Mosamot gyud kalangay ang kaso ni Archival

Pagkapait baya sa kasong pag-ambush patay nilang manlalaban Noel Archival kay mosamot gyud kini kalangay kay supak ang mga suspetsado nga mga opisyales sa Highway Patrol Group in Central Visayas nga anhi sa Sugbo ang preliminary investigation.

Kagahapon nanawag ko sa abogado nga si Inocencio Dela Cerna aron pagkuha sa iyang komentaryo nga gibalhin kining maong kaso kang Lapu-Lapu Asst. City Prosecutor Jesus Rodrigo Tagaan.

Apan miingon si Dela Cerna nga moduso sila karong adlawa og motion to defer proceedings and holding in abeyance aron ipauktaba ang preliminary investigation sa kaso.

Buot ipasabot sa abogado nga ilang i-exhaust ang tanang legal remedies aron gyud nga mabalhin sa Manila ang preliminary investigation kay maoy gusto sa iyang mga kliyente nga adto gyud sa kaulohan.

Miingon usab ang abogado nga dili gyud ni paglangay-langay sa kaso.

With all due respect, kang Dela Cerna, ngan nga siya maoy legal counsel sa tanang mga suspects, ayaw kog ingna nga di siya makatambag nga abuso na ning ilang gihimo.
Kun makadepensa sila si Dela Cerna sa mga kasong giatubang sa iyang mga kliyente sa bisan asang

forum, nganong mahadlok man sila sa mga Sugboanong piskal nga maoy mohawid sa kaso?

Dili pa ba lanog ug dili pa ba klaro sa mga suspetsado ug sa ilang mga abogado nga gisalikway na ilang hangyo sa Department of Justice Manila nga didto himoon ang preliminary investigation?
Unsa man ning ila, dili ni paugat?

* * *

Dili sa ingon nga mituo ko nga drug-related ang pagpusil-patay kang Richard King didto sa dakbayan sa Davao apan natinga lang ko nganong dali kaayong gisalikway kining maong anggulo ni Davao City Mayor Rodrigo Duterte.

Nahadlok si Mayor Duterte nga siya maoy masentro sa imbestigasyon sa atong mga law enforcement agencies?

Dunay mga pronouncement ang mayor kaniadto nga kontra kaayo niya ang mga nalambigit sa drugas sa ilang lugar. Gani ang makontra sa mayor mabiktima gyud sa summary execution pinaagi sa Davao Death Squad.

Nganong gi-unhan man sa mayor ang kapolisan nga misubay sa tanang anggulo pagpatay sa negosyante?

Sama lagi sa giklaro sa kapolisan nga ilang subayon ang tanang possible angle ilabina kung business-related, personal ug uban pa.

Bisan ang kabahin sa gugma, utingkayon gihapon sa kapolisan kay mitumaw sab ang anggulo sa “love triangle.”

* * *

Kinsa man gyud ang opisyal sa Kapitolyo ang nakigsabot ug nimando sa taga-Black Pearl Security Agency (BPSA) nga mo-duty dayon niadtong June 1 bisag way kontrata ug bisag way dokumento nga nagpalig-on nga ang BPSA maoy midaug sa bidding?

Dili lagi intawn buang ang tag-iya ug mga kadagkoan sa BPSA nga mo-take over pagbantay sa Kapitolyo kun way nagpasalig.

Ang tunog kaayo nga mga pangan nga maoy nagbuot-buot mao sila si Provincial General Services Office officer -in-charge Jone Siegfred Sepe ug chairman sa Bids and Awards Committee nga si Provincial Legal Officer Orvi Ortega.

Kun tinuod man nga kining duha ka mga opisyal maoy nakaingon nga naghatag og buling sa administrasyon ni Gov. Hilario “Junjun” Davide III, oras na tingali nga dili sila kompyansahan.

Way plano ning duha ka mga opisyal nga mang-resign out of delicadeza?

Kung akoy Governor Junjun, mag-usab pay layog niining mga kaalyado nga naghugaw-hugaw.
Kinahanglang magbantay na si Gov Junjun sa mga tawo nga nagpalibot kaniya ilabina nga nagkaduol na ang panahon sa tingpanudya.

* * *

Salamat nga nasulbad na gyud ug wa nay gubot ang Talisay City College (TCC) human mi-take over sa management si Regional Director Ferdie Bernal sa Commission on Higher Education nga miresulta nga daghan na kaayo ang nagpa-enroll sa TCC.

Maglaum ko nga niining pagdumala karon sa TCC ni Dr. Joseph Sol Galleon, assistant dean sa Cebu Normal University, wa nay motumaw nga mga kontrobersiya.

Kinahanglang ipakita ni Talisay City Mayor Johny Delos Reyes ang tim-os niyang suporta.