Gi-post sa Techno Storm section sa Yahoo ang gisuwat ni James Cook sa Business Insider nga kabahin sa pagsikat og balik sa karaang Nokia 8210 nga cell phone didto sa England.
Hinuon usa lang ka sector sa katilingban ang nagpauso pagbalik ning maong telepono ug kini mao ang mga drug dealers.
Tulo ka butang ang giganahan sa mga drug dealers ning maong telepono. Una, kay taas og kinabuhi ang bateriya niani. Ikaduha, nga dili kini dali ma trace sa pulis, dili sama sa mga smartphones dali rang subayon. Ang ikatulong katarungan kon nganong ganahan sila niini mao ang infrared port nga maoy gamiton nila pagpasa sa mga number sa ilang mga contact.
Nahug og tag dos mil ang kantidad sa matag unit ning maong telepono pero basig mosaka ang presyo niani kay halinon man kayo kini karon sa mga tindahan ug ingon man sa ebay.
* * *
Gipa-lecture nako niadto ang visual artist nga si Jethro Papu Estimo sa usa ka klase sa Humanities. Surrealism ang istilo nga iyang paborito ug mao nga naapil kani sa iyang gi-discuss sa klase. Mipakita usab sa iyang mga trabaho nga pabor sa maong istilo.
Nahimuot ug nalingaw ako sa iyang trabaho kay talagsaon ra ang visual artist nga mopakita og humor sa iyang trabaho. Kadaghanan sa iyang mga canvass mopakita og iring nga gatan-aw sa ubang klase sa mga mananap nga nanaghilawas.
Ug tungod kay nahimuot ako sa iyang trabaho, nisuwat ako sa usa ka pamantalaan kabahin niini, agig advancer sa iyang nagpadung nga exhibit.
Taas ug daku si Papu og active sa mga sports, Usa siya ka weight lifter nga moduwa usab og rugby. Tungod sa iyang gidak-on, di siya mahadluk makig banga-anay og lawas sa mga higanteng langyaw. Si-aw usab siya mao nga daghan ang malipay nga makakita kaniya sa mga panagtapuk.
Sa pelikulang “Dili Ingon Nato,” siya maoy pinakadakong zombie nga mi-atake sa mga molupyo sa usa ka bukirang barangay. Iconic kayo ang hulagway sa iyang bukobuko samtang gapadung siya sa iyang mga biktimahon. Daghang nakakita sa maong pelikula nga dili dayon maka-ila kaniya hangtud nga siya motalikud. Inig ka kita nila sa iyang luyo moingon dayon sila nga –“Hala, siya man to ang zombie.”
Niadtong miaging semana, ni post siyag soft copy sa artikulo nga akong gisuwat kabahin sa iyang trabaho niadtong estudyante pa siya. Niadtong panahuna diha pa sa UP ang congresswoman na karon nga si Lucy Torres. Si Budoy dili pa musikero ug padung pa lang mahimo ang unang Mooon Café sa Guadalupe. Nag-nostalgia mood ako pag post niya niadto.
Mao nga nakurat ako dihang may mi-post sa FB og RIP Jethro Estimo. Lisud imagine-non ang mga panagtapuk sa mga taga piyups nga wala nay Papu. Suma sa akong mga napangutana, nag mild stroke siya niadtong Sabado sa hapon mao nga gida siya sa ospital diin siya namatay pagka Domingo sa buntag. Lisud hunahuna-on nga ang usa ka batan-on, sipat ug aktib nga binuhat mokalit lag ka hanaw. PSD Paps ug salamat sa tanang gihimo nimo nga nakapa-smile namo.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
