Deserving si General Commendador

By: Lloyd Suarez April 05,2016 - 10:22 PM

Super Hirit

Daku  kog  pagsalig  sa  katakos ni  Cebuano 1st  Star General,  Chief  Superintendent  Patrocinio  Aredidon Commendador  nga  matunhay  ang pagmintinar  sa  kahapsay  ug  kalinaw  sa  nagsingabot  nga  eleksiyon  karong Mayo 9, isip maoy  bag-ong  Police Regional  Office (PRO-7) Director.

Tingali  dili  kalikayan  nga  motumaw  ang     mga  pagduda  sa  timing sa  iyang  pagpuli  kang  Chief  Supt.  Manuel  Gaerlan samtang  lima  nalang  ka  simana  sa  dili pa ang piniliay.

Pero  ako  nga  naka-ila  kang  Commendador  daku kog  pagsalig  nga  maka-maintain  siya  og  impartiality and neutrality  sa tanang  mga  Sugbuanong  kandidato.

Dili isakripisyo  ni PatCom    ang  iyang  pangan ug  ang intigridad sa  pamilya  alang  lang  sa  mga  politiko  nga nagduwa  ug nagdrama  niining lumalabay  nga bugnong  lugaynon .

Sa akong  assessment, si  PatCom  ka-respetohan sa tanang  mga  kandidato  kay wa  kini  magpagawong  ni bisan  kinsa ug  wa  kini  magpagamit sa  politika sukad  kaniadto.

Ang  bantayanan  niya  karon   mao  ang  narco politics, palusot sa  mga peke  nga kuwarta  ug  ingon man  mga  pagpanulis.

Kining mga  kasoha   mosipat  gyud basta  magkaduol  na  ang  eleksiyon.

* * *

Sa  170  ka  mga journalists nga  gipatay lukop nasud sukad nabalik ang demokrasya sa Pilipinas  niadtong 1986,  pila  naman  ka  mga  kaso  ang  nasulbad  sa  gobyerno ug  nahatagan  og  hustisya?

Maayo nalang  seguro  kung  nakaabot  sa  10 porsiento ka  mga  kaso ang  naresolbar.

Niadtong  Maguindanao  massacre,   sagad sa  mga biktima  mga  sakop sa  prensa.

Akong  tan-aw   molanat  pag duha  ka  dekada  una  mahuman  ang asunto  unya  daghan  na’ng  mangamatay  nga mga akusado  ug  mga  testigo  paglabay sa  panahon.

Mao  nga  akong  suportahan  ang  National  Press  Club  ug  ang National Union of Journalists  of  the Philippines (NUJP) paghagit  sa  mga  presidential  bets paghiklad sa  ilang  mga  agenda  bahin sa  media  protection.

Usa  sab  tingali   sa  maayong  himoon sa  tanang  mga  media  organizations  mao  nga  limpiyohan sab  unta  ang  hanay sa  mga sakop sa  prensa  nga  ubos sa  payroll sa  mga  politiko ilabina  karon  nga  nagpadayon  ang  pahumot  sa  pangampanya.

* * *

Naalarma  ko  sa gipagawas  nga  data  ni  Dr. Alice  Utlang, Cebu City  Veterinarian,  nga ang  Barangay  Lahug  maoy  nag-una  sa  kaso ug  maoy  pinakadaghang  biktima sa  paak  sa  iro.

Iyang  napanglantawan nga  mosaka pa  kini  tungod sa  kainit  sa  panahon kay  ang  iro sama  sa  tawo  nga sapoton  kaayo  panahon   sa  ting-init.

Gawas  niini, ngan  nga  summer vacation  karon  mao  nga  ang  sagad  mabiktima  mao  ang mga batang  lalaki nga  laagan  ug  karagan  kaayo nga makatunob  ug  makapasakit sa  mga  iro.

Ngan  nga  kaming mga  kawani sa  DYSS ug  GMA,  mag-agian sa   Barangay Lahug  daghan  gyud  kaayong mga  iresponsableng  mga  tawo  nga  nagbuhig iro  kay  ilang  gipasagdan  nga  maglatagaw  sa  kalsada.

Gani  bisag  lawom na’ng  gabii  dunay  mga  iro  nga  maghigda sa tunga sa  kalsada diha  sa  traffic  light  sa  eskina  Gorordo  ug  sa  karaang  wet  market sa  Lahug.

Wa gyu’y taga  city pound ang  naka-ako sa  pagdakop  niining mga hayupa.

Maglaum ko  nga  moseryoso  na ang  opisina  ni Dr. Utlang  pagbitik  niining  mga  laag  nga  iro kay  gawas  nga  makapaak  maghatag  usab  kini  og  risgo sa  mga  mag-motor.

Di  lang  unta  ang  opisina  ni  Utlang  ang   mangusog sa  pag-pang  imbargo  niining  mga  iro nga  wa  tagda sa tag-iya  lakip na  ang tanang  mga  Local  Government Units.

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: Cebu City Veterinarian, Comendador, Dr. Alice Utlang

We use cookies to ensure you get the best experience on our website. By continuing, you are agreeing to our use of cookies. To find out more, please click this link.