Salins Hulbot
Nanaway ang gay kong higala sa usa ka reporter nga wa mahibawo sa buot ipasabot sa LGBT. Tinuod angay mahibawo ang reporter sa kahulugan ning maong mga litra kon magsunod siya sa ingon niani nga padagan. Apan naluoy lang gihapon ako sa maong reporter tungod kay hapit kada adlaw kini magdugang og acronym, abbreviation ug lainlain pang mga initial sa iyang taas na kaayo nga lista sa mga naghugpong nga litra nga iyang basahon matag sibya.
Samtang naigking ang lain kong higala nga gasul-ob og polo nga giburdahag Canon EOS dihang may misugat kaniyag pangutana kon unsay kahulogan sa mga litrang EOS. Minganga intawon ang akong amigo. Bisan ako wala pa mahibawo sa kahulugan sa EOS nga Electro-Optical System niadtong panahona. Gani karon pa lang ko nahibawo nga ang SCUBA abbreviation sab diay.
Ug tungod kay 26 ra man ka litra ang naa sa alphabet, posibleng dunay abbreviation nga doble ang kahulugan. Ang pagtapot pananglitan sa mga litrang M, I, L ug F duna may duha ka samputanan: ang usa politikanhon, ang usa porno.
Samtang ang mga gasunod sa kalibutan sa mga terorista wala pa magkauyon kon IS, ISIS o ISIL ba ang itawag ning mga mangtas sa Tungang Sidlakan nga nagpunay og pamutol og liog sa mga dili motuman sa ilang mando.
Ug kon tigsulod ka sa mga forum sa Internet, dakog purohan nasugatan mo na kining maong mga hugpong sa mga litra: FWIW, WYSIWYG, ROTFL, IMOHO, AFAIK. Ang termino kuno nga SNAFU gikan sa military.
Ug karong nagkaduol na ang eleksyon, duna nay laing meaning ang ALDUB. Ug dili Eat Bulaga ug GMA 7 ang gasibya niani. Usa ka local radio station, ug nihisgut nga kusog na kuno ang ALDUB. Di ba daan naman ning kusog? Dili, bag-o ni nga ALDUB, ang Alyansang Duterte ug Bongbong.
Mas mubo o mas gamay ra nga litra ang gamiton, mas daghan kini og meaning. Ang DO sa photography diri sa ato nagpasabot og Development Only (of negatives).
Apan karong bag-o nangguwa na ang posters nga may “Let’s DO it.” D ug O diri maoy initial sa Duterte (for president) ug Osmeña (for mayor). Kusog nga nanghimakak si Tomas nga wa siyay labot niani kay Roxas lagi gud kuno siya. Ug kay dili man sad pabintaha ang pikas kampo, naghimo silag ilang DR. Kining ila dili kini mananambal. Initials kini sa Duterte ug Rama (ang atong incumbent nga mayor).
Unsaon nga wa man goy amor kang Mar ug Binay ning taga ato.
Usahay tungod sa nagpatungpatong nga initials, acronym ug abbreviation nga angay timan-an, mo-AWOL akong utok.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
