SUAREZ
Kinahanglang isog, mag-inampingon ug modoble sa iyang security si former Cebu City Mayor Michael Rama kung modayon siya nga mo tandem kang Vice Mayor Edgardo Labella ug makigharong sa tandem nilang ug Councilor Mary Ann Delos Santos.
Nakuyawan ko kang Rama nga may dautang mahitabo kaniya kay posibleng sakyan sa mga demonyo kining sunod-sunod nga patay karon.
Nabalaka ko nga masusama sa nahitabo kaniadto kang drug personality Crisostomo Llaguno alyas Tata Negro kinsa iyang amigo ug mikandidato pagka Cebu City Councilor nga gipusil patay didto sa Lorega samtang nangampanya.
Ang pakig amigo ni Rama ug pakigduwa niya’g basketball kang Tata Negro kaniadto usa sa mga sukaranan nganong gihinganlan siya ni presidente Duterte nga drug protector.
Niadtong Sabado sa hapon atol sa among programa’ng “Dialogue On The Air” sa DYSS Super Radyo, giklaro ni Cebu City Police Director S/Supt.
Royina Garma nga wa siya’y listahan sa mga narco politicians dinhi sa dakbayan sa Sugbo.
Dili kapasalig si Garma nga makahatag og insaktong seguridad kang Rama ug ni bisan kinsang mga politiko ning nagkaduol nga eleksiyon.
Misambingay si Garma nga manubag gyud ang mga kandidato kung may kalambigitan sa illegal drugs.
Kung mangayo og police escort sutaon pa sa PNP kung may hulga sa kinabuhi unya ang central office sa Camp Crame maoy mohatag.
Maayo lagi unta kung i-clear si Rama ni presidente Duterte sa dili pa ang deadline sa filing sa COC karong Oct. 17 nga adlaw’ng Miyerkules.
In fairness hinoon, way history sa pulitika dinhi sa Siudad nga nagpinatyanay ang mga politiko.
Dili sab tingali maka-ako ang ilang kontra nga ipapatay si Rama.
Ang akong nakuyawan nga sakyan unya sa mga demonyo nga mga drug lord aron dauton ug pasanginlan ang presidente nga maoy utok sa krimen.
* * *
Kadtong usa sa mga survivors sa pagpamusil-patay sa Barangay Malubog duol sa Ayala Heights diin lima ang patay, nga si Charmaine Porral, nakuhaan na og judicial affidavit sa Commission On Human Rights (CHR-7).
Sumaa pa ni Special Chief Investigator Leo Villarino nga mi-abot og 6 pages ang affidavit ni Porral.
Dunay mga pangan nga gitumbok ni Porral nga mga responsable apan wa mikompirmar si Villarino kung mga pulis ba gyud.
Way recantation si Porral sa media interview nga mga pulis ang mi-pick up kanila ug midala didto sa Malubog.
Apan bisan giklaro ni Villarino nga dili pag-umangkon si Porral kang confessed drug lord Franz Sabalones apan tataw pa sa klaro nga involve siya sa illegal drug trade.
* * *
Kung wa ko makabasa sa facebook account ni Visayas Court of Appeals (CA) Executive Justice Gabiel Ingles wa koy kalibutan nga kutob ra siya niadtong Miyerkules (October 10) sa maong katungdanan.
Gipahibawo ni Justice Ingles nga ang bag-ong mokupot sa maong puwesto sa Cebu Station mao si Executive Justice Edgardo De los Santos.
Maglaum ko nga ang nasugdan nga reporma ni Justice Ingles, ang kaligdong sa opisina ug ang competence ipadayon sa mga magsunod.
Sa iyang panahon puwera buyag, wa koy nadunggan nga estorya nga “justice for sale” ug “TRO for sale.”
Alang nako deserving gyud si Executive Justice Gabby nga mahimong Chief Justice sa Korte Suprema puhon.
Niadtong RTC Judge pa ni siya wa gyud masilaw sa binuwan nga allowance gikan sa Cebu City ug Cebu Provincial governments aron dili magawngan sa iyang desisyon sa mga kaso.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
