Case 107

Usa ka gabii samtang naglakaw ko paingon sa amo, may nakit-an ko nga batan-ong lalake nga dunay antiojos nga mikuha og hulagway sa gatapun-og nga basura ginamit ang iyang cellphone.

Na absent naman sad gud ang among mga basurero niadtong adlawa ug ang mga tao sa luyo dili na maka-huwat mao nga sa dalan na nila gibubo ang ilang mga basura.

Gipangutana nako ang batan-on kon i-post ba niya ang iyang gikuhang hulagway sa basura. Miyango kini ug miyango na lang usab ako pagbalik. Nalipay ako sa iyang gibuhat. Nalipay ako nga ang technology nagpadasig kanato pagpakabana.

Ang nakaguol lang kay ang mga batan-on ra daw maoy nasakit sa atong kahimtang ug kitang mga edaran igo nalang mopadayon sa atong na-andan.

Tungod ba kini kay ang mga batan-on ra maoy makasabot ug may purohang mogamit sa teknolohiya?Ug nga sa ingon, sila ra ang dunay connection sa matag usa pinaagi sa social media? Naa ra gyud tingali sa tao kon buot pa siyang mopadayon pagkat-on o mo-undang na. Sama pananglit ni Edythe Kirchmaier sa California nga sa panuigong 107 anyos dunay Facebook followers nga 55,765.

Mo-expire ang iyang driver license inig 110 years old na niya apan gihangyo siya sa iyang anak nga lalake nga may panuigong 74 anyos, nga ang iya na lang amiga maoy mo drive kaniya. Ang iyang amiga nga mo-drive kaniya, si Gena-VeraNiblack, nagpanuigon og 101 anyos. Sa 88 ka tuig nga pag maneho ni Kirchmaier og sakyanan, wala siya pwera buyag, makatilaw og aksidente ug wa siyay violation nga nahimo bisan man lang og illegal parking.

Ang iyang tambag sa iyang followers sa Facbook – “Think about others before yourself.” Sayon kini paminawn apan lisud buhaton. Sa bahin ni Kirchmaier, nahimo na kini niyang lifestyle. Mao man guy iyang namat-an ang iyang inahan nga mopakaon sa mga nagkalisud agig ilis sa iyang mga ipahimo kanila. Sa dihang 10 anyos na si Kirchmaier mohimo siyag mga bakos nga modakop sa mga pulgas para sa mga sundalo nga kanunay nga gipaak og pulgas sa ilang gipundohan.

Siya  ug ang iyang bana kanunay nga mo volunteer para sa mga non-profit organization. Duna na siyay 40 anyos nga serbisyo alang sa Direct Relief International.

Unsay hinungdan sa iyang taas nga kinabuhi? Usa niani ang kaliwat (genes) dayon ang swerte (luck) ug ikatulo tingali mao ang panan-aw niya sa kinabuhi, sama sa pagkat-on og mga bag-ong butang ug sa pagpakabana ug pagtabang sa uban.

Duna na siya 95 anyos nga panuigon dihang nagsugod siya sa pag-gamit sa computer. Kadtong batan-on nga akong nasugatang mi-picture sa street garbage sa amoa mga 15 anyos pa kadto. So 70 years is not gap enough to deter learning.