Lisud ug kapoy gyud ni’ng gwapo!

Nabalaka  ko sa  political career ni Ronda Vice- Mayor Jonah John Ungab kinsa usa sab ka abogado sa nahitabong eskandalo sa iyang asawa ug sa giingong “paramour” niya nga lady lawyer.

Ang  nakapaet man gud niining sitwasyuna sa Vice-Mayor, dili  gikan sa kontra partido ang isyu kun dili gikan sa iyang asawa nga nahimong komplikado ang iyang kinabuhi karon.

Kini ra bang mga tawo sa Ronda sama sa ubang kalungsuran, medyo sensitibo baya sa mga “illicit affair” nga binuhatan sa mga naglingkod sa pwesto.

Nganong wa man motingog si Atty. Ungab sa maong isyu human gi-atake sa iyang asawa nga si Pearl si Atty. Jiecel Tiu kinsa kanhi kauban sa law office sa opisyal sa Ronda?

Unsa sab ka tinuod nga nalambigit ang Vice-Mayor sa laing babaye nga usa ka tinun-an ug matud pa mikiha sab human iyang napa-angkan?

Way asawa nga malipay kung tinuod man ang isyu. Pero ang sayop lang pud ni Pearl kay mi-diretso sab siya ug selos nga way igong basihanan.

Ambot  kung  na-established ba gyud  niya nga may relasyon iyang bana nga bise mayor ug ang abogada?

In fairness pud baya  intawn  ni  Atty. Tiu,  dili lang siya  maoy gi-selosan  ni Pearl ug daghan  nang mga panghitabo nga siya gihulga mao nga mi-undang siya sa law firm sa bise-mayor.

Akong  na-picture out nga murag salida sa sine o teleserye ang pag-selos ni Pearl nga nagpa-abot sa parking lot sa abogada unya mibangga sa iyang sakyanan sa gisakyan sa abogada ug iyang gi-baseball  bat ang sakyanan ni Atty. Tiu  hangtud nga milampos siya  pag-abli ug gi-atake ang abogada.

Lisud gyud ni’ng gwapo ta kay inilog gyud! Hehehe.

* * *

Si Engineer Ernie Delco nga maoy  general manager sa Metro Cebu Water District (MCWD) nagpahibaw  nga dunay insaktong supply sa tubig niining summer.

Gipa-salig ni  Delco atul sa among programang “Dialogue On The Air” sa DYSS Super Radyo niadtong Sabado nga dunay  8,000 cubic meters matag adlaw nga surplus ubos sa ilang franchise  area human naka-extract na sila sa Luyang river sa Carmen sugod  niadtong January 5.

Dili  pa  gyud  kini  mao kay sa mosunod nga mga buwan makuha nila ang laing 17,000 cubic meters nga supply sa tubig gikan gihapon sa Carmen  pagkompleto sa 35,000 cubic meters gikan sa maong lungsod.

Gawas niini tali-abot ang supply nga 12,000 cubic meters gikan sa Consolacion ug duna pay 20,000 gikan sa dakbayan sa  Danao.

So, niining maong gidaghanon, mag-expect ko nga abunda na gyud kita sa tubig ug mo-agas na 24/7 unya wa nay rason nga mahutdan og tubig ang  mga bombero pagtubag sa mga sunog nga mahitabo niining observation sa Fire Prevention Month.

Nangayo ug despensa ang general manager sa MCWD nga medyo di pa gyud kaayo maka-saka ang tubig sa mga elevated nga lugar sama sa PC Hills kay way booster pump  ug matud pa daku  kaayo sila og gasto.

Maglaum ko nga ila kining hatagan ug pagtagad aron makonbinse ang mga tawo nga abunda na gyud  kita sa tubig.

      * * *

Dunay usa ka sakop  sa Cebu City Fire Station ang mi-insister gyud sa  isyu nga tinuod ang mga panghitabo nga ang mga firemen sa Cebu Filipino-Chinese Fire Volunteers Brigade dili gyud mo-sugot nga pangayo-an og  tubig ilang mga fire trucks sa mga bombero nga naka-una ug  penetrate sa  fire scene.

Ang  sitwasyon  man gud usahay sa sunog,  ang ubang mga fire-trucks  dili na makasulod sa areasa nasunogan gumikan sa  kagamay  sa  kalsada mao nga maglumbay ang mga fire-trucks ug ang labing  maayong  himoon  magsumpay-sumpay  nalang sa  mga hose. Pero gi-ingong dili  magpasumpay ang taga Chinese Fire Brigade.

Kung tinuod man kini, nagpasabot nga padayon ang competition sa  government fire fighters ug sa Filipino-Chinese?

Subo gyud kini kay gi-kinahanglan ang tinabangay ilabina  nga nag-obserbar kita sa Fire Prevention Month.

Kaniadtu ang  isyu maglumba  kung  kinsa ang  maka-una.

Pero in fairness ni Atty. Ronnie Gocuan sa Cebu Filipino-Chinese Fire Brigade, miklaro nga dili gyud kini tinuod.

Bisan si Cebu City Fire Marshall Rogelio Bongabong Jr. mi-ingon nga dili gyud kini tinuod.

Si SFO4 Jovito  Abelgas  hepe sa operation, mipasabot nga dunay insidente niadto nga nabalibaran gyud  sila  nga makasumpay  sa hose pero  nasulbad  ra sab  dayon dihang  ang  isig ka  team leader  nagka-uyunay ug nasulbad ang maong  problema.