Matud pa, may kamatuoran ang kada mitos (myth) apan gitabunan kini sa mga pakapin, sa mga palami nga gipatong niani nga daw icing sa cake. Pun-an pa sa mga tinago nga kahulugan ug ingon sa mga nagka lain-laing tumong sa mga mosuway pag asoy niani.
Sa Kobane, sa tungang silangan may bag-o karon nga legend nga nahimugso nga daw mokuyog sa mga sugilanon nila ni Princesa Urduja ug sa mga Amazon.
Gihasi karon ug gihulgang kuhaon sa ISIS (ang militanteng Islamic State of Iraq and Syria) ang Kobani nga kang kansang mga molupyo mga sakop sa tribu nga Kurds. Daw nahurot-hurot na ilang mga kalalakin-an didto sa pakigsangka sa mga ISIS mao daghan na sa ilang mga kababayn-an ang misulod sa ilang military.
Ang uban kanila mi-silbe lang isip police nga bantay sa kalinaw sulod sa mga lungsod nga wala pa maapektuhi sa gubat. Apan duna usay uban kanila nga tua gayud sa firing line.
Ug dinhi ning maong sitwasyon nahimugso ang legend o mitos ning gitawag nilag “Angel of Kobane.” Gihinganlan siyag si Rohana. Ug nagtubo ang mga sugilanon kabahin niya sa social media. Dunay taho nga nakapatay siyag 100 ka ISIS militants. Duna say taho nga namatay siya sa usa ka ingkwentro.
Duna man guy usa ka maanyag nga volunteer sa Kobane nga gasul-ob ug military uniform. Gi post kini sa Twitter duha ka bulan human siya mitikang sa panagtapok sa mga volunteer fighters sa Kobane. Ug kay may nakaila kaniya, dunay mihatag niya og pangan nga “Rehana.” Ug daghan dayon ang mihatag niya og titulo –“The Angel of Kobane.”
Pero ang pangan nga Rehana dili man Kurdish. Ug sa tinuoray lang, wala gyuy nakaila kaniya.
Ang Swedish Journalist ra nga si Carl Drott ang nakahimamat ning babaye nga kang kansang hulagway ga trending karon sa Twitter ug Facebook.
Apan wala makuha ni Drott ang iyang pangalan. Miduol lang kini kaniya ug miingong nagtungha siyag pamalaud (law student) dihang gipatay sa ISIS ang iyang amahan mao nga mi-undang na lang siya ug mi volunteer na lang.
Matud pa ni Drott sa police siya ni volunteer ug dili sa firing line maong dili siya motuo nga kining maong babaye nakapatay na og 100 ka sundalo sa ISIS. Gisuway pagpangita ni Drott kining maong volunteer kay diha pa unta siyay pipila ka pangutana apan wala na niya kini makit-i.
Pagka Oktubre 5 gikataho nga nadakpan siya sa ISIS ug nga giputlan siyag liog. Pagka Oktubre 10 dunay mga hulagway sa babae nga giputlag liog nga anggid-anggid ang hitsura ni Rehana.
Apan pagka pitsa 15 niadtong buwana, may nang-guwang istorya sa social media nga buhi pa siya ug nga nakapatay na kinig 100 ka sundalong ISIS.
Buhi man siya o patay na, tataw kaayo nga gihimo siyang inspiration sa mga Kurds sa ilang pakigbatok sa ISIS. Ganahan na ko mosul-ob og T-shirt nga naa ang iyang hulagway.
“Artwork” what are you waiting for?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
