Kaya na ba nga mag-underground cable system ta?

Dugay nako nakadungog nga i-underground ang tanang mga kable dinhi sa dakbayan sa Sugbo. Pero kutob ra sa estorya.

Paeta, namatay gyud intawon niadtong Lunes sa gabii ang ginang nga taga-Maracas, Lahug nga si Irene Bordon kinsa natumbahan sa poste nga gigamit sa taga-Philippine Long Distance Telephone Inc. (PLDT) niadtong Sabado sa hapon human nabitik ang kable ngadto sa mi-agi nga boom truck nga iya sa Khitzu Development Corporation.

Ang iyang haya anaa diha sa chapel sa Maracas ug akong nahibaw-an sa pamilya nga mokiha gyud sa PLDT or sa tag-iya sa boom truck ug sa driver nga si Londres Fabiano Jr.

Gidimalas ang taga-PLDT karon kay di pa sab dugay kadtong disgrasyasa may MacArthur Boulevard sa Barangay Tinago diin usa ka 13-anyos nga si Ralph Bureros ang natumbahan patay sab.

Abir tan-awon nato kining lakang sa atong mga opisyales kung makasulbad ba gyud niining maong problema sa mga yong-yong nga kable nga piligro kaayo.

Mao ni ang nakapaet kay unya na mohimo’g seryosong lakang kungduna nay patay.

Balik sa nahitabo sa Maracas niadtong Sabado, gitoho-an sa mga nagpuyo duol sa nahitabo-an nga medyo hilan gyud nang maong lugara kay sa ilang ihap-ihap, ikapito nang napatay si Irene Bordon ni-anang dapita.

Buot ipasabot nga abtanan gyud nang dapita kay dunay mga kahoy unya may puno-an sa Balete.

Ang akong nabalak-an nga gamiton kining depensa sa taga-PLDT ug tag-iya sa boom truck nga ang engkanto maoy nagpatay ni Irene.

* * *

Wa gyud koy supak niining plano sa taga-Commission on Elections (COMELEC) nga himoong usa sa mga venue ang mga malls panahon sa eleksiyon.

Pagkanindot kung masugdan kini nila karong umaabot pinili-ay aron mahamugaway ang mga polling places nga anaa sa mga eskuwelahan kay ma-distribute man ang mga botante.
Akong tan-aw kung mahinayon kini, daghang mga botante ang mohangyo sa COMELEC nga ibalhin ilang mga pangan sa bag-ong polling precincts nga anha sa mga malls kay bugnaw ug way samok.
Dunay mga nabalaka nga mograbe ang panikas sa mga politiko kung adto sa mga malls. Pero akong tan-aw, bisag adto pas sulod sa Simbahan ibutang ang mga polling places, mangita gihapon og paagi ang mga tikasan.
Di sab tingali magpa-uwahi ang taga-COMELEC pagpa-deploy sa kapolisan ug kasundalohan aron pag-bartolina sa mga tikasan.
* * *
Mangambot nalang ko niining “zero vendors policy” nga ipatuman ni Cebu City Mayor Michael Rama dinhi sa dakbayan sa Sugbo.
Segurado kaha si Mayor Rama nga iya kining mapatuman? Or kutob ra kini sa hulga ni Rama aron pailhon niya ug magluhod-luhod ang mga kabus nga di nila kaalyado?
Nganong initan man gyud kining mga vendors nga nanginabuhi’g tinarong?
Wa man seguro’y problema kung desente lang ang mga vendors, presentable ang tindahan unya wa maka-obstruct sa pedestrian.
* * *
Haskang paeta gyud kung ang korte na maoy maunay og kabiktima sa krimen sama sa lungkab.
Nahitabo kini didto sa dakbayan sa Lapu-Lapu sa RTC 27 sa kang Judge Toribio Quiwag ug gidudahan nga usa sa mga janitor ang    responsable kay matud pa misibat kini samtang gikuhaan sa kapolisan sa iyang fingerprints.
Hinoon padayon pa ang imbestigasyon aron matumbok gyud kung kinsay mga responsable nga nakadala og laptop computer, kuwarta ug uban pa.
Ang kuyaw kung gidala pag-apil ang mga ebedensiya nga kuwarta, shabu, armas ug uban pa nga mahalin.
Nahitabo na kini kaniadto sa Cebu City Palace of Justice diin usa ka court aide ang nangunay paglungkab ug pagkawat sa mga ebedensiya kay na-ungo sa tigbakay ang kanahan.
Diha sa Qimonda IT Center, dili kaha malungkab ang atong mga sala? Kompleto ba sa CCTV camera ang mga courtrooms?
Si Atty. Jeoffrey Joaquino, Clerk of Court sa Cebu City RTC Central, mipasabot nga dunay lig-ong vault ang ilang opisina unya ang kuwarta nga ilang mahipos gikan sa piyansa ug filing fee ila gi-indorso dayon sa Land Bank of the Philippines aron dili mamiligro.
Alisto gyud mo ron kay daghan na’ng matintal!