James down. Ning season nga mi retire si Kobe, ang tanang mata tua ni Lebron James, ang giingong pinakamaayong basketbolista sa iyang panahon. Apan naunsa mang pagka unsa-a nga gidabudabohan man sa Golden State Warriors ang iyang team nga Cleveland Cavaliers. Maong 3-1 karon ang standing sa Warriors batok sa Cavaliers. Ug mahimong ugmang adlawa makuha na sa Warriors ang 2016 Larry O’Brien trophy sa NBA.
Tungod tingali kay ikapito na kini nga final appearance ni James sa finals, nabasa na sa mga coach, researchers ug statisticians ang iyang mga lihuk ug naghimo na silag mga lakang para mababagan kini. Ug tuod man matag lusot ni James, tabangan dayon siya mao nga dali kaayo siyang matsik-apan o di ba hinuon mapalakan.
Jordan revisited. Tungod sa frustration sa mga fans nga napakyas sa ilang paghinamhinam nga makaita power moves naahat silag ka nostalgic. Ug mibalik nausab ang pagtanditandi ni Kobe ug Lebron kang Jordan.
Kinsa man gyuy mayng laki aning tulo? Alang kanako mas igmat si Jordan kay ni Kobe pero mas athletic si Kobe.
Mas maru si Kobe kay ni Lebron pero mas power ang nauwahi. Ingnon ta lang nga kon army pa sila, air force si Jordan, navy si Kobe ug marines si Lebron. (Sakto ra sad kay Air ang sapatos sa nauna, may kalabutan sa tubig ang team sa ikaduha ug mga sundawong nagkabayo maoy team sa ikatulo.)
Heart. Mahilig kaayo mogamit ang Team Gilas ning maong pilong -“puso.” Kinsa man sa tulo ang mas dunay kasingkasing sa duwa. Ambot lang. Basta kay si Kobe ug si Jordan manghilak lang inig human sa duwa. Si Lebron tungatunga pa gani sa kumbate mo tibi na ang baba maurag batang bag-o lang gilutas.
Gang up. One on one walay makabantay ni Lebron apan kon usa ka coach nga kahibawo mopatuyok sa imong team ug nasinati mo na ang mga lihok niani masulod mo siya sa laang. Gi perfect sa Warriors ang Lebron trap. (Sama ra nga na perfect sa OKC Thunder ang pag trap ni Stephen Curry.) Dunay mosugat ni Lebron ug kon mosulod na kini dunay motabang pag babag. Ug inig undang gyud dayon niani pag dribble hampason dayon ang bola. Ug kon mauwahi ang paghampas duna datut mosuway pag-opaw niani sa kilid. Tungod niani dihay quarter nga na zero si Lebron. Diha usay lain nga 1 of 8 attempts ra iyang napasulod.
Synchronization, cohesion ug strength in numbers maoy gi master sa lawom nga bench sa Warriors.
Counter. Wa nabay purohan nga makalingkawas ang Cavaliers ning quagmire nga gi andam sa Warriors kanila? Ko maka design si coach Tyronn Leu og padagan sa duwa nga di mag-agi kang Lebron ug Irving, pwedi. Ug kon mosugot si Lebron nga mahimong decoy sa clutch time. Pero maurag wala kini sa powers ni Leu.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
