Super Hirit
With all due respect, nagpasulabi gyud ang taga Korte Suprema pagpahimolos sa Cebu City government niining ilang pagpangayo og mas daku nga lote diha sa South Road Properties (SRP) nga mo-abot sa 1.5 hectares.
Wa pa gyud sila ma-kontento sa gihatag sa Siudad niadtong tuig 2010 nga mi-abot sa 7,123 square meters diha sa SRP.
Unsa may pagtoo sa mga kadagko-an sa SC ug sa nag-draft sa proposed deed of donation, gipangpunit ra sa kalsada ang kwarta pag-ugmad diha sa SRP?
Nagkagidlay gani ta’g binayad. Pwerte man gani’ng away ron sa mga iresponsable natong mga politiko pagbayad sa atong loan sa JICA ug sa Land Bank of the Philippines.
Unsa man sab ni ka tinuod nga sa maong draft nga deed of donation, mi-uyon na si Cebu City Mayor Michael Rama? Way plano ang konseho nga magpatawag sila og public consultation aron paminawn ang pulso sa mga magbubuhis?
Ang ako ba pagka wa gyu’y delicadeza sa mga kadagkoan sa Korte Suprema nga nangayo’g dako nga parte sa SRP ngan nga daghang mga kaso sa kagamhanan sa
Syudad nga naka-pending sa atong mga sala sa korte diha sa Qimonda I.T. center.
Usa sa mga kaso nga naka-pending mao kadtong gipasaka ni Romulo Torres nga dili ipa-gasto ni Mayor Rama ang tipik sa halin sa SRP nga maoy gihimong rason karon sa taga BOPK nga dili ipasar ug dili tuki-on kadtong proposed Supplemental Budget No.1 sa miaging tuig nga atua didto ang kantidad aron bayran ang tibuok nga utang sa SRP.
Alang nako dili na angayang pun-an pa sa Siudad ang gihatag nga 7,123 sq. m sa Korte Suprema kay daku na kaayo ug insakto na nga makabutang sila og daku’ng building nga i-house ang ilang gidamgo nga “new and iconic” Hall of Justice.
Gawas niini, nakahatag sab ang Cebu Provincial government og lote sa Supreme Court diha sa may DA compound sa M. Velez nga maoy tukoran sa Court of Appeals.
Unya ang karaang building sa Marcelo Fernan Hall of Justice nga anaa diha sa Capitol compound nga gibiyaan sa mga huwes ug mga kawani pwede pa nilang ayuhon ug utingkayon ang mga papeles uban sa taga Kapitolyo.
Kung interesado ang mga kadagkoan sa Korte Suprema nga mo-avail ug dugang lote, nganong dili naman lang mamalit diha sa SRP nga kwartahan man unta ni sila kay naka-abang gud diha sa Qimonda og tag 1.2 million ang buwan?
* * *
Wa gyud mapan-os ang akong pagduda kang Lito Paculanang nga mosibog sa iyang pamasangil ngadto sa pito ka mga pulis nga mga sakop sa City Intelligence Branch (CIB) sa Cebu City Police Office nga nangilkil og 150 mil pesos sa mag-agaw’ng Mervin ug Christian Pardillo.
Kung wa pay ebidensiya nga nakuha ang kapolisan ngadto sa mag-agaw’ng Pardillo, nganong gi-apil man pagdakop ug gi-imbistigahan sa opisina sa CIB niadtong Valentine’s day gawas kang Paculanang?
Pero akong tan-aw kuwestiyonable kaayo ang affidavit of retraction ni Paculanang kay gikuha kini nga ubos siya sa PNP custody.
Wa kaha hulga-a si Paculanang sa iyang mga arresting officers hinungdan nga gibakwi ang una niyang pasangil?
Inutil sab kaayong dagku ang taga Police Regional Office (PRO-7) pag-secure kang Paculanang.
Hinuon dili pa uwahi ang tanan. Posible pa nga baruganan gyud ni Paculanang ang iyang original declaration kana kung sigurado na siya nga way makahilabot kaniya.
Mao nga di pa angaya’ng magselebrar sila si PO3 Robert Escarlan, PO3 Roy Ryan Cavalida, PO2 Arnulfo Reglamos, PO2 Dennis Mosqueda, PO2 Manuel Paez III, PO1 Perceival Eborlas ug PO1 Ansar Madtahil.
Maglaum ko nga mo-testigo ang akong mga kaubanan sa media ug barugan gyud ang alegasyon ni Paculanang batok sa mga pulis.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
