In fairness ni Cebu City Councilor Mary Ann Delos Santos kinsa maoy nahimong tigpamaba sa Bids and Awards Committee (BAC), dunay rason nga iyang gibutyag sa mga sakop sa media ang action nila sa BAC pag-disqualify sa WTG Construction ug ang Manila based partner niini nga A.M. Oreta and Co. Inc alang sa pag-construct sa first phase sa Cebu City Medical Center.
Busa kalma lang Mayor Mike kay usa sa mga gisaad nimo kaniadtu mao nga ipatuman gyud sa imong liderato ang “transparency”.
Ang gihimo ni konsehal Mary Ann mao man ang pagtuman sa “transparency” ug kaangayan.
Dili gyud angay’ng ikasuko kay premature pa man kaha ug puwede pa man makaduso ug motion for reconsideration.
Kung seryosohon ni Mayor Rama ang action sa BAC, magduda ko nga nakasaad siya sa taga WTG Construction ug sa partner.
Mag-unsa man ang WTG bisag lowest bidder apan wa makatuman sa tanang rekisitos? Ang rason nganong ipa-disqualify tungod kay “insufficient documents” and “false information and discrepancies”.
Nganong dili man ang taga WTG maoy nagpadayag sa kahiubos? Nganong si Mayor Rama man?
Lain kining eksena sa done deal sa mga proyektu sa gobyerno?
* * *
Manubag gyud si Epifania Bajes sa kamatayon sa iyang live-in partner nga si Alonie Olasiman kinsa nakit-ang patay niadtong November 2 nga putol na ang ulo ug ang kinatawo didto sa Sitio Makatol Barangay Biga dakbayan sa Toledo.
Nganong giputol man gyud ang kinatawo ni Alonie? Tungod sa selos ug kalagot ni Epifania ngadto sa live-in partner?
Kung may kalagot man ang mga kadugo sa babaye ngadto sa biktima, dili layo ang posibilidad nga si Epifania ray tinubdan sa mga kasilag kay maoy nahibawo sa ilang relasyon?
Asa man kaha intawon ang ulo sa biktima? Butang kini nga angay’ng sulbaron nilang Supt. Ricky Delilis hepe sa Toledo Police Station.
Akong tan-aw dili lisud sulbaron sa kapolisan kining maong krimen kay gugma maoy sukaranan niining tanan.
* * *
Pagkalooy tawon sa 5 anyos nga batang lalaki nga si Christian Dave Alferez nga naanod sa sapa sa Lutac Naga niadtong Lunes.
Pagkapaeta gyud kay tsinelas ray hinungdan sa kamatayon sa bata kay iyang gikuha sa sapa gikan nga natagak ug nataymingan pag-abot sa kusog nga bul-og sa tubig mugna sa kusog nga uwan.
Hisgot tag tsinelas, tsinelas ra say napatyan niadtong anhing Mario Alfie Ducayag kinsa gitabangan ug kulata sa mga guwardiya human gitoho-an nga nag-shoplifting sa Gaisano Metro Colon sa tsinelas nga branded.
Balik kita sa kaso sa bata, makaingon ko nga ang sobrang kompiyansa sa mga nagbantay sa bata maoy angay’ng mabasol.
Mag-unsa man intawon ang apuhan kung kanunay’ng wa pirme ang iyang mga ginikanan?
* * *
Mangambot lang ko kung matuman ba gyud ang unang saad sa mga dagkung opisyal sa korte nga makabalhin na karong buwana ngadto sa 3rd floor sa Qimonda I.T. Center ang mga huwes sa Regional Trial Court.
Kagahapon, mitug-an si Engr. Henry Espinoza, Deputy Building Administrator nga dunay mga technical personnel sa Korte Suprema nga moabot karong November 17 aron mosubay sa kalambuan sa trabaho sa Qimonda.
Ang importante alang sa mga huwes ug mga abogado mao gyud ang air condition sa matag korte kay hangtud karon puwerte pa gyung inita sa Qimonda.
Maglaum sab ko nga masulbad na gyud sa management sa Qimonda ang kakuwang sa supply sa tubig kay puwerteng paeta gyud kung way tubig.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
