Porbida gyud ning ubang mga pulis. Naniguwang nalang sa serbisyo apan wa pa gyud mahibawo sa ilang trabaho.
Niadtong Biyernes sa dayong kilom-kilom dihay nahitabong robbery hold-up sulod usa ka PUJ nga ruta Labangon-SM diha sa karaang White Gold Department Store ug sa ongoing construction sa Robinson sa North Reclamation area.
Ang usa ka pasahero nga hapit mabiktima sa tulis nga paspas naka-kanaug sa jeep, mi-adto dayon sa Mabolo Police Station aron i-report ang nahitabo.
Apan kutob ra intawon sa pagpanglipagho ug pagpanglingo-lingo ang reklamante’ng babaye kay ang pulis nga mi-entertain kaniya igo ra siyang gi-ingnan nga dili ilang jurisdiction ang lugar nga nahitabo-an.
Unya igo ra siyang gihatagan ug instruction nga ipa-blotter sa tukmang police station diin nahisakop ang lugar.
Mao nga mireklamo intawon ang biktima kanako sa pagkahanggaw sa pulis ug akong gi-interview sa akong radio program sa dySS Super Radyo ug midetalye sa iyang reklamo.
Ang iyang tuyo sa pag-report aron maka-responde dayon ang kapolisan pinaagi sa pag-radyo sa SWAT ug Mobile Patrol alang sa posible’ng pagdakop sa nag-inusara nga tulisan.
Among gitawgan ang Mabolo Police Station atol sa akong radio time slot mga pasado alas 9:00 sa gabii.
Pero ang nakatubag nga pulis misugilon nga ang gireklamo nga pulis nga maoy nag-entertain sa reklamante mao si Police Officer Paller kinsa migawas sa station kay nanihapon.
Mao nga akong gipaabot kining maong isyu niadtong Sabado ngadto kang OIC Cebu City Police Director Senior Supt. Conrad Capa kinsa mitunga sa among programa’ng “Dialogue On The Air” sa dySS nga nagtuki sa security preparation sa Christmas 2014 ug gipasalig sa hepe nga iyang imbestigahon si pulis Paller.
Gipasabot ni Capa nga dili gyud mao ang gihimo sa pulis sa Mabolo nga mitulod pa sa reklamante sa laing police station kay trabaho sa tanang pulis pag-responde dayon sa krimen taliwa nga dili ilang jurisdiction ug bisag naka off-duty.
Maglaum ko nga dunay resulta ang imbestigasyon ni Capa ug silotan gyud kay basig pakonsoylo lang sab sa publiko ang iyang giingon nga imbestigahon.
Haskang paita kung maoy managhan! Sayang lang ang pagpakabana sa katawhan.
* * *
Akong na-obserbahan nga puwerte na’ng pangandam sa atong kapolisan sa tibuok probensiya sa Sugbo alang sa seguridad sa katawhan nga manimba sa Misa de Gallo ug sa dayong pagsaulog sa Pasko nga sugdan karong kadlawon sa Disyembre16.
Gawas kang Capa, nanambong usab sila si Supt. Elmer Lim sa Danao City Police, Supt. Bernouli Abalos sa Mandaue, Supt. Ricky Delelis sa Toledo, Supt. Anthony Bagarinao sa Cebu Provincial Police Office, Supt. Carmelo Dayon sa Talisay ug Chief Insp. Rex Lomente sa Lapu-lapu City Police.
Ilang gipasalig nga kahatagan gyud sa insaktong seguridad ang tanang simbahan.
Ilang ipatuman ang checkpoints sa ilang mga areas of concern ug may police visibility.
Gawas nga dunay insaktong gidaghanon sa mga pulis, kompleto na sab sila sa mga kagamitan. Way pulis nga makabakasyon ug bawal silang mag hubog-hubog samtang mag-duty.
Akong gisugyot kanila nga unta makigtagbo sila sa mga parish priests nga maka-montar gyud ug CCTV camera sa mga church premises.
Hinaut makapalit ang taga simbahan kay daku-daku baya ug collection ron kay pasko na. Hehehe.
* * *
Congratulations sa tanang mga organizers sa Inter Private School Basketball tournament nga milampos niadtong Sabado pagpahigayon ug opening diha sa may Centcom covered court.
Magpasalamat ko niining laing torneyo kay makapabaskug kini kanamong mga ginikanan samtang nagkaduol ang pasko ug sa mga teaching and non-teaching personnel sa walo ka mga participating schools.
Gawas niini makahimamat kami ug dugang mga amigo.
Sa elimination round, kaming “Yellow Team” sa Lahug Christian School (LCS) ubos sa pagdumaa ni teacher Cedric Carbilledo milampos pagpildi sa Mandaue Ebenezer Alliance Academy ubos sa liderato ni Bernie Sambong sa score nga 75-63.
Sa first game, midaug ang ADONAI Asian Academy ila ni Pastor Jun Tumongha versus Aparche Christian School ila ni Nilzon Lim sa score 73-72. Sa second game, gipildi sila si Pastor Arnold Sinugbuhan of Maternelle Academy nilang Choy Castrol of Livingstone Christian Academy sa score nga 90-74.
Samtang sa 4th game, pakyas ang “Green Team” sa Lahug Christian School ni coach Kerwin Damos batok sa VNBC kon Visayan Nazarene Bible College nga ila ni Nino De Gracia sa score nga 77-72.
Gawas sa basketball, nag-opening sab sa duwang volleyball ang mga inahan sa mga tinun-an sa Lahug Christian School (LCS) uban sa mga faculty members sa LCS niadtong Sabado diha gihapon sa Centcom covered court.
Magpasalamat sab kaayo mi ug daku sa mga kadagkuan sa Centcom nga gipagamit mi diha sa ilang sports facility.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
