Susmariosep!

Salins Hulbot

Dili panag-iya sa magbabalak ang balak. Gigamit kini sa tanan ug gigamit kini sa inadlaw-adlaw nga kinabuhi.

Samtang gasakay akog pedicab (usa ka misnomer kay motorcycle man kini nga dunay side car ug dili na man ang pagtindak sa pedal o pedi ang gapadagan niani) gikan sa Sibulan paingon sa Dumaguete, niadtoong miaging melinyo, gasigig uwan ug kilat.

Matud pas akong kasakay, “Sus, may na lang kay gibadlong sa liti ang buhawi.”

Maurag wala man tingali makaagig lecture sa poetry ang akong tupad pero gihimo niyang daw tawo ang liti nga “mibadlong” sa buhawi. Sa Ininglis, gitawag kinig personification. Wala niya tuyua nga nakahimo siyag balak sulod sa pedicab samtang nagpunay og panghasi ang kilat niadtong hapon nga way puas ang ulan.

Sa pamalak ug ingon man sa ubang arte, anaa ang pagtawag o pagsampit sa wa diha. Ang tumong sa ingon mao ang paghimong buhi gikan sa hunahuna o handumanan sa mga butang, hitabo o binuhat nga wala sa atong atubangan.

Miliko sa may mabaw nga sapa ang Ceres nga akong gisakyan kay tungod niadtong higayona, naguba ang taytayan nga amo untang latayan tungod sa bagyo. Sa pag-agi namo sa sapa, nasulod sa libaong ang usa ka ligid sa among gisakyan. Dihadiha dayon misingit ang akong tupad og “Mahal nga Birhen!”

Kon literalness ang imong gipangita, maglisod kag connect sa libaong ug sa Birhen. Apan kay kultura man maoy gadala sa pinulungan, ang tanang mga tawo nakasabot sa iyang mensahe, sa iyang pangadyi nga dili na niya kinahanglang humanon paglituk: “O, Mahal nga Birhen, panalipori kami.”

Sa debate niadtong Domingo, wala tuyua sa presidential front runner nga si Duterte nga makapangadyig kalit dihang gipasigarbuhan na siya sa naiwit nga kandidato nga si Roxas sa mga data niini nga nagdalag lista sa mga tawo sa Davao nga natabangan sa pamunuan. “Susmariosip,” matud pa ni Duterte. Natandog ug gihilasan tingali gyud kini sa gipangyawyaw ni

Roxas nga ang Sagrada Pamilya man gyuy iyang gisampit.

Ang maong one liner gadala sa ngalan ni Jesus, Maria ug Jose. Maayo na lang gani kay wa motubag si Binay og “Present!” Kay ang pangan ni Binay nga Jejomar gikan man sa Jesus, Joseph ug Mary.