Doktor sa Boljoon wa makatabang sa dalagita?

Niadtong Biyernes sa gabii, atol sa akong programa’ng “Lloyd Suarez On Board Saksi” sa DYSS Super Radyo, nakadawat ko og text message nga nagsaway sa Municipal Health Officer (MHO) sa Boljoon kay matod pa wa dayon makaatiman sa usa ka pasyente nga giataki sa kasing-kasing.

Ang text nagkanayon nga: “Super Lloyd, good evening naa lang koy ipangutana, doctor sa Boljoon ba nay usa ka dalagita nga gi heart attack karun ang doctor ni attend ug mass. Gi-apas sa nurse kay tungod nay emergency katu gi heart attack. Nibalibad ang doctor ana cya unya ra attend pa cya mass. Kaupat na gabalik ang nurse last reason na humanon nya ang misa usa cya motabang sa giatake. Karon pag adto niya sa centro wa na ang dalagita patay na.

Pangutana naku unsa angay buhaton para ma liksiyon ng doctor sa Boljoon na way ayu hasta mayor way ayo ga pa salig2x.”

Kagahapon milampos ko pagtawag sa gireklamo’ng doctor nga si Dr. Shelbay Blanco kinsa akong nahibaw-an nga maoy presidente sa ilang Association of Municipal Health Officer of the Philippines (AMHOP)–Cebu Chapter.

In fairness ni Dr. Blanco, iyang gihimakak ang pasangil nga nibalibad siya pag-atiman sa pasyente ug iyang giklaro nga patay na ang dalagita dihang gidala sa ilang sentro nga gikan pas bukid-bukid nga bahin sa Boljoon sa may Lower Beceril.

Iyang gipasabot nga wa gyu’y negligence on their part pag-atiman sa pasyente bisan wala siya dayon makaresponde kay misalig siya sa pagka-competent sa nurse nga nahibilin.

Segun ni Dr. Blanco nga nahitabo kadto niadtong December 8 nga pista sa Immaculate Concepcion nga tingsimba gyud natong mga sakop sa Romano Katoliko.

Matod niya nga niabot sa ilang sentro ang pasyente nga si Jerlyn Rollon, 23 anyos uban sa kabanay mga alas 5:35 na sa hapon.

Miingon si Dr. Blanco nga sa inisyal nga eksaminasyon sa iyang nurse, wa na gyud mopitik ang pulso ug zero na ang blood pressure.

Tungod kay misimba siya niadtong higayona, mao nga giapas siya sa simbahan sa iyang nurse ug mihatag siya’g instruction nga ipa-ECG (Electrocardiogram) ang pasyente alang sa confirmation sa iyang kamatayon.

Sumala pa ni Dr. Blanco nga wa gyud gani siya makatiwas sa santos nga misa kay iyang giatiman ang pasyente.

Tungod kay wa nay activity ang lawas sa pasyente, wa nalang siya mo CPR kay useless na gyud dihang flat line na ang resulta sa ECG.

Nahibaw-an ni Dr. Blanco nga ang pasyente nag-antos na sa sakit sa kasing-kasing sulod na sa lima ka tuig sukad pa nga didto kini sa Manila.

Unya tungod kay way kuwarta ang pamilya, wa gyud makapa-eksamen ngadto sa cardiologist.

Alang nako, kung agrabiyado gyud ang kabanay sa dalagita nga mokiha, puwede kini nilang himuon unya si Dr. Blanco andam moatubang kanunay, kana kung siya imbestigahon.

Mangambot lang sab ko kung wa ba kini sakyi sa pamolitika diha sa lungsod sa Boljoon.

* * *

Unsa man gyud ang rationale nianang pag-short cut sa timer o counter sa mga traffic lights diha sa dakbayan sa Mandaue, ilabina diha habig sa may Pacific Mall, UN Avenue ug sa ubang dapit nga imano-mano?

Nganong gipadayon man gihapon kini nila ni Glenn Antigua ug ni Mandaue City Mayor Jonas Cortes nga risgo man kaayo kini sa mga motorista?

Nahibaw-an ni Super Norman Mendoza, among kauban sa DYSS ug dinhi sa CDN, nga misamot gyud ka risgo kining maong paagi kay blurred na ang monitor sa traffic central, nga buot ipasabot dili na maka-appreciate og tarong ang operator sa volume sa mga sakyanan nga pakalitan og short cut sa counter sa traffic system.

Di lang ako ang daryot nadisgrasya nianang ilang paagi pag short cut sa timer o counter.

Mamalihog intawon ko ninyo diha, Mayor Jonas, nga ipaundang na intawon nang kalakiha kay tugkan tag hubag-hubag!

* * *

Magpasalamat ko og dako ni Monsignor Roberto “Boy” Alesna, kura sa Saint Therese Parish Church sa Lahug, kay wa na gyud siya magbalik-balik sa iyang kilometric nga acknowledgement sa mga sponsors sa Misa De Gallo.

Sukwahi sa miaging tuig nga daghang mga parishioners ang gabagulbol kay sa sinugdanan sa misa, sa tunga-tunga ug sa dayong tapos sa misa, balik-balikon ang pagbasa sa mga sponsors.

Karong tuiga, lahi na ug maayo na kay ang acknowledgement sa mga sponsors ari himuon sa dayong tapos sa misa.

In fairness hinuon ni Monsignor Alesna ug sa iyang Team of Pastors, dako nag kausaban ang Saint Therese Parish.

Apil na ang pag-acquire og mga bag-ong aircon units.

Napanindot sab niya ang altar ug ang bunyaganan sa mga bata.

Maayo unta kung pagamyan na ang bayranan sa mga misa sa patay, misa sa kasal ug uban pa ilabina kung mga kabos ang nanginahanglan sa serbisyo.