Sofronio Vasquez. Image: Facebook/Sofronio Vasquez
Naghinam-hinam na ang mga fans sa “The Voice” champion nga si Sofronio Vasquez sa iyang pagpauli sa Pilipinas.
Gipahibaw ni Sofronio sa iyang social media nga mobalik na siya sa nasud.
“Coming back to [Philippine flag emoji] very soon. Takits!” caption ni Sofronio sa iyang Facebook post.
READ: Sofronio Vasquez maoy kampyon sa ‘The Voice’ Season 26
Walay gihisgutan nga petsa si Sofronio, apan sa iyang interview sa “The Pod Network,” miingon siya nga sa Enero 5 siya mo balik są Pinas.
Kun mahinumduman, misaad si Sofronio nga una niya nga bisitahon ang noontime show na “It’s Showtime” sa iya unya nga pagpauli tungod kay dinhi siya nagsugod isip usa sa mga contestants sa “Tawag ng Tanghalan.”
READ: Sofronio, The Voice winner, nakahinumdum sa tambag ni Rey Valera
Sey niya, “Proud ako na nagsimula ako sa ‘Tawag ng Tanghalan’ at ang ‘It’s Showtime,’ ang unang naniwala sa akin.”
Nahimo si Sofronio nga grand winner sa ika 26 nga season sa “The Voice USA” sayo karong buwan sa Disyembre.
Siya ang pinakauna nga Pinoy ug Asiano nga nakakuha sa kampyonato sa maong international singing competition.
Nakahilak ang iyang coach nga si Michael Bublé sa iyang kalampusan.
Gipildi ni Sofronio ang iyang kauban sa Team Bublé nga si Shye ug sila si Danny Joseph sa Team Reba, Jeremy Beloate sa Team Snoop ug Sydney Sterlace sa Team Gwen.
Nakakuha si Sofronio og cash prize nga mokabat sa $100,000 o P5.8 million, apil na ang record deal sa Universal Music Group, ang record company sa mga sikat nga international artists apil na sila ni Taylor Swift, Alicia Keys, Harry Styles, ug Adele.
Niadtong 2022, milarga sa Amerika si Sofronio aron ipadayon ang iyang singer career, human mamatay ang iyang amahan.
Sa tuig 2016, miapil siya sa “Tawag ng Tanghalan,” apan wala na makasulod sa finals.
