Abi ba nako nga wa nay mga personnel sa Bureau of Fire Protection (BFP) ang nag-negosyo niining mga fire extinguishers kay gibalik-balik baya ang instruction sa ilang mga labaw nga bawal gyud kini.
Karong bag-o, mitiyabaw intawon ang among principal sa Lahug Christian School (LCS) nga si Ma’am Camelita Badayos Miguel kay dunay duha ka mga personnel sa BFP ang miadto sa eskuwelahan ug nang-inspection sa mga gamit pamatay-sunog.
Matud pa, wa silay supak sa mga recommendation aron luwas sa peligro ang mga bata.
Apan didto sila na-shock sa mga BFP personnel dihang mimando kanila nga pang-ilisan ang mga fire extinguishers og bag-o unya tag lima (5) na ka kilo kay sayop ang ilang tag tulo (3) ka kilo.
Ang nakaporke pa gyud kay ang mga personnel sa BFP mihatag kanila sa tulo ka mga tindahan nga giingong accredited sa BFP unya memoryado pa ang mga telephone numbers sa mga tindahan.
Mao nga nakapanglingo-lingo intawon si Ma’am principal kay nasayod sab siya nga gidid-an ang mga personnel sa BFP pagrekomendar sa mga tindahan nga namaligyag fire extinguishers.
Ang ako ba nganong hangtud karon naa pa may mga sakop ni Director Esmael Codilla nga molighot? Kuwang ni sila sa disiplina?
Kinahanglang susihon kini nila kay mauwaw baya mo sa binuhatan ning ubang badlungon.
*****
Panahon na gyud nga ibalik ang pagbitay sa mga makahimog linuog ug sinalbahis nga krimen.
Dinhi lang sa ato sa Sugbo, karong bag-o, dunay duha ka mga brutal nga krimen.
Ang usa didto nahitabo sa Ablayan, Dalaguete diin tinun-an sa Grade 7 o first year high school ang biktima nga si Jennelyn dela Torre Pia, 13 anyos, nga gitohoang gilugos ug gibitay sa punoan.
Ikaduhang sinalbahis nga krimen mao ang pagtulis-patay sa magtiayong Ranilo ug Elsa Tampus niadtong Domingo sa gabii sa may sitio Matab-ang, barangay Day-as, Cordova.
Naka-ako ang mga kanahan paghimo sa krimen atubangan sa 5 anyos nga anak sa magtiayon.
Ikapila na man kini’ng krimen nga nahitabo sa Sugbo nga lubog ang pag-angkon sa hustisya?
Ingon ani na gyud ka kulba ang Sugbo panahon sa kagabhi-on?
Manghinaot ko nga dili inutil si Cebu Provincial Police Director S/Supt. Noel Gillamac paglutos sa mga responsable.
*****
Nabalaka ko nga moabot ang punto nga adto mo-boomerang kang Gov. Junjun Davide III ang pagbutang na sab og billboard sa Tangke, Talisay nga nakasuwat ang “Never Again” nga ang tuyo ug tumong mao ang pagdaot sa mga Garcia ilabina kang Atty. Winston Garcia kinsa maoy lig-ong kontra ni Governor Junjun.
Naka-ingon ko niini nga posibleng mobanda kini ngadtong Governor Junjun kay tay-ogon kaayo ang sitwasyon sa unang distrito kay gi-free zone sa taga Liberal Party ug daghang nahiubos sa ilang mga kauban nga original LP members.
Gawas niini, daghan nang namikat niining liderato ni Governor Junjun kay ubay-ubay na sab sa mga kuwestiyonableng transaksiyon sa Kapitolyo ang nabisto, ilabina ang palpak sa mga district hospitals.
May lagi unta kung “flawless” ning liderato sa taga LP kay makaingon ang katawhan nga angayan. Pero unsaon, otro man sab!
*****
Dako’ng leksiyon sa uban nga dali kaayong mopaka-ulaw sa iyang isig kaingon ang nahitabo kang Junali Relampago.
Tan-awa ra, puwerte diay’ng hilak ni Relampago uban sa iyang mga ginikanan nga nangayog pasaylo sa tulo ka mga pulis sa Waterfront Police Station tungod sa iyang pagpublikar sa iyang
Facebook account nga nangaon og siomai ang mga pulis nga wa mamayad.
Ang tinuod, namayad diay intawon ang mga pulis.
Bisag kinsa tingali nga tumo-tumoan og estorya, di gyud malipay.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
