Abusado gyud ning ubang pulis

Pagkahanggaw gyud tawon ni PO3 Brent Fulmaran, imbestigador sa Basak, Mandaue City Police Station nga midakop sa taxi driver nga mi-turn-over sa cellular phone sa among newsroom sa GMA-7 Balitang Bisdak niadtong Lunes sa hapon.

Wa gyuy dautang intention ang taxi driver nga si Ariel Birao sa Downey taxi nga nalangay niya pag-uli ang butang kay didto siya sa ilang probinsiya.

Nagtinarong gyud ang driver kay iyang gipahibalo ilang guwardiya sa garahian nga dunay cellphone nga nabiyaan sa iyang unit.

Kay kun yabag ug marukoy pa ang taxi driver, mangambot na lang siya sa mga Arabo nga sila si Radhi Ali ug Nayef Mohammad sa nahibiling cellphone ngan nga ang taxi puli-pulihan og sakay sa pasahero.

Ang pulis nga na-interview ni Super Norman Mendoza, among kauban sa dySS Super Radyo, midepensa nga may katarungan niyang pusasan ang driver kay diha na misanong nga iuli ang cellphone sa Arabo human mitanyag og salapi ang langyaw.

Kining pulis gyud hinuon, magpaka-pulis gyud. Maayo sab nga mohimo og istorya aron pag-justify sa kabuang.

Kun tinuod pa ang iyang istorya, mikiha na unta ang mga langyaw.

Posible nga mitanyag ang mga Arabo og kantidad isip pahalipay apan dili sab sabton nga ang taxi driver nag-apas sa pahalipay.

Ang klaro sa istorya nga misalig intawon ang driver namo sa GMA. Mao nga iyang pasaksihan ang pag-uli sa butang ngadto sa tag-iya ug dili sa pulis nga daghan og kabuang.

Nainsulto si PO3 Fulmaran nga way salig kaniya ang taxi driver? Pila may bayad sa mga Arabo niining kanahang pulis nga way batasan ug way respeto sa iyang pagkatinugyanan sa balaud nga midakop sa driver nga wa gani mag-uniporme?

Kinahanglang ikiha ni sa taxi driver aron makatilaw sab ning yabag nga pulis.

* * *

Gitubag ko ni Police Senior Supt. Richie Posadas hepe sa Criminal Investigation and Detection Group kon CIDG in Central Visayas sa nahipatik dinhi sa akong lindog bahin sa kamatayon sa negosyante nga si Jerome Bendebel nga medyo nalangay pagsulbad ang kaso sa mga kadagkuan sa Police Regional Office in Central Visayas (PRO-7).

Miingon si Posadas nga niining semanaha ila nang mataral ang mga responsable sa pagbunal, pagkulata hangtud namatay ang negosyanteg hardware sa Balamban nga si Bendebel kinsa gipugos pagpa-rehab sa mga kabanay.

Si Posadas nga nagmakuli pagtug-an sa mga responsable mipasabot nga unya na lang nila ihatag human sa filing.

Maglaum ko nga dili lang kutob sa pagpasaka og kaso ang atong kapolisan. Kinahanglang sigurohon gyud nga makonbikto ang mga rsponsable.

Among counterpart sa police beat si Super Guam Logronio mitug-an nga ang pulis nga naapil sa krimen mao si SPO2 Jonas Paquibot nadestino sa Regional Holding Administration Office sa PRO-7.

Nahibawoan nga usa sa mga badlungon kining maong pulis nga nag-schooling karon sa Security Public Safety Senior Officer Course.

* * *

Moapil tag ampo nga nindoton na sa Ginoo ang dagan sa panahon aron dili intawon maapektahan ang atong mga kalihokan sa kapistahan ni Senyor Sto Niño ilabina ang “traslacion” sa Biyernes, “fluvial procession” ug “solemn foot procession” sa Sabado ug ang “grand parade” karong Domingo.

Wa koy supak nga kanselahon ang “fluvial procession” ilabina kun kusog kaayo ang bawod kay duol kaayo kita sa disgrasya.

Pero wa gyuy rason nga kanselahon ang “foot procession” kay naandan na sa mga Sugboanon nga bisag kusog kaayo ang uwan ug bisag dunay lipnaw sa tubig ang kadalanan, dili kini makapaatras pag-uban sa procession sa “Balaang Bata.”

Samtang gubot pas lukot kun an. sayaw sa “Grand Parade” adto himoon sa mga gym sa ubang mga barangay kun maglain gyud ang panahon. Pagka wa gyuy lami kun kini maoy mahitabo.

Kun nindoton sa Ginoo ang dagan sa panahon inig Sabado unya bation inig Domingo nga posibleng magkanselar sa street dancing, duna gyud Siyay mensahe.

Posible nga ang mensahe mao nga ipa-undang Niya ang merry-making nga gi-commercialize na pag-ayo nga maoy hinungdan nga mas daghang motambong sa kalingawan kay sa religious nga aspeto.

Pit Senyor natong tanan!