Maayong gabii, ako ka

Salins Hulbot

Diha niadtoy summer inter barangay nga liga sa basketball nga akong nakit-an sa lungsod sa akong amahan diin inig halftime mag ilog ang mga referee paggamit sa microphone. Usa ra ka sentence ang ilang isulti matag kupot nila sa mike: “Maayong gabii, akoh kaaah.”

Mga dekada ‘80 pa kadtong maong liga pero makatawa lang gihapon ako kon mahinumduman ko ang tingog sa maong mga referee nga molanug gikan sa trumpo sa parke: Maayong gabii, akoh kaaah.

Unsa kahay reaction sa mga dalaga, mga CWL, mga politiko, mga pari ug mga kriminal nga didto sa sulod sa maong parke o bisan kadtong naa sa gawas pero within broadcast distance sa lanug nga hagawahaw sa mga referee -maayong gabii, akoh kaaah.

Maayong gabii, ako ka. Murag horror nga mura sag sexual harassment. Lalim mo na nga dunay mo claim og ownership nimo in a public place.

Kon unsa man gani ilang reaksyon niadto dakog purohan nga nakalimtan na nila kini kay dugay naman kaayo kadto. Ug tingali ako ray nahimuot ug nahinumdom niadtong hinanggaw sa mga referee. Usa sa mga butang nga nalingawan nako niadtong maong panahuna mao nga ga official uniform pa ang maong mga referee.

Maurag duna kadtoy logo sa BAP ang ilang gisul-ob nga uniporme.

Dili kadto original nga binuang sa mga referee. Nadunggan nila kadto sa radyo. Di nako mahinumdom kon kinsa ang maong broadcaster ang nagpasikat niadtong maong linya.

Nakahinumdom ako ning binuang niadtong mga referee dihang nakit-an ko nga nanung si Fiscal Mary Ann Castro ug mga kauban nga nanung sa opisina sa Regional Special Operation Group (ROSG) sa kapulisan.  Ang ilang tumong mao ang pagabri sa gi-lock nga kwarto ug nga kuhaon si Maricel Raffanan Gregory.

Ang bana ni Castro nga si Greco Sanchez (anak sa ganhi vice governor) nagpuyo na ug si Gregory sa wala pa sila magminyo ni Castro. Duna silay duha ka anak. Dihang nagbuwag si Castro ug Sanchez mibalik si Sanchez kang Gregory nga karon mabdos na usab kini sa ilang ikatulong anak.

Gikiha ni Castro si Gregory og libel kay mi post man kini sa Facebook nga siya si Castro maoy nangawat sa sakyanan ni Sanchez. Mi surrender si Gregory sa ROSG ug kay mabdos man kini ug gadala sa iyang duha ka anak wa lang sa prisuha sa mga pulis ug ila lang unang gibutang sa ilang opisina. Miadto si Castro sa ilang buhatan kay kuhaon unta niani si Gregory para adto ipa priso sa Talisay diin assistant city prosecutor si Castro. Ang rason sa fiscal mao nga didto man gipasakaan og sumbong si Gregory maong adto kini angay ibilanggo. Wala tumani sa pulis si Castro sa iyang hangyo. Maong mibalik kinis pagkagabii ug kuyog ang pipila ka kauban misuway paglungkab sa opisina sa ROSG para kuhaon si Gregory.

Tingali ang sulod sa bagulbagol ni Castro dihang gibira na niya ang buhok ni Gregory mao ang linya nga – “Akoh kaaah, bisag dili maayo ang gabii, akoh kaah.”