Gerard Pareja
Ug mitirag Tomahawk ang US sa Syria. Mga guided missile kini gipalupad gikan sa ilang mga barko de guira.
Ang Katarungan mao nga nakahimog kalapasan ang Syria dihang giingon nga migamit kinig chemical weapon batok sa mga rebelde sa ilang kagamhanan. Gibombahan sa kagamhanan sa Syria kining maong mga rebelde ginamit ang ginadiling “nerve gas.”
Makadaut kini sa nervous system sa mga tao nga duol sa lugar mao nga ang gobyerno sa US mitira sa mga air fields diin ilang gituohan nga maoy nahimutangan sa mga eroplano nga maoy mohulog ning maong mga ginadiling mga bomba.
Gawas ning maong kalapasan, nga matud pas gobyerno sa US nga karon gipangulohan ni Donald Trump, ang laing hinungdan nga nihimo sila ning maong lakang kay aduna silay mga sundalo sulod sa Syria nga nakigbatok sa ISIS ug malagmit mamiligro kinig apil sa epikto ning chemical bombs.
Ang pamunuan ni Obama niadto mibahad sa Syria nga makahiagom kini sa kusog sa US kon mogamit kinig chemical weapon. Apan wa panumbalinga sa Syria ang maong bahad. Ug ang America wa usab makatuman sa ilang gibahad.
Nganong wa man kini mahimo sa panahon ni Obama? Ug nganong nahitabo naman kini karon sa pamunuan ni Trump?
Una, dili buot mohimo og military solution lang sa maong problema kay kadaghan na masipyat ang America paghimo niani. Sayon ra kaayo ang pagtumba sa mga gobyerno sa ilang kontra apan ang problema kon unsay ilang ipuli niani. Ang ilang sipyat sa Iraq ug Libya nakapalig-on lang sa mga teroristang pundok sa maong mga lugar.
Ikaduha, dili sila makapasagad lag palagput sa pangulo sa Syria nga si Assad kay ang Russia nga daku og investment ning maong nasud gapaluyo man ni Assad. Mao ang gihimo sa US mao lang ang pagsuporta sa mga rebelde nga nababoy sa pundok ni Assad ug sa ISIS. Mura silag bibingka nga ubos ug ibabaw ang galuto nila.
Nahimo sa pamunuan ni Trump ang pagbunal sa Syria kay wala may long term policy ang iyang kagamhanan.
Buot paangkunon sa US media sama sa CNN ang kampo ni Trump nga tomahawk sa Syria mao ang unang lakang sa pagpalagput ni Assad.
Nagkapungapunga ang mga tao ni Trump.
Kay sa tinuoray lang wala pa kini sa hunahuna ni “counter puncher” Trump. Usa lang ka spanking daddy ang papel nga buot dad-on ni Trump: Kinsay magpabadlong bunalan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
