SONA videos

Ambot kon unsay inyong expectations sa ika limang SONA ni P-Noy. Na-anad na kos iyang paugat ug gahinam-hinam kog birada nga molaban sa DAP nga gi-diklarar nga unconstitutional sa Supreme Court.

Apan in passing ra kini niya gihisgutan. Murag in minor key ang ikalima niyang SONA kon itandi sa unang upat. Tingali mao kini ang paghangus sa runner sa di pa siya muhatag sa iyang katapusang hunat pa-ingon sa finish line. Next year na ang finish line.

Video. Ang stand-out element ning maong SONA mao ang pag maayong pag gamit sa video. Mga video nga maayo pagka-himo ug nga midiretso pagsulti ug pagpasabot sa audience kon unsay nahatag sa gobyerno ni P-Noy sa mga lain-laing sector sa Pilipinas. Ang kining maong mga video mi-underline sa usa sa mga strong traits ni P-Noy: ang iyang pagka-suave media communicator.
Ang mga tao sa luyo ning maong mga video angay tagaan ug national artist award kay gawas nga limpyo kini sila pagkahimo dili mo mamatikdan sa ilang padagan ang pagka propaganda. Walay sloganeering ug anthemic music o musical score.

Usa sa mga video mipakita og inahan sa usa ka banay nga gi-relocate gikan sa ilang pinuy-anan sa suba ngadto sa mas layo nga lugar human sa bagyong Ondoy. Duna say video sa mga graduates sa TESDA nga naka-trabaho na. Naka-ingon ko nga utokan gyud ang naghimo ning maong mga video kay kahibaw sila mamili sa ilang subjects ug dili sentimental ang ilang treatment.

Ang usa sa mga graduates sa TESDA pananglitan dunay problema sa iyang tiil apan gipakita nga articulate kini ug maayo mosulti ug mao nga nagtrabaho na kini sa call center.

Maingon ta usab nga gender sensitive o kontra stereotype ang mga naghimo niani. Kay ang laing TESDA graduate nga gi-feature usa man ka babae nga mikuha og automotive ug nga karon ga-trabaho na sa Toyota.

Ang mga pulis sad nga misikup og mga myembro sa Martilyo Robbery Gang sa mga malls sa NCR puros mga babaye. Ug ang produkto sa education usa ka sakop sa tribal minority sa Zambales.

Usa sa mga low points ni P-Noy mao ang pag responde sa mga kalamidad. Ang mga survivors ra sa Yolanda maoy maka-sulti kon tinuod ba ang successful rehabilitation sa ilang lugar kay mao man kiniy gisulti sa presidente ning maong SONA. Wala may video production nga gipakita ning maong punto sa iyang diskurso.

Sa katapusang bahin ning iyang pagsulti mikalit pagka senti ang presidente ug sige kining gituk-an ug kahilakon nga gahandom sa iyang ginikanan nga puros gi-isip nga mga bayani. Naka home run gihapon si P-Noy pero daw nihinay siya karon. Tungod tingali kay wa na siyay kontra nga kusgan kay gipanangtang ug gipanghipos naman kini.