Super Hirit
Sa kadaghang kaso nga naglambigit sa mga opisyales sa gobyerno, dili kalikayan nga malimtan nalang namong mga sakop sa media ilabina niining paagi karon sa Ombudsman nga hugot kaayong mipatuman sa ilang “rule on confidentiality”.
Lahi naman gyud ron ang paagi sa Ombudsman kay sekreto na ang whole proceedings ug stages sa fact-finding investigation ug preliminary investigation sa mga kaso.
Dili na gani kami masayod kung kinsay assigned investigator. Ultimong pagpa-xerox sa mga complaints, di na gyud mi ka access nga unta public documents man.
Sukwahi niadtong panahon nilang kanhi Deputy Ombudsman Arturo Mojica ug Vice Mayor Edgardo Labella nga masayod gyud mi’ng mga tigbalita sa update sa mga kaso matag adlaw.
Gimingaw sab ko sa paagi kaniadtu nga open kaayo sa media sa panahon nga mopatawag og clarificatory hearing ang assigned investigator sa kihante ug gikiha.
Mao nga kung way mopahinumdum kanamo’ng mga sakop sa prensa sa kalambuan sa mga kaso nga dili high profile maglisud gyud mi pagtagad kay makalimtan lagi.
Makatabang kaayo nga dunay magpakabana nga mopahinumdum kanamo pinaagi sa pag-text o tawag.
Sama sa kaso ni Cebu Provincial Accountant Marieto Ypil kinsa giingong gitaktak na sa Ombudsman. Migamit ko sa termino nga “giingong gitaktak” kay dili ko segurado nga gipalagpot na si Ypil sa katungdanan.
Bahin sa iyang kaso, dunay mi-text kanako ug mao kini ang unod: “Super Lloyd, gov junjun immediately implemented the dismissal upon the directive of the ombudsman of 3 capitol officials namely; dra giango, mr calderon & atty martinquilla in relation to cicc administrative case but mr marietto ypil the provincial accountant who was also ordered dismissed by the ombudsman a year ago in relation to the Perdido Lex scandal.
Mr Ypil was found guilty for releasing payment of 5 M to this bogus organization. In fact mr ypil has a pending case now with the Sandiganbayan and was arrested by NBI agents last year and was released after posting a bail. Mr Ypil is from danao and a protégé of vice gov agnes magpale. Is this selective justice or selective memory? For ur info lang”.
Akong gi-forward ni Atty. Maria Corazon Naraja, spokesperson sa Visayas Ombudsman kining maong text message niadtong Biyernes aron makahatag sa ilang komentaryo.
Gitubag ko ni Atty Naraja nga ilang i-check ang compliance report karong adlawa (Lunes).
Kung tinuud man kini, apil ba kini sa “Matuwid Na Daan” nilang Governor Davide ug Vice Governor Agnes Magpale?
Pinili lang ang application sa balaud? Exempted ang taga Liberal Party sa sestema sa Ombudsman?
* * *
Kinsa naman sab ang nagmani-obra pagkiha ug ipa-ubos sa preventive suspension si suspended Cebu City Mayor Michael Rama sa Ombudsman kabahin niadtong pagpangulo sa rally sa mga City Hall employees niadtong Disyembre pagkondenar sa mga kaalyado sa BOPK sa wa pagpasar sa Supplemental Budget no.1?
Ang kampo sa “Team Rama” mipasangil kang kanhi City Mayor Tomas Osmeña nga maoy utok ug misugo nilang Geodetic engineer Patricio Saladu Jr. ug Retired Col. Felix Mangyao pagduso sa kasong kalapasan sa Code of Conduct and Ethical Standards for Public Officials and Employees (RA 6713).
Gawas kang Rama, gi-apil pagkiha sila si Kapitan Philip Zafra presidente sa Association of Barangay Council (ABC) ug si Tinago Barangay Captain Joel Garganera.
Pero unsa man kini ka tinuud nga mao ra ug usa ra ka tawo ang Engineer Patricio Saladu Jr. ug Retired Col. Felix Mangyao nga residente sa Barangay Quiot?
Sa kiha nagpasabot nga nalapas ang ilang tawhanong katungod kay wa sila maka-transact sa City Hall niadtong higayuna tungod sa welga nilang Rama.
Si Atty. Maria Corazon Naraja tigpamaba sa Visayas Ombudsman mipasabot sa ilang proseso nga “any motion to place the respondents under preventive suspension will be evaluated and resolved by the investigator handling the main case. In the case of high-ranking officials, the recommendation of the handling investigator will have to be forwarded to Manila and approved by the Ombudsman”.
Buot ipasabot nga kung paspasan kini pag-resolbar sa Ombudsman Manila puwede’ng suspensohon na sab si Mayor Rama.
Di ba kaalyado ang atong Ombudsman sa taga Liberal Party?
* * *
Mahimong way kapuslanan ang bag-o lang natapos nga ika-51st International Eucharistic Congress kung mapakyas ang tanang parokya sa tibuuk kalibutan pagsabwag sa mga maayong pagtulon-an nga nakuha sa IEC.
Responsibilidad sa atong kapari-an ang paghimo ug ilang katungdanan nga sila maoy mahimong salamin sa mga parokyano pag-apply sa mga maayong gawi ug binuhatan.
Maglaum ko nga wa nay mga pari nga subject sa reklamo ug maoy sumsuman sa mga komentarista ug manlilindog.
Dili ba puwede nga hubaron sa mga kadagkuan sa Simbahan ngadto sa naandan nga lingguwahe (local language) ang unod sa mga speeches ug imantala sama sa atong “Lungsuranon” aron basahon sa mga parokyano nga wa makatunob sa IEC Pavilion?
Mas maayo man tingali nga himoon kini aron sukli-an sa taga Simbahan ang gi-amot nga piso-piso sa “Misa Nga Mundo”.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
