Nyor Gamay (NG): Nganong gipusil man to si Albuera, Leyte Mayor Rolando Espinosa ug iyang kauban nga si Raul Yap nga didto naman sila sulod sa bilangoan?
Nyor Daku (ND): Unsa man imong nabasahan Nyor?
NG: Sumala sa akong nabasahang mga unang taho Nyor, “resisting arrest” kuno maoy hinungdan nga gipamusil kining duha Nyor.
ND: Wa lang kaayo maayong pagkasuwat ang unang mga taho. Mas duol sa “resisting search” ang nahitabo. Matud sa mga nauwahing balita, nagtiner gihapog armas ang duha ka piniriso sulod sa prisohan mao nga giadto kini sila sa Criminal Investigation and Detection Group(CIDG-8) aron susihon. Apan matud pas taho dili magpa search ang duha ug hinuon niuna kinig pabuto sa ilang armas ug maong gipamusil sila sa mga sakop sa CIDG-8.
NG: Tinuod kaha ni Nyor?
ND: Aw, ang bakukang ray nasayud.
NG: Pagklaro bitaw, Nyor.
ND: Katuohan man sad ang maong saysay. Pero di mo usab ma wakli ang panahum nga binuhatan kini sa mga ninja cops.
NG: Unsa guy Ninja, Nyor?
ND: Kadto bang giingon ni Duterte nga mga pulis nga nalambigit sa drugas. Wa kita masayud basig may ninja cops sulod sa CIDG-8. Labi na kay duna kunoy nawagtang nga coverage sa CCTV sa maong bilangoan.
NG: Extrajudicial Killing napud ni Nyor?
ND: Aw kon ma probahan nga sinugo sa gobyerno ang maong operasyon ug nga ang bugtong tumong niani mao ang pagpatay ni Espinosa, matawag ta kini og ingon. Apan kon kalihukan lang kini sa mga ninja cops ang pagpatay sa binilangong mayor para di sila madamay sa imbistigasyon sa drugas, mas duol kini sa ninja moves kay sa extrajudicial killing.
NG: Mura naa say ninja cops diris atong dakbayan.
ND: Nganong nakaingon man ka niana Nyor?
NG: May nahimamat man gud ko taga Kamputhaw nga miingong dunay mga nasikop nga pusher nakapyansa ra. Wa na kuno siya kahibaw kon kinsay iyang sumbungan niani. Kining mga insidente nga sama niani Nyor maoy makapaingon sa uban nga ang Tokhang usa ka war against the poor.
ND: Duha naman ka influential nga mayor ang napatay ning maong kampanya kontra drugas nga makaingon ko nga dili na kini exclusively war against the poor. Pero maayo untang susihon sa mga Digongers nga dunay gahum kining imong giingon nga posibling may ninja cops sa Kamputhaw kay makadaut kini sa kampanya kontra drugas ni Duterte. Andam ra ba kaayo ang oposisyon nga mo ambak batok ning maong programa.
NG: Bitaw Nyor, may tag mahipos na tanang adik. Kay naa pa ang basura, trapik ug kahinay sa internet nga atubangon ning maong pamunuan. Apil baya kini silas mga saad ni Digong.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
