Pagkahuman sa parada

Didto ko sa Fuente area niadtong Sabado ug maurag kaduha mo-brownout. Ambot kon unsay hinungdan niadto ug kon nag-brownout ba usab sa ubang lugar.

Ug ania kita karon ning adlaw human sa parada. Wala ra ko mosuroy gahapon agig likay sa dumog ug maong ania ko karon nanghagdaw og balita nga masulat ning atong lindog.

Ang gauna sa mga huhongiyaw mao ang pag-boo sa mga nanan-aw sa pasundayag sa Sinulog sulod sa Sports Complex kang Vice Pres. Jejomar Binay. Igo na lang siyang ni-Pit Senyor ug wa na nisulti pag taas.

Ngano nga gi-boo man siya? Kinsa man kadtong nang-boo?

Abtik kaayo ang pundok ni Binay nga nibasol sa mga taga Liberal Party. Matod pa nila, reaction lang kadto sa pikas kampo kay nibalik na man sab si Binay pagka number one sa survey.

Ang taga Liberal, sa ilang bahin, dali sab kaayong nakapanghinaw nga wala silay labot sa maong pag-boo.

Kinsa man diay kadtong nang-boo? Aw, kinsa pa kon di kadtong mga hinan-aw og TV. Misaler na gyud ang pag-demonize sa pundok ni P-Noy kang Binay. Pero murag wa ra mabalaka ang kampo ni Binay niani kay wala man gyud siya sukad masukad mamedia darling. Naa sa networking ang ilang kusog. Kay kon ang media o social media ba kaha hinuon ang himuong basihan sa umaabot nga piniliay, si Miriam “Facebook’s darling” Santiago ang modaog.

Taym pa, diin man diay si Duterte niadtong higayona? Sagdi lang nas Roxas maurag wa man tingaliy mangita ana niya.

Tungod sa grabeng dasok sa dalang Juana Osmeña pagkahuman sa parada, daghang nakuyapan. Wa usab makasanta sa traffic ang lihok sa dakbayan pagdili sa paghuboghubog ug pag-party sa kadalanan. Dunay 2,639 ka tigpatuman sa balaod (a.k.a. magbalantay sa kalinaw), apan 3.2 milyones man usab ang ilang atimanon, nga maoy giingong nanagsa sa atong dakbayan para sa maong kasaulogan. Tingali nanginahanglag tabang sa usa ka superhero para mapatuman ang mga pamaagi sa kagamhanan sa dakbayan.

Kon maghisgot tag superhero, wala pa kuno makadisider ang direktor nga si Erik Mati kon kinsa sa mga ABS-CBN babes ang angay padad-on sa bag-ong Darna. Si Liza Soberano, Nadine Lustre, Jessie Mendiola ug Pia Wurtzbach maoy pilian. Wala kaayo ganahi si Matti ni Mendiola kay puti ra kuno kaayo. Ug kon si Wurtzbach, nagkanayon si Matti nga wala kuno kaayo mo-click ang mga Darna nga beauty queen maoy gadala.

Hinuon maurag wa pa man tingali manginahanglan si Mike Rama ug Darna kay wala may dakong kagubot sa post-Sinulog parties nga manginahanglan og tabang sa usa ka superhero.