Pila man gyud ang budget sa pagkaon sa matag pulis per day nga nag-secure karon sa mga delegado sa APEC summit? Tag P500.00 or tag P300.00?
Pilay porsiento paingon sa corruption?
Kung tag P100.00 kada kaon, duna gyu’y tinunto sa budget kay tiaw mo na ang packed meal gisudlan lang og lagom nga kan-on, gagmay nga slice sa manok nga gibulit sa baga nga harina ug pansit nga way subak. Pastilan!
Kanyahay ra nga ang publiko lahap kaayong mohukom sa Philippine National Police (PNP) nga usa sa labing corrupt nga government agency.
Nganong wa man ipaagi sa public bidding ang pag-supply sa pagka-on nga dugay naman silang nasayod bahin sa APEC meeting?
Kung way nakasapi nga opisyal sa PNP, nganong wa may kahadlok ang mga caterers pag-supply og pagkaon nga maguwang sa pagkaon sa iro?
Kinahanglang imbestigahon kini og tarong.
Nganong wa naman lang i-derekta paghatag ngadto sa mga pulis ilang budget sa pagkaon? Ang rason lisod kuno pag-liquidate. Nganong lisod gud tawon nga sayon ra man papirmahan sa mga pulis nga hatagan. Palusot pa more!
* * *
Risgo gyud ang kinabuhi namong mga sakop sa media basta magkaduol na ang eleksiyon ilabina kadtong magsige’g ataki sa mga politiko.
Di kalikayan nga maglagot gyud ang mga politiko ilabina kung pasobrahan ang komentaryo ug pagpangataki nga malisyoso na ug personal na kaayo o ba kaha klaro na kaayong nabayran sa kontra.
Ang sekreto maghinay-hinay lang o ba kaha likayan ang pagtuki sa politika ilabina inig sugod na sa campaign period karong Enero.
Wa ko mamasangil nga usa ka politiko didto sa Mindanao ang mastermind pagpusil-patay kang radio commentator Cosme Maestrado didto sa Ozamiz City sa Misamis Occidental, apan posible ug kinahanglang subayon kini sa atong mga otoridad.
Wa ko makaila kang Maestrado ug wa ko makadungog sa iyang mga sibya sa DXOC kinsa giilang hard-hitting anchorman. Apan kinahanglang mahatagan og hustisya ang iyang kamatayon.
Pero ang pangutana, kung di ba kini masusama niadtong 32 ka mga sakop sa media nga naapil sa Maguindanao massacre nga hangtod karon lubog pa sa diyes panas?
* * *
Wa nako matingala sa resulta sa pinaka-latest nga survey sa Social Weather Stations (SWS) nga ang buhatan sa Bureau of Customs (BoC) maoy pinaka-kurakot nga opisina sa gobyerno.
Puwera gaba gyud niining taga BoC, kay ultimong mga ginagmay’ng mga butang nga pinatuloan og luha’g singot sa atong mga OFWs alang sa ilang mga kabanay dinhi sa Pilipinas, buot pa’ng tulison sa mga kanahan.
Kung wa mohimog kawsa ang atong mga OFWs pagsupak nga ablihan ilang mga pinadala nga mga balikbayan boxes, tan-aw ko pagkadaghan kaha’ng mga butang nga makawat.
Gawas niini, dili kapanghambog ang taga BoC sa ilang performance kay mas mi-grabe karon ang palusot sa mga smuggle nga mga mahalong butang. Ilabina nga ‘ber months na.
Sa survey sa SWS, nakakuha og “very bad” rating o score nga negative 63 (-63) ang BoC kabahin sa hisgutanan sa pagpakigbatok sa corruption. Mao sab diay ni ang resulta sa survey niadtong 2013.
Wa na sab ko matingala sa ubang mga ahensiya sa gobyerno nga nakakuha sab og negatibong rating nga mao ang Philippine National Police (PNP), Department of Public Works and Highways (DPWH), House of Representatives ug Land Transportation Office (LTO).
Apil sab sa nakakuha ug minus nga grado mao ang Office of the President, Department of Health (DOH), Department of Social Welfare and Development (DSWD) ug ang Department of Interior and Local Government (DILG).
Nagpasabot gyod nga ang resulta sa survey, inutil ang Aquino administration sa ilang kampanya nga “Tuwid na Daan”.
Unsa may nawong nga ikaatubang ni DILG Secretary Mar Roxas sa katawhan nga mismo iyang opisina hagbong man sa survey pagpakigbatok sa corruption?
Unsa may iyang moral ascendancy pagpadayon sa daang matuwid nga nagsige’g kapandol ug kanunay’ng natakilpo?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
