Way plano ang Ombudsman pag-imbestigar kang Senajon?
Dunay laing mga isyu nga atubangon si kanhi officer in charge Provincial Social Welfare and Development Officer diha sa Kapitolyo nga si Evelyn Senajon.
Gawas sa kwestiyonableng pagpalit sa P5 million nga sardinas nga way pagtugot sa Bids and Awards Committee sa Capitol, ang news source nagbutyag nga dunay kapin usa kagatos ka mga sinako nga imported goods nga iyang gipanagoan nga nangabaho lang.
Iyang gikwestiyon nganong nangabaho man ang mga sinakong bugas nga unta daghan ang biktima sa bagyong “Yolanda”.
Unya dunay mga vitamins nga giingong na-expire na unya gipang dispatsar didto sa Asturias.
Sama lagi sa akong giingon nga kinahanglang imbestigahon nilang Gov. Hialrio “Junjun” Davide III ug Vice Gov. Agnes Magpale si Senajon aron maklaro ning tanan.
Kun maalanganin sila si Gov. Jun pag-imbestigar kay kaalyado sa politika si Senajon kinahanglang mokiha gyud sa Ombudsman kadtong dunay personal knowledge sa mga tinunto ni Senajon.
Pwede sab nga mopahigayon og fact-finding investigation ang Visayas Ombudsman ug mohimog lifestyle check kang Senajon.
* * *
Gipasabot ko sa taga-Task Force Archival kagahapon nganong napakyas sila si PO3 Norman Anos pagdakop kang PO1 Alex Bacani, ikalimang suspetsado pag-ambush nilang manlalaban Noel Archival kinsa midali pagpagawas sa Mitsubishi Strada color gray sa Off-Road Autoshop niadtong Marso 20.
Matud pa nga nauwahi sila si PO3 Anos pag-abot sa autoshop niadtong higayona ug paspas kaayong nakapadagan sa sakyanan si PO1 Bacani.
Kagahapon ang National Bureau of Investigation miduso ug dugang ebidensiya nga usa sa mga suspetsado nga si Chief Insp. Eduardo Mara migamit sab ug impounded vehicle atol sa pag-ambush patay nilang Archival niadtong Feb. 18 nga way kalainan sa gihimo nilang Supt. Romualdo Iglesia ug Insp. Joelito Lerion.
* * *
Pagka dakong insulto sa kapolisan dinhi sa Central Visayas kay nabiktima sa “bukas kotse gang” mismo si Police Regional Office in Central Visayas director, Chief Supt. Danilo Constantino didto sa “AA Restaurant” sa Pusok, Lapu-Lapu City niadtong miaging semana.
Iyang service vehicle gi-lungkab ug nakuha ang mahalong bag sa iyang misis ug ang sulod sa bag nga mga alahas nga unang report mobalor matud pa og tunga sa milyon ka pesos.
Apan ang gidiga mobalor lang sa P12 mil pesos nga cash, tulo ka cellphones ug usa ka iPad ang nadala sa mga suspetsado.
Si Senior Supt. Armando Radoc, hepe sa Lapu-Lapu police nagtuo nga mga local boys ra ang responsable sa krimen ug suma pa, dunay footage sa CCTV camera ang ilang nahipos sa mga responsable.
Maglaum ko nga di magpasagad og dakop sila si Radoc sa mga inosente.
Pwerteng paeta na gyud rong panahuna kay wa nay kahadlok ning mga hilabtanon.
Nganong migrabe man tuod ang crime against property ning mga panahuna? Tungod ba kay inutil pagsulbad ang atong kapolisan?
Dinhi lang sa dakbayan sa Sugbo, biktima sab sa lungkab sa iyang bay sa barangay Guba ning Siyudad si Kauswagan, Lanao Del Norte Mayor Rommel Arnado diin gibana-bana nga mobalor ug sien mil ang kantidad sa mga alahas nga nakuha.
Gawas niini, ang service motorcycle nga Honda XRM 110 CC color yellow ni Super Allan Majait nga iya sa GMA Network nga may plate number GI 3575 gi-carnap diha duol sa Cebu City Hall ug hangtud karon, wa pa masulbad.
Na-carnap sab ang issued motorcycle ni Sir Leonie Obod nga Honda Wave 100 CC color blue nga iya sa News Coop diha sa Guadalupe Coop.
Maglaum ko nga masulbad ning mga kasoha ni Cebu City Police Director Noli Romana.
Anhi masukod kung insakto ba si Mayor Michael Rama kun epektibo ba si Romana kinsa maoy iyang gipamugos nga mahimong City Police Director.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
