Klase na gyud ron sa mga public schools

Bisan duna pay daghang nangagusbat nga mga school buildings mugna sa bagyong “Yolanda” ug linog sa Bohol, madayon gyud ang pag-able sa mga klase karong adlawa sa mga pampublikong tunghaan sa kinder, elementary ug high school.

Sagad sa mga private schools, unya pa sa Hunyo 9, sunod Lunes, magsugod ang klase.

Way mahimo ang mga estudyante ug mga magtutudlo nga gipanglaay pa gikan sa summer vacation, gawas sa pagsulod ug pagsugod dayon sa klase bisan adto pa ilawom sa punoan sa “mangga” o bisan sa tolda magpahimutang kay maoy katuyoaan sa central office sa Department of Education (DepEd)nga sugdan na gyud ron.

Niadtong Sabado sa hapon atol sa among programang “Dialogue on the Air” sa dySS Super Radyo, ang gipadala nga mga representante ni Department of Education in Central Visayas Director Carmelita Dulangon gikan sa lain-laing school divisions sa Sugbo, pulos mipadayag og kaandam sa pagbukas sa klase karong adlawa.

Kini bisan pa man nga nagkuwang kita sa mga magtutudlo, kuwang sa mga classrooms, libro ug sa ubang giatubang nga mga suliran.

Sa naandan, mosamot pa gyud kadaghan ang mga magpa-enroll karong adlawa ug sa mga mosunod nga mga adlaw kay daghang mamalhin sa public gikan sa private schools tungod sa kamahal na sa tuition fee.

Ang taga-DepEd-7, nakadawat og daghang reklamo gikan sa mga ginikanan ug mga tinun-an kay dili ihatag sa gigikanan nga private schools ang ilang grado (form 137) tungod kay may utang nga gibiyaan.

Ang advice mao nga i-settle na lang pinaagi sa promissory note ug di sab puwede nga balibaran ang pagbalhin sa pag-enroll sa public ug hatagan ang estudyante ug ginikanan hangtud July 31 pag-submit sa mga papeles nga requirements.

Tungod sa pagsugwak sa gidaghanon sa mga estudyante, mapugos gyud pagpatuman nga magklase tulo lang ka adlaw sa usa ka semana alang niadtong mga lugar nga kuwang gyud kaayo sa mga classrooms.

Ang gihimo sa ubang eskuwelahan mao ang pagpahigayon og evening classes.
In fairness sa taga-DepEd-7, kini maoy alternatibo sa pagsulbad sa problema aron kahatagan gihapon og mas epektibo ug de kalidad nga edukasyon ang tanang kabataan.

Padayon karon ang panawagan sa taga DepEd nga sila katabangan sa tanang sector nga makabangon na sa hingpit ilabina ang mga tunghaan sa northern Cebu nga apektado kaayo ni “Yolanda.”

* * *

Pagkanindot kun matuman na sa hingpit ang dugay nang gipangandoy nga Cebu Bus Rapid Transit (BRT) system aron masulbad na ang problema sa kahuot sa traffic sa kadalanan dinhi sa dakbayan sa Sugbo.

Gawas nga daghang pasahero nga makarga niini, paspas pa gyud kining managan ug minus ra sigurong aberiya ug disgrasya kay mga bag-o man kining matang sa mga dagkong sakyanan.
Pero unya nako motuo kun ma-realize na kining maong proyekto sa 2017 kay lahi ra ba kining istorya ra kutob nga mihatag na og go signal ang National Economic Development Authority uban ni Presidente Benigno Aquino III.

Asa man ta og funding niini? Mangutang na sab ug P10.6 billion? Wa kaha mahulga ang mga public utility jeepney (PUJ) operators niining BRT system?

* * *

Sa akong basa niining yango-ngo sa mga operator sa PUJ dinhi sa Sugbo, ilabina sa Citrasco nga magpausbaw sa pletehan, molampos man tuod sila sa pagpangayog increase apan kuli kaayong aprobahan nga himoon nang P10 pesos ang plete.

Kini gumikan kay ang Land Transportation Franchising and Regulatoy Board sa Manila igo rang miuyon sa pag-usbaw og 50 centavos sa plete didto sa National Capital Region ug ubang parte sa Luzon nga buot ipasabot nga tag-P8.50 na ang plete didto sa unang upat ka kilometro ug tag 10 centavos ang mosunod nga kilometro.

Dili kaha mag-rebelde ang taga-Manila nga mas mahal pa ang plete dinhi sa ato ikomparar sa ilaha?

Magpaabot na lang ko nga inig public hearing daghan ang mouyon nga gikan sa P7.50 himoon na lang P8 aron igo-igo ra sab ug duna nay ikasukli ang mga driver.

In fairness, dugay nang naalkanse ang riding public kay bisag P7.50 pa ang plete, dili na maghuna-huna og sukli ang driver.

Hinuon, dili sab sala sa mga driver kay nahurot-hurot na gyud ang mga sensiyo karon.