Gerard Pareja
Prapra blues. Kitang gilaay sa atong inadlawadlaw nga pamuhaton, dali kaayo nga ma-excite sa mga conspiracy theory.
Gikan sa mga theory kang Mary Magdalene ngadto sa mga pamaagi sa Illuminati paingon sa flat earth theory dayon liko ngadto sa UFO unya dive ngadto sa Mafia.
Ug karon nga nasunog ang Metro Ayala nabuhi ang dugo sa mga local conspiracy theorists. Dihay mipost dayon sa Facebook og: White Gold, Gaisano South, Metro Ayala.
Diha say mga mihisgut kabahin sa inventory nga gihimo kuno two days before sa sunog. Duna say mipasumbingay kabahin sa insurance.
May miingon nga nagdungan kunog kahuman ang kontrata sa abang sa Metro Ayala ug sa Marriott Hotel sa Ayala.
Matud pas usa ka taxi driver, nagduda siya sa timing sa sunog.
Nganong nahitabo man kuno kini sa panahon nga wala nay mga tao? Midugang siya nga sa mao usab nga oras gasugod ang sunog sa Gaisano South (Capital).
Kay wa man ta masayod sa hinungdan sa kayo di sab kita makatubag sa pangutana kabahin sa timing sa sunog.
Pero diha naman tingali mga higayon nga dihay mga sunog sa shopping center samtang diha pay mga tao apan dali kining napawong kay dali man kining nabantayan ug na tabang.
Sa mga pangutana kabahin sa inventory, murag dili man tingali ikatinga ang timing niani kay di ba paga himuon man kini inig katapos sa tuig. Ug di pud tingali tuyuon sa Metro ang pagsunog kay maangin ang ubang tindahan sa mall.
Dili lang baya sa Cebu nga nakig partner ang Ayala sa Metro.
Apan duna say uban nga mosumpay nga basin konsabo sab ang Ayala ning maong sunog. Ug mao kuno kini hinungdan nga wa motabok ang sunog gikan sa Metro paingon sa ubang bahin sa mall.
Sagdi lang kunog masira kadiyut ang mall kay puros ra man mga tenants sa Ayala ang naa sa sulod unya naka advance naman kini sila.
May miingon usab nga kon mabantayan mas daghang karaang building ang nasunog ka sa gipanguba.
Ug may midugang nga kon masunog gud ang building maka kobra man ang tagiya sa insurance.
Kon iyang gub-on iya ra tanang gasto.
Mas daghan man ko og memories sa mga coffee shops sa malls kay sa metro mismo mao nga di kaayo ko ma sentimental sa iyang pagka hanaw.
Hinuon mosabot ra ko kon maguol tong akong mga higala nga kusog kaayo mo linya sa mga libring sample sa Metro Ayala Grocery.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
