Duha ka tulog nalang, ato nang sugaton ang labing gikahinaman nga dakung kasaulogan sa tibuok tuig nga mao ang Pasko 2014.
Karong gabii ug ugma sa gabii, Martes, mangatulog pa ta. Apan sa Miyerkules petsa 24 ato na’ng naandan ang pagsugat sa Pasko inig hagtok sa alas 12:00 sa tungang gabii nga maoy pinakasayong buntag sa December 25, 2014.
Di lang pagkaon ug hudyaka ang atong andamon pagsugat. Ang labing nindot mao nga andamon gyud nato ang atong kaugalingon nga may igo kitang katakos nga mapasaylo ug higugmaon sa atong Labaw’ng Makagagahom.
Kumusta naman kita? Nakig-uli na ba kita sa mga tawo o mga sakop sa pamilya nga atong napasakitan kay ikahimuot kaayo kini sa Diyos?
Kumusta naman tuod ang tanang mga tag-iya sa mga kompaniya ug mga amo? Mi-undang na ba sa pagpang daug-daug sa ilang mga empleyado? Nahatag na ba ang 13th month pay?
Niadtong Sabado atol sa among programa’ng “Dialogue On The Air” sa dySS Super Radyo, ang pagpanghatag ug 13th month pay, extra bonus ug ang posibleng paghatag ug increase sa sweldo sunod tuig maoy among gituki uban sa among mga bisita nga sila si Philip Tan sa Mandaue Chamber of Commerce and Industry, Ramoncito “Dondon” Arquiza, presidente sa mga tag-iya ug operator sa mga security agencies (PADPAO) ug Rogen Cumba sa Department of Labor and Employment (Dole-7) ug sa National Conciliation Mediation Board (NCMB-7).
Alang ni Tan, silang mga negosyante obligado gyud nga mohatag sa 13th month pay sa ilang mga trabahante kay anaa man kini sa balaud ug gawas pa, apil na kini sa budget alang sa tibuok tuig nga operation sa kompaniya.
Nanawagan siya sa iyang mga kaubang negosyante nga mohatag gyud.
Si “Dondon” Arquiza sa PADPAO miangkon nga duna gyu’y ilang mga kauban nga dili kahatag. Apan sama niya nga makahatag, nakasugod na niadtong miaging semana.
Si Cumba nanghangyo sa mga employers nga kung mahimo ugma na ang deadline sa pagpanghatag kay inig petsa 24 wa nay trabaho. Kadtong mga kawani nga dili mahatagan, giawhag nga modangop sa ilang opisina.
Bahin sa extra bonus, gipasigarbo ni Tan nga dili gyud sila magmakuli sa paghatag niini kung maayo lang ang performance sa mga kawani ug gani gi-encourage karon ang paghatag ug binuwan nga productivity bonus nga iya na’ng gi-practice sa iyang kompaniya.
Samtang sa isyu kung angayan ba’ng usbawan ang suweldo sunod tuig, giklaro ni Tan kinsa usa sa mga representante sa management side sa RTWPB kon Regional Tripartite Wages and Productivity Board nga dili gyud sulbad ang increase sa suweldo sa kalisud sa panginabuhi ug niining pagsaka sa inflation rate.
Matud niya nga 70 porsiento sa suweldo sa mga kawani adto gyud paingon sa mahal nga pagka-on ug sa basic commodities.
Iyang gipasabot nga ang labing sulbad sa tanan mao nga mohimo ang gobyerno ug insaktong mekanismo ilabina ang taga Department of Agriculture nga molambo ug mapalig-on ang atong agrikultura unya mabarato na ang pagka-on.
Wa siya’y tihik-tihik nga mitira sa taga DA kay way konkretong programa alang sa atong food security ug gani matud niya nga negatibo na karon ang atong production sa agrikultura ug layo na kaayo kita sa ubang kanasuran.
May ponto gyud si Tan apan segurado ko nga tubagon kini sa taga DA nga wa gyud intawon sila magmika.
Akong tan-aw inutil gyud ang Aquino administration pagtutok sa problema sa kawad-on. Hapit nalang motapos ang termino ni Pnoy apan wa gyu’y kausaban ug wa gyud molambo ang agriculture sector.
Wa ko kadungog nga mitanyag ang gobyerno sa Pilipinas ug kaayuhan sa mga mag-uuma. Wa ko makakita ug konkretong aksiyon sa gobyerno pag-ingganyo sa mga batan-on nga mag-uma.
Wa mokopya ang Pilipinas sa pangagamhanan sa Japan pagpahamtang ug dagkung penalty sa mga tag-iya sa yuta diin ang ilang kayutaan wa gamita sa agrikultura.
Ang Pilipinas hangtud karon, nagsalig pa sa kabaw pagdaro ug pag-ugmad sa kayutaan nga mag-antos sa tumang kainit. Ang ubang nasud migamit na ug de-aircon nga tractor.
Inay pugngan sa Aquino administration, apan misamot na hinoon ang land conversion gikan sa agricultural ngadto na sa industrial.
Mao nga maka-ingon ko nga inutil gyud si P-Noy!
* * *
Mangayo ko ug despensa ni Monsignor Roberto “Boy” Alesna sa Saint Therese of the Child Jesus sa Lahug kung nasakitan man siya sa akong mga sibya sa dySS ug sa akong lindog dinhi sa Cebu Daily News nga mitandog sa iyang kilometric ug balik-balik nga pasalamat sa mga mi-sponsors sa padayong Misa De Gallo.
Ngan nga isip usa ka tipik ug sakop sa Simbahan, responsibilidad sab siguro nako nga manginlabot ilabina nga daghan sab ang nakasaway sa maong paagi.
Wa ko magtumo-tumo. Kinahanglang masayod sila nga napuno sila sa libak sa katawhan nga manimbahay.
Gani dunay mga pamilya nga aktibong nangalagad sa Simbahan nga mi-aksiyon pagka way gana nga mosimba tungod kay gi-komersiyal pag-ayo ang Misa De Gallo.
Nagpasalamat pa man gani nako ang mga pamilya nga naka-ako sa pagpadayag sa isyu kay gi-menusan na ang pasalamat ni Monsignor Alesna.
Salamat Mons kay daku na ug kausaban ug wa nay manglibak ug wa nay mobiya sa di ka pa mahuman ug tabi.
Maglaum ko nga bisan sa mga regular Sunday masses limitahan sa atong kaparian kining mga acknowledgement.
Merry Christmas!
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
