Super Hirit
Sa wa pa mangapriso sila si Assistant Cebu City Prosecutor Mary Ann Castro ug mga kaubanan niadtong Lunes sa gabii (March 7) tungod sa ilang pag-atake ug pagguba sa pultahan sa PNP/PRO-7 Regional Special Operation Group (RSOG) aron bunluton si Maricel Gregory, live-in partner ni Greco Sanchez, nanawag namo’ng mga sakop sa media si Piskal Castro.
Sa akong parte, si Piskal Castro nanawag sa dayo’ng paniudto niadtong Lunes ug nagpahibawo nga nigawas na ang warrant of arrest ni Maricel sa kasong 4 counts of cyber libel nga iyang gipasaka.
Gani buot niya’ng ipa-flash report o ipa-breaking news sa among sibyaanan sa DYSS ang issuance sa warrant of arrest nga giisyu ni Talisay RTC Judge Glenda Go ug ipaapil sa balita nga si Maricel gitapin-an ni Provincial Board Member Grecilda “Gigi” Sanchez Zaballero, maguwang ni Greco.
Wa nako mabalita kay nisulod na ang among nationwide news cast sa 12 noon-1 p.m.
Gawas pa sab, wa ko magkiat sa akong trabaho nga mobalita nga wa ko ka double check sa information. Wa ko’y personal knowledge ug wa koy dokumento.
Gi-disregard nako ang scoop ni Piskal Castro kay nihangyo pa gyud siya pagka gabii niadtong Lunes. Nakadawat ko og missed call gikan ni piskal Castro alas 8:05 p.m. pero wa ko makatubag kay nag-drive ko ug paingon sa among sibyaanan alang sa akong nightly program.
Wa siya mo-text nga under police custody na ug ni-surrender si Maricel.
Apan pagka buntag, natingala na lang ko pag-abli sa among radio monitor nga gi-interview na siya ni Sir Bobby Nalzaro nga gipusasan na siya ug ang iyang mga kauban.
Kung ni-text pa si Castro nga detinado na diay si Maricel ug buot niyang bunloton sa RSOG, makatambag pa unta ko nga dili himuon kay makadaut gyud kaniya.
Gani kung buot pa gyu’ng subayon, kuwang pa ang mga kaso ni Castro. Puwede pa siya’ng kasohan og kalapasan sa Republic Act 7610 kay sa iyang gihimo naka-cause baya to og trauma sa duha ka mga anak nilang Greco ug Maricel.
Abir atong tan-awon kung makatay-og ba ang PNP pagpakonbikto ni Piskal Castro, pagpasuspenso ug pagpa-disbar.
Niadtong Biyernes niklaro si Regional State Prosecutor Fernando Gubalane nga way jurisdiction ang iyang opisina pag-conduct og motu propio investigation kang Castro.
Sa laktod, magpaabot sila nga dunay formal complaint batok kang Castro ug adto kini ipasa sa ilang Internal Affairs Unit (IAU) sa Department of Justice Manila.
Lahi na karon ang RSP sukad natukod ni’ng IAU.
Sa panahon niadto nilang Regional State Prosecutor Hernando Masangkay ug sa mga nag-una diha sa RSP, dali kaayong maka-umol og panel of investigator aron moimbestigar sa mga scalawag prosecutors.
* * *
Dunay usa ka hamtong nga lalaki nga gianggaan og “Humba” nga giingong nagsakit og TB o tuberculosis ug hepatitis nga naglubog diha sa sidewalk sa akong alma mater sa University of San Jose-Recolletos (c) Basak Campus.
Akong professor kaniadtu sa college sa theology department nga si Ma’am Carol maoy nagpahibawo kanako pinaagi sa iyang text aron katabangan ang masakiton.
Sumala pa ni Ma’am Carol nga ang mga tawo didto nga nahibawo nisugilon kaniya nga ang advice sa taga Barangay Basak Pardo didto na lang pakamatyon.
Mao nga akong gitawgan si Cebu City Councilor Dave Tumulak kinsa kanhi kapitan sa maong barangay.
Nipasalig si Konsehal Dave nga makig-coordinate siya sa barangay alang sa posibleng rescue o ba kaha sa pagpa-ospital.
Wa sab ko makontento. Akong gipatawgan sa akong programa sa DYSS. Sumala pa sa secretary nga si Ivy Pacaña nga makapungot gyud kaayo ni si “Humba” kay wa gyud motuman sa iyang medication sa barangay.
Parehas silang Konsehal Tumulak nga wa gyud makahibawo sa full name ni “Humba” unya gipasagdan na lang sa kabanay tungod kay nagumon kini sa ginadiling drugas.
Nipasalig si Pacaña kanako nga ilang bunluton si “Humba” didto aron mapasulod sa ospital aron ma-diagnose gyud kung migrabe ba ang iyang mga sakit.
Niadtong Biyernes sa buntag, nakit-an pa ni Ma’am Carol nga nagpabilin sa sidewalk si “Humba,” apan pagka gabii wa na siya didto ug nahapsay na ang iyang gitambayan nga sidewalk.
Pero niadtong Sabado, alas 5 sa buntag, nakit-an sa usa sa mga residente sa maong barangay kay iyang nasugatan ug nilingkod daplin sa kalsada ug sumala pa piskay ang panglawas.
Mao nga akong giteksan si Konsehal Dave. Sumala pa nga nadala sa ospital si “Humba” apan gipagawas sa doctor.
Kining klaseha sa mga tawo sama sa mga psychotic vagrant ug mga libud-suroy nga mga bata angay gyu’ng seryoson paghipos sa atong mga opisyal. Nahimong way kapuslanan ang pagpanindot ni Cebu City Mayor Michael Rama sa atong mga agi-anan / gutter unya puy-an lang niining atong mga kaigsuonan nga may problema sa kahimtang
Ang ako ba, nganong sayon ra man sa atong mga kadagkuan sa gobyerno nga maka-usik-usik sa kuwarta sa gobyerno pinaagi sa pag-ayo sa mga kalsada nga way deperensiya ug pag-angkon sa mga lohong sakyanan unya dili makasulbad pagpatukod og building alang niining atong mga igsuon nga anaa magpuyo daplin sa kalsada?
Si Dr. Rene Obra, chief sa Behavioral Sciences sa Vicente Sotto Memorial Medical Center (VSMMC), nagbalik-balik sa pag-angkon nga dili nila ma-accommodate ang tanan diha sa ilang facility sa karaang TB Pavilion sa VSMMC.
Iyang giangkon kaniadto sa among programang “Dialogue On The Air” nga duna gyu’y mga hitabo nga ilang buhi-an ang mga ma-rescue sa barangay kay gawas nga puno na kaayo sila sa mga pasyente, wa sab silay budget pagpakaon.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
