PDEA ray saligan, kataw-an lang

SUAREZ

Nagmaya ug nag-fiesta karon ang mga drug personalities.

With all due respect ngadto kang Presidente Duterte, usa g’yud ka inoplok ug hinanggaw kining iyang lakang nga gipaundang ang Philippine National Police (PNP) ug ipatugyan nalang ang tanan ngadto sa Philippine Drug Enforcement Agency (PDEA) ang mga anti-illegal drug operations sa nasud.

Mi-surrender ug mikakak na siya sa krusada?

Tungod lang kay gisaway siya sa mga kritiko subay sa mga gagmay’ng palpak sa police operations nag-atras abante na ang Presidente?

Naglisod man gani pagsumpo sa grabeng problema sa illegal drugs ang PNP taliwa sa subsob nga kampanya ug may insaktong numero sa mga tawo unsa na kaha kung PDEA ray pasagdan?

Unsa may kakayahan intawon sa taga PDEA nga gamay ra kaayog personnel?

Akong sublion akong baruganan niining kampanya batok sa illegal drugs, nga mas kampante pa ko nga dunay mga abusadong pulis kay sa pulis inutil ning krusadaha.

Maglaum ko nga sayohon kini paglibkas sa Presidente kung tinuud siya nga nagtan-aw sa kaugmaon sa mga batan-on ug sa mga pamilya.

Nabalaka ko nga daghan pa’ng sakop sa pamilya ang pamutlan sa ulo sa mga nangayabag nga mga amahan/bana tungod sa paggamit sa illegal nga drugas.

Kung maka-ayo sa nasud ang plano nga magtukod og revolutionary government aron pagpalig-on sa kampanya batok sa illegal drugs, nganong dugay-dugayon man sa Presidente?

* * *

Ang binuhatan sa mga barangay tanod sa Ermita nga nakapatay gikan nangsignit ug mipa-priso sa mga nakahimog krimen nga dili pasakaan og kaso maoy mipalig-on sa mga alegasyon nga mangdakup-pangwarta ang mga kanahan.

Kung wa mahitabo ang pag-patay sa gitoho-ang kawatan nga si Lendon Abadenas sa mga kamot nila ni tanod Junnel Sanchez ug Jerome Miral nagmata lang kita’g buntag.

Unsa may papel ni Kapitan Felicisimo “Imok” Rupenta sa pag-pick-up kang Abadenas?

Wa siya’y tulubagon ubos sa command responsibility principle? Ayaw ko’g ingna nga way kasayuran si Rupenta sa mga binuhatan sa iyang mga tanod?

Nganong nagbutang man sab si Rupenta og detention cell sa ilang barangay hall nga duol ra man kaayo ang Carbon Police Station?

Butang kini nga angay’ng imbestigahon og tarong sa Commission on Human Rights (CHR).

Si CHR Chief Investigator Leo Villarino miklaro nga mi-conduct sila og parallel investigation sa nahitabong pagpatay kang Abadenas ug ubang mga posibleng kalapasan sa mga opisyales sa Ermita.

Ilang imbitahon si Kapitan Rupenta ug pa-esplikahon. Kung tan-aw nila nga dunay possible administrative infractions, ilang iduso ang tanan ngadto sa Ombudsman Visayas.

Apan in fairness, ang hepe sa Carbon Police Station 5 nga si Chief Inspector Jacinto Mandal Jr. mipasabot nga isolated lang g’yud ang nahitabo sa duha ka mga tanod sa Ermita nga ila nang gikasohan og murder kay sumaa pa mga tarong ang sagad sa mga tanod.

Si Cebu City Councilor Joel Garganera mipasabot nga mas maayong mo-inhibit sila kung dunay mga recommendation nga imbestigahon si Kapitan Rupenta sa Cebu City Council kay di sila gusto nga mabahiran sa pamulitika ngan nga si Rupenta sakop sa Team Rama.

* * *

Pagkanindot sa balita nga nakamata na niadtong Biyernes si Cebu Archbishop Emeritus Ricardo Cardinal Vidal gikan nga nag-comatose, dungan sa ika-100 years nga anibersaryo pagpakita sa Birhen sa Fatima diin nagpahigayon kita og Grand Marian Procession.

Usa ba kini ka daku’ng milagro nga gipaambit sa Ginoo?

Wa sab malikayi ang pagtoo sa mga deboto nga usa sab ka dakung milagro ang dagan sa panahon niadtong Biyernes sa gabii nga misalmot sa prosesyon kay ang baga’ng dag-om napapas lang og kalit.

Nag-uwan-uwan man tuod gumikan sa bagyong Odette apan wa makabalda sa bagang duot sa katawhan nga mikuyog sa solemn walk procession gikan sa Capitol ground paingon sa Basilica Minore Del Santo Niño.