Bisan kon daw ang ilang unang tumong mao ang way puas nga pagtira ni Hilary Clinton ug Barack Obama mohatag gihapog gingmay nga nindut nga artikulo ang fox news nga website.
Karong semanaha duna silay duha ka makahimuot nga artikulo kabahin ni Hitler or at least mihisgut ni Hitler. Hitler nasad? Nahimo naman gud nga marka demonyo kining anhing Aliman sa kasadpang kultura. Kon mahinumduman gikomparar ni Hilary Clinton ang pangulo sa Russia nga Vladimir Putin kang Hitler. Gitawag ni Presidente Aquino ang kagamhanan sa China og Hitler.
Usa sa mga artikulo kabahin sa duha ka life-size nga bronze nga kabayo nga gi-commission o gipahimo sa architect ni Hitler nga si Albert Speer. Gitawag kining maong mga kabayo nga “Walking Horses” kay ga-isa man silag usa sa ilang mga tiil. (Maurura kinis “goose step” sa army ni Hitler.)
Human makuha sa Russia ang Germany niadtong World War II gibalhin sa mga Russo kining maong kabayo ngadto sa Red Army barracks sa Eberswalde sa German Democratic Republic (GDR). Ug didto sa ilang gibarugan daw na malmal silag maayo. Gisakyansakyan kini sa mga bata. Gi-ibtag ikog nga gipatapot ra sag balik. Gitapsingan sa mga bala. Ug kausa gipintalan og gold. Wala nay nitagad kanila hangtud dihay usa ka art historian nga misuwat kabahin kanila.
Human sila masuwat nianing art historian nikalit silag kahanaw. Gituohan nga gibaligya sila sa nagka purdoy nga gobyerno sa GDR. Katapusang nakit-ang gabarug kining maong mga kabayo niadto pang 1989. Ug karon lang tuiga nakitan sila sa kapulisan didto sa mga kamot sa gidudahang art smugglers mga giingong mitanyang kanila sa kantidad nga $5.6 million. Tungod niani duna na karoy walo ka tao nga gipangdakop nga panuigog 64 ngadto sa 79. Senior thieves kon tawgon ta.
Matag agi nako sa SRP kanunay akong makalingi sa grande nga munisipyo sa dakbayan sa Talisay ug kanunay akong mahimuot matag nako kita sa istatuwa sa kabayo sa plaza niani. Kanunay makon maka pangutana sa akong kaugalingon kon unsay kahulogan ning maong kabayo sa maong dakbayan.
Human ako makabasa ning maong artikulo kabahin sa duha ka bronze nga kabayo ni Hitler nadugangan ang akong mga pangutana. Duna na ba kahay mga bata nga mikatkat ning maong kabayo ug wa kaha sila dakpa? Wa bay naglaraw pagkawat ning maong kabayo?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
