Are you superstitious? Ang akong amigong manunulat nga si Sawi Fox Aquino miangkon nga superstitious siya. Wa siya mag-inusara. Ang painter nga si Pablo Picasso ug ingon man ang anhing Presidente Marcos giingon man nga superstitious o motuo sa mga tinuohan nga wala pa maprobar ang kamatuoran.
Ang mga Insik nga produkto sa usa sa pinaka karaang civilization sa kalibutan mao usay pundok sa katawhan nga pinakadaghan og superstition. Gani na lakip na kini sa ilang panan-aw sa kinbuhi. Ang paglikay sa number 4 apil niani ug ingon man ang I-Cing (Book of Changes) ug Fung Sui nga usa ka sistema nga konsultahon kon duna kay ipatukod.
Ang laing pang tinuohan sa mga Insik mao ang Ghost Month. Alang kanila, karong buwana, Agusto, mao ang ting gawas sa mga kalag gikan sa ilang nahimutangan para mobisita sa mga buhi. Dunay pipila kanila nga mo connect sa mga kalag sa kamatayon o kapildihan mao nga moingon sila nga hinay ang negosyo sa Agusto kay Ghost Month kini.
Sa akong napupo gikan sa Internet, aduna silay mga ginadili karong buwana. Dili maayong mangihi sa kahoy kay pinuy-anan kini sa mga kalag. Dili usab maayo nga magminyo karong buwana kay ting gutom kuno ug malagmit dimalason ang magtiayon sa ilang panag-ipon.
Dili usab kuno maayo ang magpagabii sa gawas kay basin og dunay kalag mosunod kanimo inig nimo pauli. Gihimangnoan usab sila nga dili mag swimming kay lagmit ma tripan ang naglangoy sa ispiritu sa tubig og birahon kini paingon sa ubos. Kon mahimo dili ka pabisitahon sa himatyon, patambungon og bilar, pagbalhin og panimalay ug ingon man pagsugod og bag-ong negosyo.
Kon motuo ka nianing ghost month, ayaw pag sul-ob ug itom ug puwa nga sapot ug likaye ang paghisgut-hisgot sa mga kalag. Di ka usab palaagon sa lasang, di ka pahayhayon sa gabii ug ipasirag maayo ang inyong portahan dayon ninyong katulog.
Daghan ang ginadiling buhaton ning buwan sa mga kalag apan daw masuma ra kini sa usa ka linya: Ayaw pagkiat. Ang practical nga purpose niani alang sa mga negosyante mao nga makapahuway una silag usa ka buwan.
Matud pa nianing site nga akong gitan-aw, ang Ghost Month magsugod karong pitsa 14 ug mahuman inig September 12. So, suspended sa ang tagay?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
