado nga mokuwestiyon sa mga politiko nga ipa-apil ilang pangan ug dagway pag-imprinta sa nahuman nga mga proyekto, sakyanan ug mga cards.

Kay sa tinuud dili man sab ni garantisado nga maoy makapadaug kanila. Makapa-negatibo man gani hinoon sa ilang political career kay way delicadeza bisag dili ilang kuwarta ug gidid-an na sa balaud human napasar niadtong 2016 ang Anti-Epal Law.

Ang importante alang nako mao nga ang ilang mga proyekto ug mga programa makabenipisyo sa katawhan ilabina gyud ang mga programa parte sa panglawas.

Sama sa Malasakit Center nga klarong gigamit sa pamulitika ni Senador Bong Go ug sa ubang mga politiko nga mibutang og ponto sa mga pampublikong hospital sama diha sa Vicente Sotto Memorial Medical Center.

Ang ako lang sab unta ba sa atong mga politiko samang Govenor Gwen Garcia dili magpasulabi’g react sa gipublikar dinhi sa CDN Digital kay tinuud man ang isyu.

In fairness namong mga sakop sa media, wa man sab maka-ikyas sila si kanhi Governor ug karon Vice-governor Junjun Davide ug kanhi Vice Governor Agnes Magpale nga nag-practice og Epal niadto.

Ambot unsa pud ka tinuud kining akong nadawat nga text nga nasobrahan si Gov Gwen sa iyang pag-desiplina sa usa ka kawani sa Kapitolyo nga iyang gipasuspenso dayon og duha ka buwan nga ang sala kay wa dayon maka-ayo sa linya ug wa dayon makapasiga sa suga sa iyang opisina?

* * *

Maayo kay naka-decide na si Governor Gwen Garcia nga kadtong dili Sugbuanon nga gikan sa laing mga nasud nga posibleng dunay coronavirus nga mo-agi diha sa Mactan Cebu International Airport (MCIAA) dili nalang ipang-quarantine ug papaulion nalang sa ilang tagsa-tagsa ka probensiya.

Atong dawaton ang kamatuuran nga dili gyud nato kaya kining problemaha kay daghan kaayo kitag mga pagkuwang sama sa facility duol sa among complex sa GMA nga maoy evacuation center.

Dili nalang gyud ta patuga-tuga.

Sama sa akong giingon ato gyu’ng pangayoon sa Diyos nga pakgangon Niya kining maong sakit nga makatakod ug Iya kitang protektahan.