Pagkadimalasa gyud tawon sa mga biktima sa daku’ng sunog sa Barangay Pahina Central niadtong Sabado sa kadlawon nga mikutlo sa pito (7) ka mga kinabuhi ug mipaabo sa 71 ka mga panimay.
Wa makagawas ang mga biktima tungod sa kakusog sa kayo unya sikit-sikit ang mga panimalay nga gama sa kahoy.
Puwerte’ng luoya sa mga biktima ug nagkinahanglan sila’g ayuda kay halos tanan kanila way nadala.
Unsa may tsansa nga makabalik pagpatukod sa ilang mga panimalay ang mga biktima?
Hinuon akong tan-aw, way problema nilang Cebu City Mayor Michael Rama ug Vice Mayor Edgardo Labella kay manggiloy-on man gyud ni sila.
Gipabalik man gani’g tukod ang mga biktima sa Sitio Avocado, Lahug bisag iya sa University of the Philippines Cebu ang lote. Samot na nga ang yuta iya sa kagamhanan sa dakbayan sa Sugbo.
Apan kung may proyekto ang siyudad dihang dapita kay usa kini ka commercial area, kinahanglang hatagan og maayong relocation ang mga biktima.
Maglaum ko nga daghan kanato ang makatabang sa mga biktima kay pulos gyud intawon uyamot.
Nakasabot ko sa atong kabomberohan nga naglisud pagpawong sa sunog tungod kay hagip-ot kaayo ang fire scene.
Tinuod nga silingan ra gyud kaayo ang mga nasunogan sa Cebu City Central Fire Department apan kung way kaagian, mosamot gyud ka inutil ang atong mga fire fighters.
* * *
Hangtud karon wa pa gyu’y kongkreto nga plano ang Supreme Court, Department of Justice ug Cebu provincial government pagpa-renovate sa karaang building sa Cebu City Palace of Justice.
Mas maayo pa si City Prosecutor Liceria Lofranco Rabillas kay nakahuna-huna pagpa-renovate sa iyang opisina nga anaa sa ground floor sa maong building.
Hapit na magtulo (3) ka tuig nga gibiyaan kining maong building sa atong mga huwes ug mga court personnel gikan nga gitay-og kini sa kusog nga linog niadtong October 15, 2013.
Kini’ng maong building gipatukod kaniadto sa Department of Justice (DOJ) diin ang DOJ ubos sa Malacañang. Ang yuta iya sa Kapitolyo.
Gi-turn over ang pag-manage niini ngadto sa Korte Suprema aron maoy maka-maintain sa building lakip na ang bayranan sa mga telepono, kuryente ug uban pa.
Ako’y gisayangan sa maong building kay gipasagdan lang sa administrasyong Aquino, sa liderato sa Kapitolyo ug sa Korte Suprema nga unta usa kini sa mga prominent land mark dinhi sa Sugbo.
Karon nag-antos ang Korte Suprema pag-abang diha sa Qimonda IT Center nga sobra usa ka milyon ka pesos ang abang matag buwan unya puwerte’ng gagmaya sa mga court rooms.
Kung napaayo lang unta kining maong building, makadaginot unta ang atong kagamhanan.
Kanunay ang supply sa tubig unya wa pay problema sa parking.
Sa Qimonda, daghan na’ng mitiyabaw nga mga kawani parte sa ipatuman nga parking fee kay 70 ra ka slots ang mahatagan og libre. Unya ang ilibre mao ang atong mga huwes ug mga clerk of court.
Apan ang mga ordinaryong trabahante nga gagmay og suweldo unya motorsiklo ray service maoy pabayron.
Nangambisyon ang mga kadagkuan sa Korte Suprema nga adto sila magtukod og ilang kaugalingong building sa may South Road Properties (SRP), sa lugar nga gi-donate sa Cebu City Hall.
Apan ang ako ba, mas maayo’ng ibalik ang mga sala sa Regional Trial Courts (RTC) ug Municipal Trial Court In Cities (MTCC) diha sa karaang building.
Kung madayon man ang pagtukod didto sa SRP, mao nalay butangan sa atong Court of Appeals Cebu Station, Sandiganbayan, Satellite Office sa Korte
Suprema ug butanganan sa mga nagtipun-og nga mga court documents ug mga ebedensiya.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
