Mingawon na ko sa paraygon nakong inahan

Nakapahinuklog  kaayo kanako ang  sugilanon sa usa ka bata nga naglaum ug nagtinguha nga  maluwas pa sa nag-umbaw nga kamatayon ang nagtinga ug nagpenal niyang pinanggang inahan.

Ang bata nakadungog sa istorya sa iyang mga uyoan ug mga iyaan  nga “only a miracle” ang makasalbar  sa  iyang mama nga  nag-antos sa dakong sakit.

Mao nga ang  gihimo sa bata ug aron makatampo sa kasulbaran sa maong suliran, iyang gibuak ang iyang alkansiya ug dali siyang  miadto  paingon sa botika.

Samtang ang bata nga didto na sa pharmacy, nagbakho ug mapaubsanon kaayo nga miatubang sa mga tindera ug nagkanayon nga “Ma’am  papalita gud ko sa tambal nga gitawag ug miracle aron mabuhi ang akong inahan.”

Ang mga pharmacist nga nakasabot  sa mensahe sa bata pulos natulala  ug nanaglumba  sa  pagpadagayday  sa ilang mga luha sa  nasinating  problema  sa bata.

Kining  istoryaha,  way  kalainan sa nahitabo  sa  among inahan nga si Mama Ernesta kay  pagkahuman sa iyang atake sa   high blood didto sa among ancestral  home sa Casay, Dalaguete niadtong Lunes sa gabii na-comatose  dayon siya kay dihay  ugat  sa utok nga  nibuto nga  miresulta sa pag-ipon  sa dugo ngadto sa  iyang  utok ug  midominar kini sobra  50 porsiento sa  parte  sa  utok ug anaa pa gyud  sa  wala  nga bahin.

Si Dr. Wyben Briones  kinsa usa ka expert neurosurgeon ug ubang  mga doctor  sa Chong Hua  Hospital,  mipakita kanamo sa resulta sa CT-Scan ug mipasabot  kanamo  nga lisud  na gyud  ang  kahimtang sa among  inahan ug  anaa  sa  critical stage unya 30 porsiento na lang ang  chance of  survival.

Naglakaw  ang  mga adlaw nga gi-monitor ang kahimtang  ni Mama  sa ICU, na-obserbahan gyud nga  ni-deteriorate  ug  samot  ang  iyang kahimtang  mao nga wa  gyud  morekomendar  si Dr. Briones alang  sa surgical operation  ug mibana-bana siya nga four to five days na lang  ang  kinabuhi sa among  inahan.

Hangtud  nga  niadtong Biyernes sa buntag  namatay  gyud si Mama Erning ug  wa gyud masipyat si  Dr. Wyben Briones sa iyang estimate.

Magpasalamat  kaayo  ko  ni Dr. Briones  kay miprangka gyud sa kahimtang ni Mama  ug  wa mi  niya  palauma.

Mao nga  nakakat-on kami sa pagdawat  sa  pinakasakit  nga mahitabo nga  mao ang kamatayon kay  pagbuot  na gyud sa Langitnong Amahan nga  maoy  tag-iya.

Wa  nay  magmahay kanamong  11 sa 13 ka  mga  anak nga  nagpabiling  buhi  ingon  man  iyang mga apo nga  50  ka buok  ug 25 ka  apo sa  tuhod  kay taas na gyud  ang iyang serbisyo.

Sietenta y nueve anyos na sab si Mama ug  alang  nako, bastante  na kaayo ang iyang  kinabuhi.

Pagkakaron, anaa pa  ang  iyang  patayng lawas sa  Jerusalem  chapel  sa Saint Peter sa Imus ning dakbayan  ug amo siyang dalhon ugma sa buntag  sa Casay, Dalaguete ug  possible  nga  ang  lubong   himoon karong  July 12  didto sa  Santa  Monica Parish cemetery kay  amo  pang gipaabot  ang duha  namo  ka mga igsoon gikan sa  Iceland.

Kadto  gyud hinoon si  Mama puwerte gyud kakugihan. Maayo  kaayo mangita  og  paagi  aron  dili  kami  mangapasmo taliwa sa among kadaghan.

Nahinumdom pa  ko  niadto nga puwerteng  alegreha gyud sa  among  kan-anan  kay 15 kaming  mangaon sa  taas kaayo  namong  lamesa  unya  sarten  pa  ang  plato kaniadto  nga  puwerteng  saba-a.

Lab-as pa kaayo sa akong mga panumdoman niadtong mga hinapos nga bahin sa 1970s  paglaling sa akong  inahan  uban sa akong mga  maguwang gikan sa Dalaguete paingon dinhi sa Siudad  aron  pagtinda og  painitan  ug  kan-anan diha sa dalan Borromeo sa barangay Pahina Central.

Grabe gyud ang  sakripisyo nga  gipas-an sa akong inahan aron makatabang sab ni anhing papa Berto pagbuhi  namong 13 ka buok ug ilang  mapaeskuwela sa kolehiyo.

Mao nga magpasalamat  kaayo ko og  daku  sa akong  inahan  kay  wa gyud intawon  mibuwag sa iyang responsibidad nga nagpalaylay sa iyang  mga bukton kaniadto.
Sa ngan sa tibuok pamilya akong pasalamatan ang tanan nga  miduyog  sa  among  kasub-anan  niining mga panahuna.

Daghang salamat nila ni Sir Bobby Nalzaro, ni Vice Mayor Edgar Labella, ni Sir Carlo Duga-duga, ni Ador Mayol, ni Super Jasmine Vailoces,  ni manlalaban Ruphil Bañoc  ug pare Eddie Bulang nga nakagahin sa pag-vigil niadtong  Sabado sa gabii.