Nyor Dako (ND): Unsa mang sayawa, Nyor, nga dunay atras-abante nga mga steps?
Nyor Gamay (NG): Duhay akong mahunahunaan, Nyor. ang Chacha ug ang Sinulog.
ND: Ah, wa pa diay nimo ma update ang imong data file, Nyor?
NG: Ha? Ngano man, Nyor?
ND: Wa pa man nimo naapil ang Duterte dance.
NG: Ataka gyud nimo, Nyor, uy. Pero mudagan na baya gyud siya, Nyor. Mao ni giingon ni Senator Peter Cayetano.
ND: Di pa gani to dugay nga niingon siya nga dako kaayo ang problema sa Pilipinas ug nga sa iyang tan-aw, dili siya makasulbad nini.
NG: Pero nagkanayon ang senador nga didto kuno sa usa ka panagtigom sa Dasmariñas, Cavite diin nipadayag ang mayor sa Davao nga modagan na gayud siya pagka presidente. Nasuko kuno ang mayor kon nganong gi-dismiss ang disqualification case batok kang Grace Poe. Usa kuno kini ka pagyatak sa Constitution.
ND: Sure na ka? Karon pa ko mahibawo nga Constitutionalist diay nis Duterte. Ang rumor niadto nga kon ma disqualify si Poe unya mapriso si Binay, mudagan si Duterte kay daghan man ang gatuo nga sayon ra niya malabhan si Roxas. Apan karon mudagan naman hinuon siya tungod kay nasuko siya nga wa ma-disqualify si Poe. Gulpe de gulat ning iya, Nyor, o padugang sa pusta?
NG: Basig si Poe ug si Duterte maoy mag showdown rong 2016, Nyor.
ND: The Foundling vs the Godfather. Godfather against drugs and other crimes ang image ni Duterte. Samtang ang drama ni Poe mao ang batang kinit-as simbahan.
NG: Murag sine!
ND: Unya sa imong tan-aw, Nyor, kinsa may kontrabida?
NG: Ah… Piligro tuod og makontrabida ang Clint Eastwood of Davao. Pero di ba sakto man ang iyang panahom tali sa citizenship ni Poe binasihan ang Constitution?
ND: Ingnon ta nga sakto ug tinuod ang iyang gipanulti, apan dili baya fact finding ang panguhag simpatiya sa mga botante. Kay pulong pas Team Rama, winning hearts baya kuno ang pamaagi sa pagdaog og eleksyon. Unya padulong na ra ba tag pasko ug ang imahin sa batang babaye nga gibiyaang gapatong sa pangurusan daw mopahinumdom kanato ni Moises nga gisulod sa basket ug nga gipalutaw sa sapa ug ni Kristo mismo nga nagpasilong sa pasungan. Kay kon ang iyang base sa pagdagan gatubod sa iyang kayagutgut batok sa paghatag katungod sa batang kinit-an, daw nasusama siya kang Herod nga buot kuhaag kinabuhi ang mga batang lalaki nga nahimugso sa pagbutho sa dakong bituon didto sa Jerusalem.
NG: Bitaw, Nyor, maayo tag usbon sa kampo ni Duterte ang ilang kampanya ug di na kabahin sa citizenship ni Poe.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
